Simbag sa mga Hapot sa Bibliya
Ano an katuyuhan kan pagbalik ni Cristo?
Bago magsakat si Jesu-Cristo sa langit kan 33 C.E., nangako siya na mabalik siya. Ikinumparar niya an saiyang sadiri sa sarong tawo hali sa respetadong pamilya na huminali nin haloy na panahon dangan buminalik na may kapangyarihan na mamahala bilang hadi. An katuyuhan kan pagbalik ni Jesus iyo na magtao nin marahay na klase nin gobyerno sa katawuhan.—Basahon an Lucas 19:11, 12.
Marahay na klase nin gobyerno an itatao ni Jesus sa katawuhan
Anong klase an hawak ni Cristo pagbalik niya? Binuhay siya liwat bilang sarong dai nahihiling na espiritung persona. (1 Pedro 3:18) Nagsakat siya sa langit tapos nagtukaw sa tuo nin Diyos. (Salmo 110:1) Pag-abot nin panahon, uminatubang si Jesus sa Diyos na Jehova, ‘an Suanoy kan mga Aldaw,’ na nagtao ki Jesus nin kapangyarihan na maghadi sa katawuhan. Kaya mabalik si Jesus, bako bilang tawo, kundi bilang sarong dai nahihiling na Hadi.—Basahon an Daniel 7:13, 14.
Ano an gigibuhon ni Jesus pagbalik niya?
Sa dai mahihiling na pagbalik ni Jesus kaiba kan saiyang mga anghel, huhukuman niya an katawuhan. Lalaglagon niya an maraot na mga tawo pero tatawan niya nin buhay na daing katapusan an mga nag-aako sa saiya bilang Hadi.—Basahon an Mateo 25:31-33; Talinhaga 2:22.
Sa pamamahala ni Jesus bilang Hadi, gigibuhon niyang paraiso an daga. Bubuhayon niya an mga gadan tanganing maugma sindang mabuhay sa Paraiso digdi sa daga.—Basahon an Salmo 37:29; Juan 11:25.