Pagdadanay sa Satong Paninindogan Bilang ‘Temporaryong mga Residente’

1, 2. Siisay an pinanonongdan ni Pedro kan terminong ‘mga pinili,’ asin taano ta inapod nia sindang ‘temporaryong mga residente’?

MGA 30 taon pagkasakat ni Jesus sa langit, si apostol Pedro nagsurat sa ‘temporaryong mga residente’ na inaapod na ‘mga pinili, na wararak sa Ponto, sa Galacia, sa Capadocia, sa Asia, asin sa Bitinia.’ (1 Ped. 1:1) Malinaw nanggad, kan sambiton ni Pedro an terminong ‘mga pinili,’ an pinanonongdan nia iyo an mga kapareho niang linahidan nin banal na espiritu asin ‘ipinangaki liwat manongod sa buháy na paglaom’ tanganing mamahala sa langit kaiba ni Cristo. (Basahon an 1 Pedro 1:3, 4.) Pero taano ta pagkatapos kaiyan, inapod nia na “mga dayuhan asin temporaryong residente” an mga pinili na ini? (1 Ped. 2:11, NW) Asin ano an kahulogan kaini sa sato ngonyan mantang haros 1 sana sa 650 aktibong Saksi sa bilog na kinaban an nagsasabing kabilang sia sa linahidan na mga pinili?

² Angay sanang apodon na ‘temporaryong mga residente’ an mga linahidan kan enot na siglo. Kapareho kan mga natatada sa grupong ini na buhay pa ngonyan, an pag-istar ninda kaidto sa daga bakong permanente. Si apostol Pablo, na miembro mismo kan linahidan na sadit na aripompon, nagpaliwanag: ‘An satong pagkasiudadano nasa langit; na hali man duman hinahalat ta an paraligtas, an Kagurangnan na si Jesu-Cristo.’ (Luc. 12:32; Fil. 3:20) Huling ‘nasa langit an pagkasiudadano’ kan mga linahidan, pagkagadan ninda mahali sinda sa daga tanganing kamtan an sarong bagay na orog karahay, an imortal na buhay sa langit. (Basahon an Filipos 1:21-23.) Sa siring, sa literal na marhay na paagi, puede sindang apodon na ‘temporaryong mga residente’ kan daga na kontrolado ni Satanas.

3. Anong hapot an minalataw dapit sa ‘ibang mga karnero’?

³ Pero kumusta an ‘ibang mga karnero’? (Juan 10:16) Bakong igwa sinda nin basado nanggad sa Kasuratan na paglaom na magin permanenteng residente kan daga? Iyo nanggad, iyan an magigin istaran ninda sagkod lamang! Pero, sa ngonyan masasabi man na temporaryo sindang mga residente. Taano?

‘AN GABOS NA LINALANG NAG-AAGRANGAY’

4. Ano an dai kayang pugolan kan mga lider sa kinaban?

⁴ Sagkod na tinotogotan an maraot na sistema ni Satanas, an gabos, pati na an mga Kristiano, padagos na maaapektaran kan mga resulta kan pagrebelde ni Satanas ki Jehova. Mababasa niato sa Roma 8:22: ‘Kita nakakaaram na an gabos na linalang nag-aagrangay asin nagtitios nin kulog sagkod ngonyan.’ Dai ini kayang pugolan kan mga lider sa kinaban, sientista, asin humanitarian—gurano man sinda kasinsero.

5. Poon 1914, ano an ginibo nin minilyon na tawo, asin taano?

⁵ Kaya, poon 1914, minilyon an nagdesisyon na magin masinunod na mga sakop ni Cristo Jesus, an Hade na ninombrahan nin Dios. Dai ninda gustong magin kabtang kan sistema ni Satanas. Habo nindang magin suportador kan kinaban ni Satanas. Imbes, ginagamit ninda an saindang buhay asin mga pagsadiri tanganing suportaran an Kahadean nin Dios asin an intereses kaiyan.—Roma 14:7, 8.

6. Taano ta puede man na apodon na dayuhan an mga Saksi ni Jehova?

⁶ Iyo, an mga Saksi ni Jehova makinuyog sa ley na mga siudadano sa labing 200 na nasyon. Pero saen man sinda nakaistar, sinda siring sa mga dayuhan. Nagdadanay sinda sa saindang paninindogan na magin biyong neutral kun dapit sa mga isyu sosyal asin politikal kan iniistaran nindang nasyon. Dawa ngonyan, ibinibilang na ninda an saindang sadiri na mga siudadano nin sarong bagong kinaban na ipinanuga nin Dios. Naoogma sinda ta madali nang matapos an saindang pagigin temporaryong residente kan bakong perpektong sistemang ini nin kinaban.

7. Paano magigin permanenteng mga residente an mga lingkod nin Dios, asin residente kan ano?

⁷ Dai mahaloy, gagamiton na ni Cristo an saiyang autoridad tanganing laglagon an maraot na sistema ni Satanas. Hahalion kan perpektong gobyerno ni Cristo an kasalan asin kamondoan sa daga. Paparaon kaiyan an gabos na nahihiling asin dai nahihiling na rebelde sa matanos na soberaniya ni Jehova. Dangan, an maimbod na mga lingkod nin Dios magigin nang permanenteng mga residente kan Paraisong daga. (Basahon an Kapahayagan 21:1-5.) Sa panahon na iyan, an mga linalang lubos nang “papatalingkason sa pagkaoripon sa kalapaan asin magkakaigwa kan mamuraway na katalingkasan kan mga aki nin Dios.”—Roma 8:21, NW.

ANO AN INAASAHAN SA TUNAY NA MGA KRISTIANO?

8, 9. Ipaliwanag kun ano an boot sabihon ni Pedro kan “lumikay sa mga mawot nin laman.”

⁸ Ipinaliwanag ni Pedro kun ano an inaasahan sa mga Kristiano kan sabihon nia: “Mga namomotan, pinakasasadol ko kamo bilang mga dayuhan asin temporaryong residente na padagos na lumikay sa mga mawot nin laman, na iyo mismo an nakikipaglaban sa kalag.” (1 Ped. 2:11, NW) An sadol na ini enot na itinao sa linahidan na mga Kristiano, pero aplikado man ini sa ibang mga karnero ni Jesus.

⁹ May mga kamawotan na bako man sala kun pinapanigoan sono sa paaging sinabi kan Kaglalang. Totoong nakakadagdag iyan nin kaogmahan sa buhay. Halimbawa, yaon an normal na kamawotan na masiraman sa kakanon asin inomon, magkaigwa nin nakakarepreskong mga aktibidad, asin mag-ogma kaiba nin marahay na mga katood. Angay asin normal man an magmawot nin seksuwal na kaogmahan sa agom. (1 Cor. 7:3-5) Minsan siring, tama nanggad na an sinasabi ni Pedro iyo an “mga mawot nin laman” na “kontra sa buhay.” An kahulogan kaiyan risang-risa sa nagkapirang traduksion nin Biblia, arog kan New International Version na naggamit nin “makasalan na mga pagmawot.” Malinaw nanggad, dapat na pugolan an ano man na pagmawot na kontra sa katuyohan ni Jehova asin puedeng makaraot sa relasyon sa Dios. Ta kun dai, puedeng mameligro nanggad an paglaom nin sarong Kristiano na magdanay na buhay.

10. Ano an nagkapirang paagi na ginagamit ni Satanas tanganing magin kabtang kan saiyang kinaban an mga Kristiano?

¹⁰ Katuyohan ni Satanas na paluyahon an tunay na mga Kristiano sa saindang paninindogan bilang ‘temporaryong mga residente’ sa presenteng sistema. Ineengganyar kita na magin materyalistiko, gumibo nin imoralidad, magin prominente, magpaimportante sa sadiri, asin magin nasyonalistiko. Iyan gabos dapat na mansayon niato na silo ni Satanas. Paagi sa satong pagigin desidido na likayan an negatibong mga mawot na iyan nin laman, malinaw niatong ipinapahiling na habo tang magin kabtang kan maraot na kinaban ni Satanas. Pinapatunayan niato na nakikiistar sana kita nin temporaryo sa kinaban na ini. An talagang gusto niato asin pinagmamaigotan na marhay iyo an magin permanenteng residente sa matanos na bagong kinaban nin Dios.

MARAHAY NA PAMUMUHAY

11, 12. Ano kun minsan an paghiling sa mga dayuhan, asin ano an masasabi dapit sa mga Saksi ni Jehova?

¹¹ Sa bersikulo 12, padagos na ipinaliwanag ni Pedro kun ano an inaasahan sa ‘temporaryong mga residenteng’ Kristiano: ‘An saindong pamumuhay magin [marahay] dian sa mga Gentil; tanganing, dian sa mga bagay na pinagsasabihan ninda saindo na kamo mga paragibo nin maraot, sinda, huli kan saindong marahay na mga gibo na saindang nahihiling, magpamuraway sa Dios sa aldaw nin pagsongko.’ An mga dayuhan, na temporaryong mga residente sa ibang nasyon, kinikritika kun minsan. Palibhasa naiiba sinda sa kataraed ninda, tibaad isipon pa ngani kan iba na may ginigibo sindang maraot. An saindang pagtaram, gawe-gawe, pagbado, o tibaad pati itsura medyo iba. Pero kun naggigibo sinda nin marahay, o marahay an saindang pamumuhay, nababaliwala an negatibong mga sinasabi dapit sa saindang pagigin naiiba.

¹² Kaagid kaiyan, sa nagkapirang bagay an tunay na mga Kristiano naiiba sa kadaklan na kataraed ninda, siring kan saindang mga pinag-oolayan o pinipiling libangan. Huli sa saindang pagbado asin pagpakarhay sa sadiri, sa parate naiiba sinda sa kadaklan sa komunidad. Huli kaini, an nagkapira na may salang impormasyon dapit sa sainda kun beses nagsasahot na may ginigibo daa sindang maraot. Minsan siring, tibaad omawon sinda nin iba huli sa saindang pamumuhay.

13, 14. Paano an kadonongan ‘napapatotoohan kan mga gibo kaiyan’? Magtao nin halimbawa.

¹³ Iyo, an marahay na pamumuhay makakatabang na mahali an bakong makatanosan na kritisismo. Dawa si Jesus, an solamenteng tawo na nabuhay na may perpektong kaimbodan sa Dios, sinahotan nin sala. May mga nagsabi na sia ‘tawong paslo, parainom nin arak, katood nin mga publikano asin parakasala.’ Pero an totoo, an saiyang kadonongan sa paglilingkod sa Dios nagpatunay na sala an mga sahot na may ginigibo siang maraot. ‘An kadonongan napapatotoohan kan mga gibo kaiyan,’ an sabi ni Jesus. (Mat. 11:19) Totoo man iyan ngonyan. Halimbawa kaini an mga tugang na naglilingkod sa Bethel sa Selters, Alemania. An hiling sa sainda kan nagkapira sa kataraed ninda kakaiba sinda. Pero an alkalde duman idinepensa sinda: “An mga Saksing nagtatrabaho dian may sadiri man na pamumuhay, pero dai nakakadisturbo sa buhay kan ibang tawo sa komunidad.”

¹⁴ Dai pa sana nahahaloy, arog man kaiyan an nagin kongklusyon dapit sa mga Saksi ni Jehova sa Moscow, Russia. Dakol na salang gibo an isinahot sa sainda. Dangan kan Hunyo 2010, an European Court of Human Rights sa Strasbourg, Pransia, nagdesisyon: “Napatunayan kan Korte na bakong makatanosan an pag-olang [kan Moscow] sa deretso kan [mga Saksi] na talingkas na sumamba asin magtiripon. An mga korte [kan Russia] dai nakatao nin ‘angay asin supisyenteng’ ebidensia na an [mga Saksi]” nagkasala, na arog baga nin pagsuruwaysuway sa mga pamilya, pagsutsut na maghugot, o pagsayuma sa pagbolong. Sa siring, “an penalidad na pigpataw kan mga korte [kan Russia] sobra man na marhay huli sa estriktong mga ley kaiyan asin bakong kaoyon nin ano man na lehitimong kahagadan ninda.”

TAMANG PAGPASAKOP

15. Anong prinsipyo sa Biblia an sinusunod kan tunay na mga Kristiano sa bilog na kinaban?

¹⁵ Inootob kan mga Saksi ni Jehova sa Moscow—pati na sa bilog na kinaban—an saro pang kahagadan sa mga Kristiano na sinabi ni Pedro. Sia nagsurat: ‘Magpasakop kamo sa gabos na pagboot nin tawo dahil sa Kagurangnan; minsan sa hade, siring sa orog kahalangkaw; o sa mga gobernador.’ (1 Ped. 2:13, 14) Dawa ngani bakong kabtang kan maraot na kinaban, an tunay na mga Kristiano gikan sa boot na nagpapasakop sa mga autoridad sa gobyerno na nasa saindang relatibong mga kamugtakan, siring kan pagboot sa sainda ni Pablo.—Basahon an Roma 13:1, 5-7.

16, 17. (a) Ano an nagpapatunay na bako kitang kontra sa mga gobyerno? (b) Ano an inaadmitir kan nagkapirang lider sa politika?

¹⁶ Kun an mga Saksi ni Jehova minagawe bilang ‘temporaryong mga residente’ sa presenteng sistema, dai ninda iyan ginigibo bilang silensiong protesta sibil; ni nagkokontra o nakikiaram sinda sa politikal o sosyal na mga desisyon kan iba. Bakong arog nin ibang relihion, an mga Saksi ni Jehova dai nakikilabot sa politika. Nungka sindang nagpoprobar na magdikta nin mga palisiya sa mga autoridad sibil. Kaya daing basehan na isipon na poprobaran nindang magkawsa nin kariribokan sa publiko o magrebelde sa gobyerno!

¹⁷ Paagi sa pagsunod sa mga opisyal kan publiko kaoyon kan konseho ni Pedro na ‘tawan nin onra an hade,’ itinatao kan mga Kristiano an paggalang asin onra na maninigo sa posisyon kan mga opisyal na iyan. (1 Ped. 2:17, NW) Kun beses, inaadmitir kan mga opisyal na mayo talaga sindang dahilan na mamroblema sa mga Saksi ni Jehova. Halimbawa, an politikong Aleman na si Steffen Reiche, dating ministro kan gabinete sa estado nin Brandenburg asin kan huri nagin miembro kan parlamento kan Alemania, nagsabi: “An paggawe kan mga Saksi ni Jehova sa mga kampo asin presohan simbolo nin mga kualidad na kaipuhan kaidto sagkod ngonyan para magpadagos an demokratikong konstitusyonal na estado: iyan an saindang makusog na paninindogan kontra sa SS asin pagmalasakit sa mga kapwa preso. Huling nagdadakol an karingisan sa mga dayuhan saka sa mga tawo na iba an politikal o ideolohikong opinyon, an mga kualidad na ini kaipuhan kan lambang siudadano kan satong nasyon.”

PAGPAHILING NIN PAGKAMOOT

18. (a) Taano ta natural sana na mamotan niato an bilog na kasararoan nin mga tugang? (b) Ano an nagin komento nin nagkapira na bakong Saksi?

¹⁸ Si apostol Pedro nagsurat: “Mamoot kamo sa bilog na kasararoan nin mga tugang, matakot kamo sa Dios.” (1 Ped. 2:17, NW) An mga Saksi ni Jehova may tamang pagkatakot na mapaanggot an Dios, asin saro pa ining motibasyon sa sainda na gibohon an kabotan nia. Naoogma sindang paglingkodan si Jehova bilang kabtang nin pambilog na kinaban na kasararoan nin magturugang na may pararehong kamawotan. Kun siring, natural sana na ‘mamoot sinda sa bilog na kasararoan nin mga tugang.’ An siring na pagkamoot, na bihirang marhay sa makasadiring kinaban ngonyan, kun beses ikinakangalas nin mga bakong Saksi. Halimbawa, sarong tour guide nin sarong American travel agency an naghanga sa kapadangatan asin pag-asistir kan mga Saksi sa dayuhan na mga delegado sa internasyonal na kombension sa Alemania kan 2009. Sinabi nia na sa gabos na taon nin pagigin guide nia, dai pa lamang siang nahiling na arog kaiyan. Kan huri, saro sa mga Saksi an nagsabi: “Hangang-hanga asin ogmahon sia sa gabos na sinasabi nia dapit sato.” Sa kombension na naatenderan nindo, may nadangog na daw kamong arog kaiyan na reaksion nin mga nakaobserbar sa mga Saksi?

19. Ano an maninigong magin determinasyon niato, asin taano?

¹⁹ Sa gabos na paaging nasambitan—asin sa dakol pang iba—ipinapahiling kan mga Saksi ni Jehova na sinda talagang ‘temporaryong mga residente’ sa presenteng sistema ni Satanas. Asin naoogma sinda saka determinadong magdanay na siring. Makusog asin may masarig na basehan an paglaom ninda na sa dai na mahahaloy sinda magigin permanenteng residente kan matanos na bagong kinaban nin Dios. Bako daw na inaantisipar mo iyan?