Kun Taano ta an Eden Mahalaga Para sa Saindo

AN SARO sa pinakanakakabiglang mga pagkontra nin nagkapirang iskolar sa pagkasaysay dapit sa Eden iyo na dai iyan sinusuportaran kan ibang kabtang kan Biblia. Halimbawa, an Propesor nin Pag-adal sa Relihion na si Paul Morris nagsurat: “Dai na direktang sinambit giraray kan Biblia an estorya sa Eden.” An sinabi nia tibaad inoyonan nin manlaenlaen na “eksperto,” alagad iyan biyong kontra sa mga katunayan.

An totoo dakol na beses na sinambit sa Biblia an hardin nin Eden, si Adan, si Eva, asin an halas.a Alagad an sala nin pirang iskolar baliwala nanggad kun ikokomparar sa mas dakula asin mas lakop na sala. Paagi sa pagsabi na bakong totoo an pagkasaysay sa Genesis dapit sa hardin nin Eden, an mga lider sa relihion asin mga kritiko kan Biblia sa katunayan naglalansar nin todo-todong pag-atake sa Biblia. Sa anong paagi?

Mahalagang marhay na masabotan kun ano an nangyari sa Eden tanganing masabotan an gabos na iba pang kabtang kan Biblia. Halimbawa, isinurat an Tataramon nin Dios tanganing tabangan kita na maaraman an simbag sa pinakahararom asin pinakamahalagang mga hapot na napapaatubang sa mga tawo. An simbag kan Biblia sa mga hapot na iyan paorootrong may koneksion sa mga nangyari sa hardin nin Eden. Isip-isipa an nagkapirang halimbawa.

● Taano ta kita naggugurang asin nagagadan? Si Adan asin Eva mabubuhay kutana sagkod lamang kun nagdanay sindang mapagpasakop ki Jehova. Sinda magagadan sana kun sinda marebelde. Kan aldaw na sinda magrebelde, nagpoon na sindang magadan. (Genesis 2:16, 17; 3:19) Nawara ninda an pagigin perpekto asin an ikakapamana sana ninda sa saindang mga aki iyo an kasalan saka pagkabakong perpekto. Sa siring, an Biblia nagpapaliwanag: “Paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.”—Roma 5:12.

● Taano ta tinotogotan nin Dios an karatan? Sa hardin nin Eden, inapod ni Satanas an Dios na putikon asin may marahay na bagay na ipinapanguri sa saiyang mga linalang. (Genesis 3:3-5) Sa siring, kinuestion nia an pagigin may deretso kan pamamahala ni Jehova. Pinili ni Adan asin Eva na sunodon si Satanas; kaya isinikwal man ninda an soberaniya ni Jehova asin, garo man sana ninda sinabi na kaya nin tawo na magdesisyon para sa saiyang sadiri kun ano an marahay asin kun ano an maraot. Huling perpekto sa hustisya asin kadonongan, aram ni Jehova na saro sana an paagi tanganing masimbag nin tama an angat—togotan na mag-agi an panahon, na matao nin oportunidad sa mga tawo na pamahalaan an saindang sadiri oyon sa gusto ninda. An ibinunga kaiyan na karatan, sa sarong kabtang, resulta kan nagpapadagos na impluwensia ni Satanas asin luway-luway na naghayag kan dakulang katotoohan na ini: Dai kaya nin tawo na pamahalaan an saiyang sadiri na mayo an Dios.—Jeremias 10:23.

● Ano an katuyohan nin Dios para sa daga? Sa hardin nin Eden, nagbugtak si Jehova nin pamantayan nin kagayonan para sa daga. Sinugo nia si Adan asin Eva na panoon an daga nin mga aki ninda asin ‘sakopon iyan,’ tanganing an bilog na planeta magin arog kagayon kan hardin nin Eden asin magkaigwa nin pagkaoroyon. (Genesis 1:28) Kaya an katuyohan nin Dios para sa daga iyo na iyan magin paraiso na iniistaran nin perpekto asin nagkakasararong pamilya kan mga aki ni Adan asin Eva. An kadaklan na laog kan Biblia nanonongod sa kun paano ootobon nin Dios an orihinal na katuyohan na iyan.

● Taano ta nagdigdi si Jesu-Cristo sa daga? Huli sa rebelyon sa hardin nin Eden, si Adan asin Eva saka an saindang mga aki nasentensiahan nin kagadanan, alagad an Dios mamomoton na nagtao nin paglaom. Sinugo nia sa daga an saiyang Aki tanganing itao an inaapod sa Biblia na pantubos. (Mateo 20:28) Ano an boot sabihon kaiyan? Bueno, si Jesus “an huring Adan”; sia nagin mapanggana kun saen si Adan nasudya. Napagdanay ni Jesus an saiyang perpektong buhay bilang tawo paagi sa pagdanay na makinuyog ki Jehova. Dangan gikan sa boot niang itinao an saiyang buhay bilang atang, o pantubos, na itinatao an paagi tanganing an gabos na maimbod na tawo mapatawad sa saindang mga kasalan asin pag-abot nin panahon magkamit kan klase nin buhay na yaon kaidto ki Adan asin Eva sa Eden bago sinda nagkasala. (1 Corinto 15:22, 45; Juan 3:16) Sa siring, si Jesus nagtao nin garantiya na maootob an katuyohan ni Jehova na an dagang ini gibohon na paraiso na siring sa Eden.b

An katuyohan nin Dios bakong masakit saboton, ni iyan saro sanang teoretikong konsepto sa teolohiya. Tunay iyan. Kun paanong an hardin nin Eden sarong tunay na lugar sa dagang ini na may tunay na mga hayop asin tawo, an panuga nin Dios sa ngapit segurado man, sarong katunayan na madali nang umabot. Iyan daw an magigin futuro mo, an totoong makakamtan mo? Nakadepende nanggad iyan sa saimo. Iyan an futuro na gusto nin Dios para sa pinakadakol na tawo na mapupuede, dawa sa mga tawo na napasala an buhay.—1 Timoteo 2:3, 4.

Kan si Jesus madali nang magadan, kinaolay nia an sarong lalaki na napasala nin grabe an buhay. An lalaking iyan sarong kriminal; aram nia na maninigo siang gadanon. Alagad nakiolay sia ki Jesus tanganing maranga asin magkaigwa nin paglaom. Ano an sinabi ni Jesus? “Ika makakaibahan ko sa Paraiso.” (Lucas 23:43) Kun gusto ni Jesus na maheling duman an dating kriminal na iyan—binuhay liwat asin binendisyonan nin oportunidad na mabuhay sagkod lamang sa paraiso na siring sa Eden—bako daw na gusto nia man na makamtan mo an iyo man sanang bendisyon? Gusto nia nanggad! Gusto nanggad kan saiyang Ama! Kun gusto mo mismong makamtan an futurong iyan, gibohon mo an pinakamakakaya mo na makanood manongod sa Dios na naggibo kan hardin nin Eden.

[Mga Nota sa Ibaba]

[Kahon/Mga ritrato sa pahina 10]

SARONG HULA NA NAGKOKONEKTAR SA BILOG NA BIBLIA

“Papag-iiwalon taka [an halas] asin an babae saka an saimong banhi asin an saiyang banhi. Lulugadon ka nia sa payo asin lulugadon mo sia sa bool.”—Genesis 3:15.

Iyan an enot na hula sa Biblia, na sinabi nin Dios sa Eden. Sairisay an apat na karakter: an babae, an banhi kaiyan, an halas, asin an banhi kaiyan? Paano nagkaigwa nin ‘pag-iiwal’?

AN HALAS

Si Satanas na Diablo.—Kapahayagan 12:9.

AN BABAE

An organisasyon ni Jehova na kompuesto nin mga linalang na nasa langit. (Galacia 4:26, 27) Sinambit ni Isaias an dapit sa “babae,” asin ihinula nia na mangangaki ini nin sarong espirituwal na nasyon sa ngapit.—Isaias 54:1; 66:8.

AN BANHI KAN HALAS

An mga nagdesisyon na gibohon an kabotan ni Satanas.—Juan 8:44.

AN BANHI KAN BABAE

Sa pangenot iyo si Jesu-Cristo, na hale sa langitnon na kabtang kan organisasyon ni Jehova. Kaiba man sa “banhi” an espirituwal na mga tugang ni Cristo, na namamahala sa langit kaiba nia. An linahidan na mga Kristianong iyan an minakompuesto sa espirituwal na nasyon, an “Israel nin Dios.”—Galacia 3:16, 29; 6:16; Genesis 22:18.

AN LUGAD SA BOOL

Sarong makolog na hampak sa Mesiyas alagad bakong permanente an mga epekto kaiyan. Si Satanas nagin mapanggana sa paggadan ki Jesus digdi sa daga. Binuhay liwat si Jesus.

AN LUGAD SA PAYO

Sarong nakakagadan na hampak ki Satanas. Paparaon ni Jesus si Satanas sagkod lamang. Bago pa ngani kaiyan, hahaleon ni Jesus an epekto kan karatan na pinonan ni Satanas sa Eden.—1 Juan 3:8; Kapahayagan 20:10.

Para sa halipot na paliwanag dapit sa prinsipal na tema kan Biblia, helingon an brosyur na An Biblia—Ano an Mensahe Kaiyan? na ipinublikar kan Mga Saksi ni Jehova.

[Ritrato sa pahina 11]

Pinagdusahan ni Adan asin Eva an kapahapahamak na mga epekto nin kasalan