Rumani sa Dios
“Pinalomoy Nia an Lalawgon ni Jehova”
“PAGMATE ko mayo akong halaga,” an sabi nin sarong lalaki na tuminalikod kaidto sa diosnon na pagpadakula sa saiya. Kan ponan niang gumibo nin mga lakdang tanganing itanos an saiyang buhay, natakot sia na nungka siang mapapatawad nin Dios. Alagad an nagkasalang ini na nagsosolsol nakanompong nin paglaom sa pagkasaysay sa Biblia manongod ki Manases, na nasa 2 Cronica 33:1-17. Kun namatean mo nang mayo kang halaga huli sa nakaaging mga kasalan, mararanga ka man sa halimbawa ni Manases.
Pinadakula si Manases sa sarong diosnon na pamilya. An saiyang ama na si Ezequias saro sa pinakamarahay na mga hade sa Juda. Namundag si Manases mga tolong taon pagkatapos na milagrosong palawigon nin Dios an buhay kan saiyang ama. (2 Hade 20:1-11) Mayong duda na minansay ni Ezequias an aking ini bilang regalo na bunga kan pagkaherak nin Dios asin pinagmaigotan niang itadom sa puso kaini an pagkamoot sa dalisay na pagsamba. Alagad an mga aki nin diosnon na mga magurang dai pirmeng nagsusunod sa lakad kan mga magurang ninda. Iyan an nangyari ki Manases.
Mga 12 anyos pa sana si Manases kan magadan an saiyang ama. Makamomondo, “ginibo [ni Manases] an maraot sa mata ni Jehova.” (Bersikulo 1, 2) An hoben na hade daw naimpluwensiahan nin mga parakonseho na mayong pagpahalaga sa tunay na pagsamba? Mayong sinasabi an Biblia. An sinasabi kaiyan sa sato iyo na gruminabe nanggad an ginibong idolatriya asin karingisan ni Manases. Nagpatindog sia nin mga altar para sa falsong mga dios, idinolot bilang atang an sadiri niang mga aki, nagsagibo nin espiritismo, asin nagbugtak nin kinortehan na imahen sa templo ni Jehova sa Jerusalem. Dai dinangog kan sutil na si Manases an paorootrong mga patanid hale ki Jehova, minsan ngani huli sa milagro nin Dios kaya sia namundag.—Bersikulo 3-10.
Sa katapustapusi, itinogot ni Jehova na si Manases darahon na nakakadena sa Babilonya. Mantang nakadistiero duman, nagkaigwa si Manases nin oportunidad na maghorophorop sa saiyang mga ginibo. Naheling na daw nia na dai sia naprotehiran kan saiyang daing maginibo asin mayong buhay na mga idolo? Inisip-isip daw nia an mga bagay na itinokdo kan saiyang diosnon na ama kan sia aki pa? Ano man an nangyari, nagbago an saboot ni Manases. An pagkasaysay nagsasabi: “Pinalomoy nia an lalawgon ni Jehova na saiyang Dios asin padagos na nagpakumbabang marhay . . . Asin padagos siang namimibi sa Saiya.”a (Bersikulo 12, 13) Alagad mapapatawad daw talaga nin Dios an saro na nakagibo nin arog kaiyan kagrabeng mga kasalan?
Napahiro si Jehova kan sinserong pagsolsol ni Manases. Dinangog nin Dios an mga pakimaherak nia “asin ibinalik sia sa Jerusalem sa saiyang pagigin hade.” (Bersikulo 13) Bilang prueba kan saiyang pagsolsol, ginibo kaidto ni Manases an makakaya nia tanganing itanos an saiyang mga sala, na hinahale an idolatriya sa saiyang kahadean asin sinasadol an mga kahimanwa nia na “paglingkodan si Jehova.”—Bersikulo 15-17.
Kun an pagmate mo dai ka maninigo sa kapatawadan nin Dios huli sa nakaaging mga kasalan, logod na maparigon ka kan halimbawa ni Manases. An pagkasaysay na ini kabtang kan ipinasabong na Tataramon nin Dios. (Roma 15:4) Malinaw nanggad na gusto ni Jehova na maaraman niato na sia “andam na magpatawad.” (Salmo 86:5) Bakong an kasalan kundi an kamugtakan nin puso kan nagkasala an mahalaga sa saiya. An nagkasala na namimibi na may pagsolsol, binabayaan an sala niang dalan, asin determinadong naghihingoa na gibohon an tama puedeng ‘mapalomoy an lalawgon ni Jehova,’ arog ni Manases.—Isaias 1:18; 55:6, 7.
Isinusuherir na babasahon sa Biblia sa Enero:
[Nota sa Ibaba]
a Arog kaini an mababasa niato sa An Banal na Biblia [edisyon na 2007]: “Hiningowa nyang mapakulpa an kaanggotan kan Kagurangnan na saiyang Dios.”