Magpuka Kamo, Arog ni Jeremias

“Ako [si Jehova] nagpupuka mapadapit sa sakuyang tataramon tanganing otobon iyan.”—JER. 1:12.

1, 2. Taano an pagigin ‘puka’ ni Jehova ta iinasosyar sa poon nin almendro?

SA MGA bulod nin Lebanon asin Israel, an saro sa enot na mga poon nin kahoy na nagbuburak iyo an almendro. An magayon asin kolor rosa o puting mga burak kaiyan puedeng maheling dawa sa katapusan pa sana nin Enero o kapinonan nin Pebrero. An Hebreong ngaran kaiyan literal na nangangahulogan na “saro na nagpupuka.”

² Kan nombrahan ni Jehova si Jeremias bilang saiyang propeta, an karakteristikong ini kan poon nin almendro angay na ginamit tanganing iilustrar an sarong mahalagang katunayan. Sa kapinonan kan saiyang ministeryo, paagi sa bisyon ipinaheling sa propeta an sarong sanga kan poon na iyan. Ano an boot sabihon kaiyan? Ipinaliwanag ni Jehova: “Ako nagpupuka mapadapit sa sakuyang tataramon tanganing otobon iyan.” (Jer. 1:11, 12) Kun paanong an poon nin almendro nagmamata nin amay, si Jehova piguratibong “minabangon nin amay” tanganing isugo an saiyang mga propeta na patanidan an mga tawo manongod sa magigin mga resulta nin pagsuway. (Jer. 7:25) Asin dai sia mapahingalo—sia ‘magpupuka’—sagkod na maotob an saiyang makahulang tataramon. Kan 607 B.C.E., kan mismong itinalaan na panahon, an paghokom ni Jehova nag-abot sa apostatang nasyon nin Juda.

3. Mapadapit ki Jehova, sa ano kita makakaseguro?

³ Siring man ngonyan, si Jehova puka asin atentibo sa pag-otob kan saiyang kabotan. Imposible na pabayaan niang dai maotob an saiyang tataramon. Ano an epekto sa saindo kan pagigin atentibo ni Jehova? Naniniwala daw kamo na sa taon na ini nin 2011, si Jehova ‘puka’ sa pag-otob kan saiyang mga panuga? Kun igwa kita nin ano man na pagduda manongod sa seguradong mga panuga ni Jehova, ngonyan na an panahon na magpuka kita sa ano man na pagtungka sa espirituwal. (Roma 13:11) Bilang propeta ni Jehova, si Jeremias nagpuka. An pagsiyasat sa kun paano asin kun taano ta nagpuka si Jeremias sa asignasyon na itinao sa saiya nin Dios makakatabang sa sato na maaraman kun paano kita puedeng magmaigot sa gibohon na itinao sa sato ni Jehova.

Sarong Apuradong Mensahe

4. Anong mga kadepisilan an napaatubang ki Jeremias sa pagpaabot nia kan saiyang mensahe, asin taano ta apurado iyan?

⁴ Posibleng madali nang mag-25 anyos si Jeremias kan akoon nia ki Jehova an sugo sa saiya bilang bantay. (Jer. 1:1, 2) Alagad an pagmate nia sia garo sana sarong aki, biyong bakong kualipikadong magtaram sa kamagurangan kan nasyon, mga lalaking may edad na asin nasa katongdan na may autoridad. (Jer. 1:6) Sia igwa nin makolog na mga pagdenunsiar asin nakakatakot na mga paghokom na kaipuhan ipahayag, nangorogna sa mga saserdote, falsong propeta, asin namamahala, saka sa mga naglakaw sa “dalan nin kadaklan” asin ‘nagdanay na bakong maimbod.’ (Jer. 6:13; 8:5, 6) Lalaglagon an mamuraway na templo ni Hadeng Salomon, na nagin sentro kan tunay na pagsamba sa laog nin haros apat na siglo. An Jerusalem asin Juda magdadanay na gaba, asin an mga nag-iistar dian dadarahon na bihag. Malinaw nanggad, apurado an mensaheng isinugo ki Jeremias na dapat niang ipahayag!

5, 6. (a) Paano ginagamit ni Jehova an grupong Jeremias ngonyan? (b) Sa ano mapokus an satong pag-adal?

⁵ Sa presenteng mga panahon, si Jehova mamomoton na nagtao sa katawohan nin sarong grupo nin linahidan na mga Kristiano na nagseserbing piguratibong mga bantay tanganing magpatanid manongod sa saiyang paghokom sa kinaban na ini. Sa laog nin mga dekada, sinasadol kan grupong Jeremias na ini an mga tawo na magtao nin atension sa panahon na kinabubuhayan niato. (Jer. 6:17) Idinodoon kan Biblia na si Jehova, an Dakulang Paratalaan nin Panahon, bakong maluway. An saiyang aldaw maabot nin eksakto sa panahon, sa oras na dai inaasahan nin mga tawo.—Sof. 3:8; Mar. 13:33; 2 Ped. 3:9, 10.

⁶ Girumdomon na si Jehova puka asin na poponan nia nin tama sa panahon an saiyang matanos na bagong kinaban. An pakaaram kaiyan maninigo na makapahiro sa grupong Jeremias asin makatabang sa saindang dusay na kairiba na magdanay na puka sa paorog nang paorog na pagkaapurado kan saindang mensahe. Ano an epekto kaiyan sa saindo? Ipinarisa ni Jesus na an gabos kaipuhan na manindogan para sa Kahadean nin Dios. Siyasaton niato an tolong kualidad na nakatabang ki Jeremias na magdanay na puka sa sugo sa saiya asin na makakatabang sa sato na gibohon man iyan.

Pagkamoot sa mga Tawo

7. Ipaliwanag kun paano an pagkamoot nakamotibar ki Jeremias na maghulit sa ibong nin depisil na mga kamugtakan.

⁷ Ano an nagmotibar ki Jeremias na maghulit sa ibong nin depisil na mga kamugtakan? Igwa sia nin pagkamoot sa mga tawo. Aram ni Jeremias na an falsong mga pastor iyo an dahelan kan dakol na problemang napapaatubang sa banwaan. (Jer. 23:1, 2) An kaaraman na ini nakatabang sa saiya na hamanon an saiyang gibohon na may pagkamoot asin may pagmalasakit. Gusto nia na an mga kahimanwa nia makadangog kan tataramon nin Dios asin mabuhay. Sia nahadit na gayo kaya sia nagtangis huli sa kapahamakan na mangyayari sa sainda. (Basahon an Jeremias 8:21; 9:1.) Buhay na buhay na ipinaheling kan libro nin Lamentacion an hararom na pagkamoot asin pagmakolog ni Jeremias sa ngaran ni Jehova asin sa banwaan nia. (Lam. 4:6, 9) Kun nakakaheling kamo ngonyan nin mga tawo na “naanitan asin nagkaralagalag siring sa mga karnero na mayong pastor,” dai daw kamo nakakamate nin pagmawot na sabihon sa sainda an nakakarangang bareta kan Kahadean nin Dios?—Mat. 9:36.

8. Ano an nagpapaheling na dai nagraot an boot ni Jeremias huli sa pagsakit?

⁸ Si Jeremias nagsakit sa kamot kan mismong banwaan na gusto niang tabangan, pero sia dai nagbalos o nagraot an boot. Sia matinios asin maboot, dawa sa maraot na si Hadeng Zedequias! Pagkatapos siang isurender ni Zedequias tanganing gadanon, nakimaherak pa man giraray si Jeremias sa saiya na kuyogon an tingog ni Jehova. (Jer. 38:4, 5, 19, 20) An pagkamoot daw niato sa mga tawo kapareho kakosog kan ki Jeremias?

Kosog nin Boot na Itinao nin Dios

9. Paano niato naaraman na gikan sa Dios an kosog nin boot ni Jeremias?

⁹ Kan enot na kaolayon ni Jehova si Jeremias, prinobaran niang magsayuma. Maheheling niato digdi na an pagkapusoan asin karigonan na ipinaheling nia kan huri bakong natural sa saiya. An totoo, an pambihirang kosog na ipinaheling ni Jeremias durante kan saiyang pagigin propeta naggikan talaga sa lubos na pagsarig nia sa Dios. Tunay nanggad, si Jehova kaibanan kan propeta “siring sa makangingirhat na makakamhan” sa paagi na sinuportaran nia si Jeremias asin tinawan sia nin kosog na maasikaso an saiyang asignasyon. (Jer. 20:11) Bantog nanggad si Jeremias sa pagigin pusoan asin makosog an boot kaya durante kan ministeryo ni Jesus sa daga, may mga naghona na si Jesus iyo si Jeremias na nabuhay liwat!—Mat. 16:13, 14.

10. Taano ta masasabi na an linahidan na mga natatada ‘namamahala sa mga nasyon asin kahadean’?

¹⁰ Bilang “Hade kan mga nasyon,” isinugo ni Jehova si Jeremias na ipahayag an mensahe nin paghokom sa mga nasyon asin kahadean. (Jer. 10:6, 7) Alagad sa anong paagi na an linahidan na mga natatada ‘namamahala sa mga nasyon asin sa mga kahadean’? (Jer. 1:10) Arog kan propeta kan suanoy, an grupong Jeremias nag-ako nin asignasyon hale sa Soberano kan uniberso. Sa siring, an linahidan na mga lingkod nin Dios autorisado na gumibo nin mga kapahayagan sa bilog na kinaban tumang sa mga nasyon asin kahadean. Huling tinawan nin autoridad kan Kaharohalangkaweng Dios asin ginagamit an malinaw na lenguahe kan saiyang ipinasabong na Tataramon, an grupong Jeremias nagpapahayag na an mga nasyon asin kahadean ngonyan gagaboton asin lalaglagon sa itinalaan na panahon nin Dios asin sa paagi na pinili nia. (Jer. 18:7-10; Kap. 11:18) An grupong Jeremias determinado na dai magpabaya sa itinao nin Dios na sugo sa sainda na ipahayag an mga mensahe nin paghokom ni Jehova sa bilog na daga.

11. Ano an makakatabang sa sato na padagos na maghulit nin daing ontok kun napapaatubang kita sa masakit na mga kamugtakan?

¹¹ Normal sana na pangluyahan nin boot kun beses kun napapaatubang sa pagtumang, pagkaindiperente, o masakit na mga kamugtakan. (2 Cor. 1:8) Alagad arog ni Jeremias, magpadagos kita. Dai mangluya an boot. Logod na an lambang saro sa sato padagos na magngayongayo sa Dios, manarig sa saiya, asin ‘magpakapusoan’ mantang nag-aasa kita sa saiya para sa tabang. (1 Tes. 2:2) Bilang tunay na mga parasamba, dapat na padagos kitang magdanay na puka sa mga paninimbagan na itinao sa sato nin Dios. Kaipuhan kitang magin determinado na padagos na maghulit nin daing ontok manongod sa kalaglagan kan Kakristianohan, na ipinanganino kan bakong maimbod na Jerusalem kaidto. Kaipuhan na ipahayag kan grupong Jeremias bako sanang an “taon nin marahay na boot ni Jehova” kundi pati an “aldaw nin pamamalos kan satong Dios.”—Isa. 61:1, 2; 2 Cor. 6:2.

Odok sa Pusong Kagayagayahan

12. Taano ta makakakongklusyon kita na napagdanay ni Jeremias an saiyang kagayagayahan, asin ano an sarong importanteng marhay na paagi kaya nagibo nia iyan?

¹² Nagin magayagaya si Jeremias sa saiyang gibohon. Sinabi nia ki Jehova: “Nakua an saimong mga tataramon, asin kinakan ko iyan; asin an saimong tataramon nagin para sa sako labi-labing kaogmahan asin kagayagayahan kan sakong puso; huli ta ako inapod sa saimong ngaran, O Jehova.” (Jer. 15:16) Para ki Jeremias, sarong pribilehio na irepresentar an tunay na Dios asin ihulit an saiyang tataramon. Interesanteng mangnohon na kan magpokus si Jeremias sa pag-olog-olog kan banwaan, nawara an saiyang kagayagayahan. Kan ibaling nia an saiyang atension sa kagayonan asin importansia kan saiyang mensahe, nagbalik an saiyang kagayagayahan.—Jer. 20:8, 9.

13. Taano an pagkakan nin hararom na espirituwal na mga katotoohan ta mahalaga tanganing mapagdanay niato an kagayagayahan?

¹³ Tanganing mapagdanay an kagayagayahan sa paghuhulit sa satong panahon, kaipuhan kitang magkakan nin “matagas na kakanon,” an hararom na mga katotoohan sa Tataramon nin Dios. (Heb. 5:14) An mas hararom na pag-adal nagpapatalubo sa pagtubod. (Col. 2:6, 7) Itinatadom kaiyan sa satong isip kun paano an satong paggawe talagang may epekto sa puso ni Jehova. Kun nasasakitan kitang maghanap nin panahon na basahon asin pag-adalan an Biblia, maninigo na siyasaton giraray niato an satong iskedyul. Dawa an pirang minuto sanang pag-adal asin paghorophorop kada aldaw orog na magpapadayupot sa sato ki Jehova asin makakatabang sa sato na magkaigwa nin ‘labi-labing kaogmahan asin kagayagayahan kan puso,’ arog kan nagin totoo ki Jeremias.

14, 15. (a) Ano an ibinunga kan maimbod na pagdanay ni Jeremias sa sugo sa saiya? (b) Ano an nasasabotan kan banwaan nin Dios ngonyan manongod sa paghuhulit?

¹⁴ Talagang daing ontok na ipinahayag ni Jeremias an mga patanid asin mensahe nin paghokom ni Jehova, pero nasa puso nia an sugo na “magtogdok asin magtanom.” (Jer. 1:10) Nagbunga an gibohon nia na pagtogdok asin pagtanom. May mga Judio saka bakong Israelita na nakaligtas sa kalaglagan nin Jerusalem kan 607 B.C.E. Aram niato an dapit sa mga Recabita, ki Ebed-melec, asin ki Baruc. (Jer. 35:19; 39:15-18; 43:5-7) An maimbod asin may takot sa Dios na mga katood na ini ni Jeremias malinaw na naglaladawan sa mga may daganon na paglaom ngonyan na nakikikatood sa grupong Jeremias. Dakula an kaogmahan kan grupong Jeremias na parigonon sa espirituwal an “dakulang kadaklan” na ini. (Kap. 7:9) Siring man, an maimbod na kairibang ini kan mga linahidan nakakanompong nin dakulaon na satispaksion sa pagtabang sa mga sadiosan an puso na maaraman an katotoohan.

¹⁵ Nasasabotan kan banwaan nin Dios na an paghuhulit kan maogmang bareta bako sanang paglilingkod sa publiko sa mga nagdadangog kaiyan kundi akto man nin pagsamba sa satong Dios. Baga man makanompong kita nin andam na magdangog o dai, an paggibo nin sagradong paglilingkod ki Jehova paagi sa satong paghuhulit nagtatao sa sato nin dakulang kagayagayahan.—Sal. 71:23; basahon an Roma 1:9.

‘Magpuka Kamo’ sa Saindong Asignasyon!

16, 17. Paano ipinapaheling kan Kapahayagan 17:10 asin Habacuc 2:3 an pagkaapurado kan satong panahon?

¹⁶ An pagkaapurado kan panahon na kinabubuhayan niato ikinakadoon kun ineestudyaran niato an ipinasabong na hula sa Kapahayagan 17:10. An ikapitong hade, an Pambilog na Kinaban na Kapangyarihan na Anglo-Amerikano, yaon na. Mapadapit dian mababasa niato: “Pag-abot nia [kan ikapitong pambilog na kinaban na kapangyarihan] magdadanay sia sa halipot na panahon.” Ngonyan siertong madali nang matapos an “halipot na panahon” na iyan. Itinao sa sato ni propeta Habacuc an pag-asegurar na ini mapadapit sa katapusan kan maraot na sistemang ini: “An bisyon para sa itinalaan na panahon pa . . . Padagos iyan na halaton; huli ta iyan daing salto na maootob. Dai iyan mahuhuri.”—Hab. 2:3.

¹⁷ Hapoton an saimong sadiri: ‘Talaga daw na naheheling sa sakong buhay an pagkaapurado kan satong panahon? Ipinapaheling daw kan sakong pamumuhay na inaasahan kong madali nang mag-abot an katapusan? O ipinaparisa daw kan sakong mga desisyon asin prioridad na dai ko inaasahan na madali nang mag-abot an katapusan o dai ngani ako segurado kun maabot pa iyan?’

18, 19. Taano ta bako ngonyan an panahon na magluyaluya?

¹⁸ An gibohon kan grupong bantay dai pa tapos. (Basahon an Jeremias 1:17-19.) Nakakagayagaya nanggad na an linahidan na natatada marigon na nagtitindog, na siring sa “hariging batbat” asin “siudad na nakukutaan”! An saindang ‘habayan hinahagkosan ninda nin katotoohan’ sa paaging tinotogotan ninda an Tataramon nin Dios na pakosogon sinda sagkod na matapos an gibohon na isinugo sa sainda. (Efe. 6:14) May kaagid na determinasyon, an mga kabilang sa dakulang kadaklan aktibong nagsusuportar sa grupong Jeremias sa pag-otob kan asignasyon kaiyan na gikan sa Dios.

¹⁹ Bako ngonyan an panahon na magluyaluya sa aktibidad na pang-Kahadean kundi ngonyan an panahon na pag-isipan an kahulogan kan Jeremias 12:5. (Basahon.) Kita gabos napapaatubang sa mga pagbalo na dapat niatong tagalan. An mga pagbalo na ini sa pagtubod puedeng ikomparar sa “mga nagdadaralagan” na sa sainda kita nakikipag-umbasan. Minsan siring, mantang nagdadangadang an “dakulang kahorasaan,” aasahan niato na maorog pa an pagsakit. (Mat. 24:21) An pagmamaigot na atubangon an mas masakit na mga kadepisilan na maabot puedeng iagid sa ‘pakipagkarera sa mga kabayo.’ An sarong tawo mangangaipo nin dakulang kosog sa pakatagal tanganing makasabay sa mga kabayong marikason na nagdadalagan. Kaya kapakipakinabang na tagalan niato an mga pagbalong napapaatubang sa sato ngonyan, na puedeng mag-andam sa sato na tagalan an mga pagbalo na maabot pa.

20. Ano an determinado nindong gibohon?

²⁰ Puede niato gabos na arogon si Jeremias asin mapangganang otobon an satong asignasyon na maghulit! An mga kualidad na arog kan pagkamoot, kosog nin boot, asin kagayagayahan nagpahiro ki Jeremias na maimbod na gibohon an saiyang 67 taon na ministeryo. An magayon na burak nin almendro nagpapagirumdom sa sato na si Jehova magdadanay na ‘puka’ kun dapit sa saiyang tataramon tanganing otobon iyan. Kun siring, may marahay na dahelan kita na gibohon man iyan. Si Jeremias ‘nagpuka,’ asin magigibo man niato iyan.

Nagigirumdoman daw Nindo?

• Paano an pagkamoot nakatabang ki Jeremias na ‘magpuka’ sa isinugo sa saiya?

• Taano ta kaipuhan niato an kosog nin boot na itinatao nin Dios?

• Ano an nakatabang ki Jeremias na mapagdanay an saiyang kagayagayahan?

• Taano ta gusto nindong ‘magpuka’?

[Mga Ritrato sa pahina 31]

Padagos daw kamong maghuhulit sa ibong nin pagtumang?