Paano Niyato Mapagdadanay an “Pagigin Mapaghalat”?

1. Taano ta tibaad magin kitang bakong mapasensiya?

KAN maestablisar an Mesiyanikong Kahadian kan 1914, nagpuon na an huring mga aldaw kan sistema ni Satanas. Bilang resulta kan ralaban sa langit, ihinulog ni Jesus sa palibot kan daga an Diyablo asin an mga demonyo. (Basahon an Kapahayagan 12:7-9.) Aram ni Satanas na ‘kadikit na sana an panahon’ niya. (Kap. 12:12) Minsan siring, ‘an panahon’ na iyan luminawig na nin dakul na dekada, asin tibaad iniisip nin iba na haluyon na iyan. Mantang hinahalat ta an paghiro ni Jehova, kita daw bilang indibidwal nagigin bakong mapasensiya?

2. Ano an pag-uulayan sa artikulong ini?

² Peligroso an pagigin bakong mapasensiya, huling puwede kitang magpabigla-bigla dahil diyan. Paano niyato mapagdadanay an pagigin mapaghalat? Makakatabang sa sato an artikulong ini na magibo iyan paagi sa pagsimbag kan minasunod na mga hapot. (1) Ano an manunudan ta sa halimbawa nin pagigin mapasensiya ni propeta Miqueas? (2) Anong mga pangyayari an magigin tanda kan katapusan kan satong paghalat? (3) Paano ta maipapahiling an pag-apresyar sa pagigin mapasensiya ni Jehova?

ANO AN MANUNUDAN TA SA HALIMBAWA NI MIQUEAS?

3. Kan panahon ni Miqueas, ano an kamugtakan sa Israel?

³ Nahiling kan propeta ni Jehova na si Miqueas an pagraot kan kamugtakan sa espirituwal kan Israel sagkod na iyan magin grabe karaot kan namamahala an maraot na hading si Achaz. (Miq. 7:2-6, NW) Iinagid ni Miqueas sa “katutunukan” asin “kudal na katutunukan” an bakong maimbod na mga Israelita. Kun paanong nalulugad an siisay man na naglalakaw sa katutunukan o minabalyo sa kudal na katutunukan, dinadanyaran kan maraot na mga Israelitang idto an siisay man na nakakaibanan ninda. Gruminabe nanggad an karatan kaya naraot pati an relasyon nin magkakapamilya. Huling aram ni Miqueas na siya mismo mayong magigibo para mabago an sitwasyon, biyo niyang ipinahayag ki Jehova an nasa puso niya. Dangan siya mapasensiyang naghalat sa paghiro nin Diyos. Nagtitiwala si Miqueas na mainterbenir si Jehova sa Saiyang itinalaan na panahon.

4. Anong mga kadipisilan an napapaatubang sa sato?

⁴ Arog ni Miqueas, dai ta malilikayan na makaibanan an mga tawong makasadiri. Dakul an ‘dai tataong magbalos, bakong banal, dai nin pagkamuot.’ (2 Tim. 3:2, 3) Namumundo kita pag sadiri sana an iniintindi kan satong mga katrabaho, kaeskuwela, asin kataid. Pero, may mga lingkod nin Diyos na mas dipisil pa ngani an inaagihan. Sinabi ni Jesus na an mga parasunod niya kokontrahon kan pamilya ninda, asin naggamit siya nin mga tataramon na kapareho kan nasa Miqueas 7:6 na naglaladawan kan magigin epekto kan mensahe niya. ‘Napadigdi ako sa pagpaiwal,’ an sabi ni Jesus, ‘sa tawo tumang sa saiyang ama, asin sa aking babayi tumang sa saiyang ina, asin an manugang na babayi tumang sa saiyang panugangan na babayi. Asin an mga kaiwal nin tawo iyo man sana an mga kairiba niya sa saiyang harong.’ (Mat. 10:35, 36) Masakit nanggad an pagtagal sa pagtuya asin pagkontra nin mga kapamilya na bako tang kapagtubod! Kun napapaatubang kita sa siring na pagbalo, dai kita magpadara sa panggigipit kan satong pamilya. Imbes, magdanay lugod kitang maimbod asin mapasensiyang maghalat ki Jehova na resolberan an mga bagay-bagay. Kun danay tang hahagadon an tabang niya, itatao niya sa sato an kusog asin kadunungan na kaipuhan para makatagal.

5, 6. Paano tinawan ni Jehova nin balos si Miqueas, pero ano an dai nahiling kaini?

⁵ Tinawan ni Jehova nin balos si Miqueas huli sa pagigin mapasensiya. Nahiling mismo ni Miqueas an katapusan kan buhay ni Hading Achaz asin kan maraot na pamamahala kaini. Nahiling niya an pagtukaw sa trono kan aki ni Achaz, an marahay na hading si Ezekias, asin kun paano kaini ibinalik an dalisay na pagsamba. Asin an mensahe nin paghukom ni Jehova sa Samaria paagi ki Miqueas nautob kan sakyadahon kan mga Asiriano an kahadian nin Israel sa amihanan.—Miq. 1:6.

⁶ Minsan siring, dai nahiling ni Miqueas an kautuban kan gabos na ipinasabong sa saiya ni Jehova na ihula. Halimbawa, isinurat ni Miqueas: ‘Sa mga huring panahon, an bukid kan harong ni Jehova gigibuhon na magin payo kan mga bukid, asin urog kalangkaw sa mga kalangkawan, asin mga banwaan an madaralagan diyan sa saiya. Asin madaratong an dakul na nasyon, asin masarabing, “Madya kamo, asin maturukad kita sa bukid ni Jehova.”’ (Miq. 4:1, 2) Nagadan si Miqueas haloy pa bago an kautuban kan hulang iyan. Dawa siring, determinado siyang magdanay na maimbod ki Jehova sagkod pa ngani sa kagadanan, ano man an gibuhon kan iba na nasa palibot niya. Mapadapit digdi, isinurat ni Miqueas: ‘An gabos na banwaan magraralakaw, an balang saro sa ngaran kan saindang diyos, asin kita maglalakaw sa ngaran ni Jehova na satuyang Diyos sagkod nuarin pa man.’ (Miq. 4:5) Mapasensiyang nakapaghalat si Miqueas durante kan makamumundong panahon huling lubos an pagtitiwala niya na uutubon ni Jehova an gabos na panuga. Nagtiwala ki Jehova an maimbod na propetang iyan.

7, 8. (a) Taano ta may dahilan kitang magtiwala ki Jehova? (b) Ano an gigibuhon ta tanganing mas madali sanang mag-agi an panahon?

⁷ Siring man daw an pagtitiwala ta ki Jehova? May marahay na dahilan kita sa siring na pagtitiwala. Nahihiling ta mismo an kautuban kan hula ni Miqueas. ‘Sa mga huring panahon’ na ini, minilyon hali sa gabos na nasyon asin tribo saka lengguwahe an nagtuturukad sa “bukid kan harong ni Jehova.” Dawa hali sa magkakalaban na nasyon, pinupulpog na kan mga nagsasambang ini an ‘saindang mga minasbad na magin daldag’ o tarom nin arado, asin habo na nindang ‘magpatuod [o mag-adal nin] pakilaban.’ (Miq. 4:3) Pribilehiyo ta nanggad na mapabilang sa matuninong na banwaan ni Jehova!

⁸ Natural sana na gusto tang tapuson na ni Jehova an maraot na sistemang ini. Pero, tanganing mapasensiya kitang makapaghalat, kaipuhan tang mansayon an mga bagay-bagay sigun sa pagmansay ni Jehova. May itinalaan siyang panahon para hukuman an katawuhan paagi sa ‘lalaki na itinalaga’ o ninombrahan niya, si Jesu-Cristo. (Gui. 17:31) Pero bago kaiyan, tinatawan nin Diyos nin oportunidad an gabos na klase nin tawo na magkaigwa nin tamang kaaraman o ‘pakasabot sa katotoohan,’ humiro kauyon kaiyan, asin maligtas. Mga buhay na mahalaga an nakataya. (Basahon an 1 Timoteo 2:3, 4.) Kun sibot kita sa pagtabang sa iba na magkaigwa nin tamang kaaraman dapit sa Diyos, mas madali sanang maagi an natatadang panahon bago an paghukom ni Jehova. Dai mahahaloy—bigla pa ngani—maabot na an katapusan. Pag nangyari na iyan, mauugma nanggad kita na nagdanay kitang sibot sa paghuhulit kan Kahadian!

ANONG MGA PANGYAYARI AN MAGIGIN TANDA KAN KATAPUSAN KAN SATONG PAGHALAT?

9-11. Nautob na daw an 1 Tesalonica 5:3? Ipaliwanag.

⁹ Basahon an 1 Tesalonica 5:1-3.a Dai na mahahaloy, masabi an mga nasyon nin “Katuninungan asin katiwasayan!” Kun habo tang madaya kan deklarasyon na ini, kaipuhan tang magdanay na ‘[mata] asin mayukod’ o tultol an pag-iisip. (1 Tes. 5:6) Tanganing matabangan kitang magdanay na mata sa espirituwal, repasuhon ta nin madali an mga pangyayari bago an mahalagang proklamasyon na ini.

¹⁰ Pagkatapos kan kada saro sa duwang giyera mundiyal, nagmawot na marhay nin katuninungan an mga nasyon. Pagkatapos kan inot na giyera mundiyal, inestablisar an Liga de Naciones sa paglaom na iyan an matao nin katuninungan. Paghaloy-haloy, pagkatapos kan ikaduwang giyera mundiyal, dakul an naglaom sa Naciones Unidas na iyo an matao kaiyan sa daga. Naglalaom an mga lider nin gobyerno asin relihiyon sa mga organisasyon na iyan na iyo an matao nin matuninong na kamugtakan para sa katawuhan. Halimbawa, kan 1986, idineklarar kan Naciones Unidas, na may dakulang publisidad, an taon na iyan bilang Internasyonal na Taon nin Katuninungan. Kan taon na iyan, dakul na lider nin mga nasyon asin relihiyon an uminiba sa namamayo kan Iglesya Katolika sa Assisi, Italia, tanganing mamibi para sa katuninungan.

¹¹ Minsan siring, bako an proklamasyon na iyan nin katuninungan asin katiwasayan o arin man na kapareho kaiyan an kautuban kan hula sa 1 Tesalonica 5:3. Taano? Huling dai pa nangyayari an ihinula na “biglang pagkalaglag.”

12. Ano an aram ta dapit sa deklarasyon nin “Katuninungan asin katiwasayan”?

¹² Siisay an magibo kan mahalagang deklarasyon na ini nin “Katuninungan asin katiwasayan” sa maabot na panahon? Ano an magigin papel kan mga lider nin Kakristiyanuhan asin kan iba pang relihiyon? Paano magigin kalabot sa proklamasyon na ini an mga lider kan manlain-lain na gobyerno? Dai sinasabi sa sato kan Kasuratan. An talagang aram niyato iyo na sa ano man na paagi gibuhon an proklamasyon na iyan o gurano man iyan kanakakakumbinsir pagdangugon, pagsagin-sagin sana iyan. An lumang sistemang ini magdadanay na kontrolado ni Satanas. Grabe an pagkalapa kaiyan asin magdadanay na siring. Makamumundo nanggad kun an siisay man sa sato maniniwala sa satanikong propaganda asin dai magdadanay na neutral bilang Kristiyano!

13. Taano ta pinupugulan kan mga anghel an mapanglaglag na mga duros?

¹³ Basahon an Kapahayagan 7:1-4. Mantang hinahalat ta an kautuban kan 1 Tesalonica 5:3, pinupugulan kan makapangyarihan na mga anghel an mapanglaglag na mga duros kan dakulang kahurasaan. Ano an hinahalat ninda? Ilinadawan ni apostol Juan an sarong mahalagang pangyayari—an pangultimong pagtatak sa linahidan na ‘mga uripon nin satong Diyos.’b Pag natapos na an pangultimong pagtatak na iyan, bubutasan kan mga anghel an mga duros nin kalaglagan. Ano an sunod na mangyayari?

14. Ano an senyales na harani na an kalaglagan kan Dakulang Babilonya?

¹⁴ Maabot sa Dakulang Babilonya, an pambilog na kinaban na imperyo nin palsong relihiyon, an katapusan na maninigo sa saiya. An ‘mga banwaan, asin mga kadaklan, asin mga nasyon, patin mga tataramon’ dai nanggad makakatabang sa saiya. Nahihiling ta na an senyales na harani na an kalaglagan niya. (Kap. 16:12; 17:15-18; 18:7, 8, 21) Sa katunayan, an kawaran nin suporta hayag na sa media, na nag-uurog an pag-atake sa relihiyon asin mga lider kaiyan. Dawa siring, para sa mga lider kan Dakulang Babilonya, dai talaga sinda namemeligro. Sala nanggad sinda! Kasunod kan proklamasyon nin “Katuninungan asin katiwasayan!,” biglang mabirik sa palsong relihiyon an pulitikal na mga elemento kan sistema ni Satanas asin paparaon iyan. Nungka nang mahihiling giraray an Dakulang Babilonya! Sigurado na bakong sayang an mapasensiyang paghalat sa mahahalagang pangyayaring iyan.—Kap. 18:8, 10.

PAANO TA MAIPAPAHILING AN PAG-APRESYAR SA PAGIGIN MAPASENSIYA NIN DIYOS?

15. Taano ta dai nagpapabigla-bigla si Jehova?

¹⁵ Sa ibong kan katuyawan na ginibo nin mga tawo sa pangaran ni Jehova, siya mapasensiyang naghahalat sa tamang panahon para humiro. Habo ni Jehova na malaglag an siisay man na sadiyosan an puso. (2 Ped. 3:9, 10) Arog man daw kaiyan an sabuot ta? Bago umabot an aldaw ni Jehova, puwede tang ipahiling an pag-apresyar sa saiyang pagigin mapasensiya sa minasunod na mga paagi.

16, 17. (a) Taano ta maninigo tang mawuton na tabangan an mga nagin inaktibo? (b) Taano ta importanteng marhay na bumalik na ki Jehova an mga inaktibo?

¹⁶ Tabangan an mga nagin inaktibo. Sinabi ni Jesus na igwa nin kagayagayahan sa langit kun makua dawa an sarong nawawarang karnero. (Mat. 18:14; Luc. 15:3-7) Malinaw na nagmamakulog na marhay si Jehova sa gabos na nagpahayag nin pagkamuot sa saiyang pangaran, dawa kun bako sindang aktibo sa paglilingkod sa saiya ngunyan. Kun tinatabangan ta sindang makabalik sa kongregasyon, napapagaya-gaya ta si Jehova asin an mga anghel.

¹⁷ Saro ka daw sa mga bakong aktibo sa paglilingkod sa Diyos ngunyan? Tibaad nakulgan ka nin sarong kakongregasyon kaya nagpundo ka sa pakikiasosyar sa organisasyon ni Jehova. Huling tibaad nag-agi na an panahon, haputon an saimong sadiri: ‘Mas makahulugan daw asin mas maugma an buhay ko ngunyan? Si Jehova daw an nakakulog sa sako, o sarong bakong perpektong tawo? May ginibo na daw si Jehova Diyos na nakakulog sako?’ An totoo, pirming marahay an ginigibo niya para sa sato. Dawa kun dai kita namumuhay uyon sa pagdusay ta sa saiya, itinutugot niya na makamtan ta an marahay na mga bagay na itinatao niya. (Sant. 1:16, 17) Dai mahahaloy, maabot na an aldaw ni Jehova. Ngunyan na an panahon na bumalik sa mamumuton na pangangataman kan satong langitnon na Ama asin sa kongregasyon—an solamenteng ligtas na lugar sa huring mga aldaw na ini.—Deut. 33:27; Heb. 10:24, 25.

18. Taano ta maninigo tang suportaran an mga nanginginot?

¹⁸ Maimbod na suportaran an mga nanginginot. Bilang mamumuton na Pastor, ginigiyahan asin pinoprotektaran kita ni Jehova. Ninombrahan niya an saiyang Aki bilang Puon na Pastor kan aripumpon. (1 Ped. 5:4) Pinapasturan kan mga elder sa labing 100,000 kongregasyon an mga karnero nin Diyos bilang mga indibidwal. (Gui. 20:28) Kun maimbod tang sinusuportaran an mga ninombrahan na manginot, ipinapahiling ta an pag-apresyar ki Jehova asin ki Jesus huli sa gabos na ginigibo ninda para sa sato.

19. Paano kita magigin dayupot sa lambang saro?

¹⁹ Magin dayupot sa lambang saro. Ano an buot sabihon kaiyan? Kun sinasalakay nin mga kaiwal an sarong sinanay na marhay na hukbo, nagtataraid an mga ini. Sa siring, minagibo sinda nin matibay na depensa. Urog pang sinasalakay ni Satanas an banwaan nin Diyos. Bako ini an panahon na makiiwal sa satong mga tugang. Ngunyan na an panahon na kita dumayupot sa lambang saro, palampason an mga kaluyahan nin iba, asin magtiwala sa panginginot ni Jehova.

20. Ano an maninigong gibuhon ta ngunyan?

²⁰ Gabos lugod kita magdanay na alerto sa espirituwal asin magpahiling nin pagigin mapaghalat. Mapasensiya tang halaton an proklamasyon nin “Katuninungan asin katiwasayan!” saka an pangultimong pagtatak sa mga pinili. Pagkatapos kaiyan, bubutasan kan apat na anghel an mapanglaglag na mga duros, dangan lalaglagon an Dakulang Babilonya. Mantang hinahalat ta an mahahalagang marhay na pangyayaring ini, sunudon niyato an paggiya kan mga ninombrahan na manginot sa organisasyon ni Jehova. Magkasararo kita tumang sa Diyablo asin mga demonyo! Ngunyan na an panahon tanganing sunudon an sadol kan salmista: “Magin makusog an buot nindo, asin magin lugod marigon an saindong puso, kamo gabos na naghahalat ki Jehova.”—Sal. 31:24.