Si Jesu-Cristo​—An Epekto kan Saiyang Mensahe

“Sierto nanggad na an pinakanagdadanay na prueba dapit sa madonong na tawo na taga Capernaum iyo na padagos siang may impluwensia sa mga puso asin isip.”a—OYON SA AUTOR NA SI GREGG EASTERBROOK.

MAPUERSA an mga tataramon. An piniling marhay na mga tataramon nin kadonongan puedeng makapahiro nin puso, makapukaw nin paglaom, asin makapabago nin buhay. Mayo nang iba pang tawo na nagin mas mapuersa an mga tataramon kisa ki Jesu-Cristo. An saro na nakadangog kan itao ni Jesus an midbid ngonyan na Sermon sa Bukid nagsabi kan huri: “Kan matapos ni Jesus an mga sinabi niang ini, an resulta iyo na an mga kadaklan nagngalas nin labi-labi sa saiyang paagi nin pagtotokdo.”—Mateo 7:28.

Sagkod ngonyan, an mga tawo sa bilog na kinaban pamilyar sa dakol na sinabi ni Jesus. Isip-isipa an pira sanang halimbawa kan makahulogan na mga sinabi nia.

“Dai kamo makakapaglingkod sa Dios asin sa Kayamanan.”—Mateo 6:24.

“Kun siring, an gabos na boot nindong gibohon sa saindo nin mga tawo, dapat man na gibohon nindo sa sainda.”—Mateo 7:12.

“Itao nindo ki Cesar an mga bagay na ki Cesar, alagad sa Dios an mga bagay na sa Dios.”—Mateo 22:21.

“Igwang orog na kaogmahan sa pagtao kisa sa pag-ako.”—Gibo 20:35.

Pero dai sana nagsabi si Jesus nin dai malilingawan na mga tataramon. An mensaheng ihinulit nia mapuersa huling iyan nagpaabot kan katotoohan dapit sa Dios, nagtokdo sa mga tawo kun paano manonompongan an tunay na kahulogan nin buhay, asin malinaw na nagsabi kan solusyon sa gabos na kasakitan nin tawo—an Kahadean nin Dios. Mantang sinisiyasat niato an mensaheng ini sa sunod na mga pahina, maaaraman niato kun taano ta padagos na may impluwensia si Jesus sa minilyon na “puso asin isip.”

[Nota sa Ibaba]