SIMBAG SA MGA HAPOT SA BIBLIYA

Dinadangog daw nin Diyos an gabos na pamibi?

Dinadangog nin Diyos an mga tawo hali sa gabos na nasyon. (Salmo 145:18, 19) Ineenkaminar kita kan saiyang Tataramon, an Bibliya, na sabihon saiya an ano man na ikinakahadit ta. (Filipos 4:6, 7) Pero, may mga pamibi na dai nagugustuhan nin Diyos. Halimbawa, an pauruutrong tinuom na pamibi dai nakakapaugma saiya.—Basahon an Mateo 6:7.

Habo man ni Jehova an pamibi kan mga tawo na tuyong dai iniintindi an ley niya. (Talinhaga 28:9) Halimbawa, kan mga panahon kan Bibliya, dai dinangog nin Diyos an mga Israelita na nagkasala nin paggadan. Malinaw nanggad, may mga kahagadan na dapat tang abuton tanganing dangugon kita nin Diyos.—Basahon an Isaias 1:15.

Ano an dapat tang gibuhon tanganing dangugon kita nin Diyos?

Dai kita makakadulok sa Diyos sa pamibi kun mayo kitang pagtubod. (Santiago 1:5, 6) Dapat kumbinsido kitang siya nag-eeksister asin nagmamakulog sato. Mapapakusog ta an satong pagtubod paagi sa pag-adal kan Bibliya, huling an tunay na pagtubod basado sa ebidensiya asin sa mga garantiya na yaon sa Tataramon nin Diyos.—Basahon an Hebreo 11:1, 6.

Dapat na sinsero asin mapakumbaba kitang mamibi. Dawa an Aki nin Diyos, si Jesus, mapakumbaba kan siya namibi. (Lucas 22:41, 42) Kaya, imbes na sabihon sa Diyos kun ano an dapat gibuhon, pagmaigutan tang sabuton an mga kahagadan niya paagi sa pagbasa kan Bibliya. Dangan, makakapamibi kita sa Diyos kauyon kan kabutan niya.—Basahon an 1 Juan 5:14.