Binago kan Biblia an Saindang Buhay

ANO an nakapahiro sa sarong hoben na babae na bumalik sa tinalikodan niang mga pamantayan sa relihion na nanodan nia poon sa pagkaaki? Basahon an sinabi nia.

“Igwa Na Ngonyan nin Tunay na Katuyohan an Buhay Ko.”—LISA ANDRÉ

TAON NIN PAGKAMUNDAG: 1986

GINIKANAN NA NASYON: LUXEMBOURG

DATING SUTIL NA AKI

AN BUHAY KO KAIDTO: Nagdakula ako sa Bertrange, sarong sadit, malinig, ligtas, asin maoswag na banwaan na harani sa siudad nin Luxembourg. Ako an kangudhan sa limang magturugang. Saksi ni Jehova an mga magurang ko, asin nagmaigot sindang marhay na itadom sa samong magturugang an Kristianong mga pamantayan.

Kan ako tin-edyer na, nagpoon akong magdudang marhay sa mga itinotokdo kan mga Saksi ni Jehova. Kan enot, dai ko inintindi an mga pagdudang ini, alagad luway-luway na nagluya an sakong pagtubod. Ginibo kan sakong mga magurang an bilog nindang makakaya tanganing giyahan ako sa tamang dalan, alagad sinayumahan ko an saindang tabang. Dai ninda aram, nakikiibaiba ako sa mga hoben na mayong gayong paggalang sa autoridad. Gusto ko an katalingkasan na garo baga iinaalok kan saindang estilo nin pamumuhay. Sige mi sanang parti, nakikidorog kami maski kiisay, asin nag-aabuso nin droga saka inomon na de alkohol. Sa primero, naoogma akong makiiba sa mga tawong garo baga lubos na nag-oogma sa buhay.

Pero, an totoo, bako talaga akong maogma. Mayo talagang saysay an buhay ko kan kaibaiba ko sinda; sinda gabos mayong pakiaram sa ano man na bagay. Sa kabaliktaran, nahahadit ako sa mga isyu na siring baga kan lakop na inhustisya sa kinaban. Sa pag-agi nin panahon, paorog nang paorog akong namomondo.

KUN PAANO BINAGO KAN BIBLIA AN BUHAY KO: Sarong aldaw, kan ako 17 anyos, grabe an kamondoan ko. Kan marisa kan sakong ina na mamondoon ako, sinabihan nia ako na mag-adal giraray kan Biblia. Dinagka nia ako na siyasaton an mga katokdoan kaiyan asin magdesisyon para sa sakong sadiri kun baga gusto kong mamuhay kaoyon kaiyan o dai. An sinserong pag-oolay na idto nagin kapinonan nin dakulang pagbabago sa buhay ko. Nag-oyon akong makipag-adal nin Biblia sa sakong matuang tugang na si Caroline asin sa saiyang agom na si Akif. Dai sia pinadakula bilang Saksi ni Jehova alagad sia nagin Saksi kan sia adulto na. Huli sa dating buhay ni Akif, nakamate ako na masasabi ko sa saiya an gusto kong sabihon, asin iyan mahalaga sa sako.

Aram ko na bakong angay sa sarong Saksi an sakong estilo nin pamumuhay, alagad kan enot, an pagmate ko may deretso akong gibohon an ano man na gusto kong gibohon sa buhay ko. Minsan siring, sa pag-adal ko kan Biblia, naaraman ko na an sakong paggawe may epekto sa namamatean ni Jehova. (Salmo 78:40, 41, BPVa; Talinhaga 27:11) Nasabotan ko man na may epekto man iyan sa ibang tawo.

Mantang orog ko pang sinisiyasat an Biblia, naaaraman ko na may makatanosan asin nakakakombensir na mga dahelan na magtubod na iyan Tataramon nin Dios. Halimbawa, nanodan ko an dakol na hula sa Biblia na naotob—na makangangalas an pagkaeksakto. An siring na kaaraman nakatabang sa sako na mawara an mga pagduda ko kan enot.

Mga sarong taon pagkapoon kong mag-adal kan Biblia, dinalaw mi kan sakong mga magurang an matua kong tugang na lalaki na nagboboluntaryo sa sangang opisina kan Mga Saksi ni Jehova sa Alemania. Kan maheling ko kun gurano kaogma an sakong tugang, napukaw nanggad an boot ko. An kaogmahan na iyan an talagang hinahanap ko! Napahanga man akong marhay sa iba pang mga Saksi na nagboboluntaryo duman. Laen nanggad sinda sa mga dating kaibaiba ko na madaya asin mahilig sa kaalingan. Dai nahaloy pagkatapos kaiyan, odok sa puso akong namibi ki Jehova na nanunugang paglilingkodan ko sia sa bilog kong buhay. Sa edad na 19, sinimbolisaran ko an sakong pagdusay ki Jehova paagi sa pagpabautismo.

KUN PAANO AKO NAKINABANG: Igwa na ngonyan nin tunay na katuyohan an buhay ko. Naoogma ako sa pagtotokdo kan Biblia sa iba, na tinatabangan sindang makanood manongod ki Jehova asin sa mga panuga nia sa maabot na panahon. Nakinabang man an sakong pamilya—dai na sinda naghahadit sa sako.

Aram ko an sakong nakaaging mga sala, alagad pinagmamaigotan kong dai na pagparaisipon iyan. Imbes, nagpopokus ako sa pagpapatawad ni Jehova asin sa saiyang mamomoton na interes sa sako. Bilog na puso akong minaoyon sa mga tataramon sa Talinhaga 10:22, na nagsasabi: “An bendisyon nin KAGURANGNAN nakakapayaman, asin dai niya iyan dinadagdagan nin kamondoan.”

[Nota sa Ibaba]

[Blurb sa pahina 12]

“Sige mi sanang parti, nakikidorog kami maski kiisay, asin nag-aabuso nin droga saka inomon na de alkohol”

[Blurb sa pahina 13]

“Aram ko an sakong nakaaging mga sala, alagad pinagmamaigotan kong dai na pagparaisipon iyan”