An Huring Kaiwal, an Kagadanan, Paparaon

1, 2. Ano an kamugtakan ni Adan asin Eva kan lalangon sinda, asin anong mga hapot an minalataw?

KAN lalangon si Adan asin Eva, mayo lamang sindang mga kaiwal. Perpekto sindang mga tawo na nakaistar sa sarong paraiso. May dayupot sindang relasyon sa saindang Kaglalang bilang saiyang mga aki. (Gen. 2:7-9; Luc. 3:38) Ipinapahiling kan mismong asignasyon na itinao sa sainda nin Diyos kun gurano kalawig an magigin buhay ninda. (Basahon an Genesis 1:28.) An pagbuot na ‘[panuon nin] tawo an daga asin sakupon iyan’ maisasagibo sa sarong partikular na lawig nin panahon. Pero, tanganing padagos nindang magin sakop o ‘rugaring an gabos na hayop na naghihiro sa ibabaw nin daga,’ kaipuhan na mabuhay nin daing sagkod si Adan asin Eva. Nungkang matatapos an pangangataman ni Adan huling dai siya magagadan.

² Pero taano ta ibang marhay an kamugtakan ngunyan? Paano nagkaigwa nin kadakul na kaiwal—an pinakapanginot kaiyan iyo an kagadanan—na nakakaulang sa kaugmahan nin tawo? Ano an gigibuhon nin Diyos tanganing paraon an mga kaiwal na ini? Yaon sa Bibliya an simbag sa mga hapot na ini, asin sisiyasaton ta an mga iyan ngunyan.

SARONG MAMUMUTON NA PATANID

3, 4. (a) Anong pagbuot an itinao nin Diyos ki Adan asin Eva? (b) Gurano kahalaga an pagsunod sa pagbuot na iyan?

³ Minsan ngani may paglaom sindang mabuhay sagkod lamang, bakong imortal si Adan asin Eva. Tanganing padagos na mabuhay, kaipuhan nindang maghangos, mag-inom, magturog, asin magkakan. An mas mahalaga, nakadepende an buhay ninda sa relasyon ninda ki Jehova, an Kagtao nin Buhay. (Deut. 8:3) Mahalagang marhay na akuon ninda an paggiya nin Diyos tanganing padagos sindang mabuhay. Lininaw ini ni Jehova ki Adan bago pa man lalangon si Eva. Paano? ‘Pinagbutan ni Jehova Diyos an tawo, na sinabihan: “Kumakan ka sa arin man na kahoy sa tatamnan. Alagad an kahoy nin pakamidbid kan karahayan asin karatan, dai ka magkakan, huli ta sa aldaw na kumakan ka kaiyan magagadan ka.”’—Gen. 2:16, 17.

⁴ ‘An kahoy nin pakamidbid kan karahayan asin karatan’ nagrerepresentar sa deretso nin Diyos na iyo sana an magdeterminar kun ano an marahay asin maraot. Siyempre, may kakayahan na si Adan na maaraman kun ano an marahay asin maraot; linalang siya sa ladawan nin Diyos asin igwa siyang konsiyensiya. An kahoy magseserbing pagirumdom ki Adan asin Eva na pirmi nindang kaipuhan an paggiya ni Jehova. Kun makakan sinda kan bunga kan kahoy, mangangahulugan iyan na habo nindang magpagiya sa Diyos asin magdadara iyan nin grabeng danyos sa sainda asin sa mga magigin aki ninda. Ipinapahiling kan pagbuot nin Diyos asin kan penalidad kaiyan kun gurano kaseryoso an pagsuway diyan.

KUN PAANO NAKALAOG AN KAGADANAN SA PAMILYA NIN TAWO

5. Paano nadara si Adan asin Eva na sumuway sa Diyos?

⁵ Pagkatapos lalangon si Eva, sinabi sa saiya ni Adan an pagbuot nin Diyos. Kabisadong-kabisado iyan ni Eva ta haros eksakto niyang nautro iyan. (Gen. 3:1-3) Nasabi niya iyan sa saro na nakipag-ulay sa saiya paagi sa halas, na sarong tusong linalang. An nasa likod kan halas iyo si Satanas na Diyablo, sarong espiritung aki nin Diyos na tinugutan an saiyang sadiri na magkusog an pagmawot sa kapangyarihan asin magin independiyente sa Diyos. (Ikumparar an Santiago 1:14, 15.) Tanganing magibo an maraot niyang katuyuhan, inakusaran niya an Diyos nin pagputik. Sinabi niya ki Eva na kun magigin independiyente ini sa Diyos dai ini magagadan kundi magigin arog nin Diyos. (Gen. 3:4, 5) Nagtubod si Eva sa saiya; ipinahiling an pagigin independiyente niya paagi sa pagkakan kan bunga, asin kinumbinsir si Adan na magkakan man kaiyan. (Gen. 3:6, 17) Nagputik an Diyablo. (Basahon an 1 Timoteo 2:14.) Aram ni Adan na sala idto pero dinangog niya pa man giraray an ‘tingog kan saiyang agom.’ Dawa garo baga sarong katuod an halas, an totoo si Satanas na Diyablo sarong maringis na kaiwal, asin aram niyang nakakagadan an kaputikan na sinabi niya ki Eva.

6, 7. Paano sinentensiyahan ni Jehova an mga nagkasala?

⁶ Huli sa makasadiring mga kamawutan ni Adan asin Eva, pareho sindang nagrebelde sa Saro na nagtao sa sainda nin buhay asin kan gabos na igwa sinda. Siyempre, aram ni Jehova an gabos na nangyari. (1 Cron. 28:9; basahon an Talinhaga 15:3.) Tinugutan niya an tulong indibidwal na idto na ipahiling an talagang sabuot ninda sa saiya. Bilang sarong Ama, siyertong nakulgan na marhay si Jehova. (Ikumparar an Genesis 6:6.) Pero kaipuhan niyang humiro bilang Hukom tanganing panindugan asin isagibo an sinabi niyang mga konsekwensiya.

⁷ Sinabi nin Diyos ki Adan: ‘Sa aldaw na kumakan ka [sa kahoy nin pakamidbid kan karahayan asin karatan] magagadan ka.’ Tibaad inisip ni Adan na an ‘aldaw’ na iyan may lawig na 24 oras. Pagkatapos niyang balgahon an pagbuot nin Diyos, tibaad linalauman niyang gagadanon siya ni Jehova bago magsulnop an aldaw. “Kaidtong maduros na oras kan aldaw,” kinaulay ni Jehova an mag-agom. (Gen. 3:8, NW) Garo man sana binista niya sinda, na dinadangog an lado ni Adan asin Eva. (Gen. 3:9-13) Dangan sinentensiyahan niya an mga nagkasala. (Gen. 3:14-19) Kun ginadan niya sinda sa mismong oras na iyan, dai mauutob an katuyuhan niya para ki Adan asin Eva saka sa mga aki ninda. (Isa. 55:11) Dawa sinentensiyahan niya sindang magadan asin nagpuon tulos an epekto kan kasalan, tinugutan niya si Adan asin Eva na magkaigwa nin mga aki na puwedeng makinabang sa iba pang mga probisyon na itatao Niya. Sa punto de vista nin Diyos, talagang nagadan si Adan asin Eva kan ‘aldaw’ na magkasala sinda huling an 1,000 taon garo sarong aldaw sana ki Jehova.—2 Ped. 3:8.

8, 9. Paano nakaapektar sa mga aki ni Adan an saiyang pagkakasala? (Hilingon an ritrato sa kapinunan kan artikulo.)

⁸ Maaapektaran daw an mga aki ni Adan asin Eva kan ginibo kan saindang mga magurang? Iyo. Ipinaliwanag kan Roma 5:12: ‘Huli sa sarong tawo an kasalan luminaog sa kinaban asin an kagadanan huli sa kasalan, asin sa siring an kagadanan luminakop sa gabos na tawo huli ta an gabos nagkasala.’ An inot na nagadan iyo an maimbod na si Abel. (Gen. 4:8) Dangan an iba pang mga aki ni Adan naggurang asin nagadan. Namana daw ninda an kasalan saka an kagadanan? Nagsimbag si apostol Pablo: ‘Huli kan pagsuhay kan saro an dakul nagin parakasala.’ (Roma 5:19) An kasalan asin kagadanan na namana ki Adan nagin daing hirak na mga kaiwal kan katawuhan, na dai madudulagan nin mga tawong bakong perpekto. Dai ta eksaktong masasabi kun paano naipasa ni Adan an makamumundong pamanang ini sa mismong mga aki niya sagkod sa gabos na nagin gikan niya, pero talagang naipasa niya iyan.

⁹ Tamang-tama nanggad an pagkakaapod kan Bibliya sa kasalan asin kagadanan bilang ‘an tahob na nakakatahob sa gabos na banwaan asin an tahob na nabibiklad sa gabos na nasyon.’ (Isa. 25:7) Dai nin makakadulag sa kasalan asin kagadanan ta iyan garo tahob na nakakapuot sa bilog na katawuhan. Kaya sinasabi kan Bibliya na ‘ki Adan an gabos nagagadan.’ (1 Cor. 15:22) Kaya natural sanang ihapot an arog kan ipinahayag ni Pablo: “Siisay an maligtas sa sako hali sa hawak na nag-aagi sa kagadanan na ini?” Igwa daw nin siisay man na makakagibo kaiyan?a—Roma 7:24, NW.

PAPARAON AN KASALAN ASIN KAGADANAN NA MINANA KI ADAN

10. (a) Ano an nagkapirang teksto sa Bibliya na nagpapahiling na paparaon ni Jehova an kagadanan na minana ki Adan? (b) Ano an itinutukdo kan mga tekstong ini manungod ki Jehova asin sa saiyang Aki?

¹⁰ Iyo, si Jehova an makakapagligtas ki Pablo. Pagkasambit ni Isaias kan “tahob,” siya nagsurat: ‘Hahalunon niya an kagadanan [sagkod lamang], asin papahidon kan Kagurangnan [na Jehova] an gabos na luha kan gabos na lalawgon.’ (Isa. 25:8) Arog nin sarong ama na hinahali an kawsa kan pagdusa kan saiyang mga aki asin pinapahid an saindang luha, gustong-gusto ni Jehova na paraon an kagadanan na minana ki Adan! May katabang siya sa paggibo kaini. Sinasabi sa 1 Corinto 15:22: ‘Siring na diyan ki Adan an gabos nagagadan, siring man diyan ki Cristo an gabos bubuhayon.’ Kaagid kaiyan, pagkahapot ni Pablo nin “Siisay an maligtas sa sako?” sinabi niya: ‘Nagpapasalamat ako sa Diyos huli ki Jesu-Cristo na satong Kagurangnan!’ (Roma 7:25) Malinaw nanggad, dai naglipot an pagkamuot na nagpahiro ki Jehova na lalangon an tawo sa ibong kan pagrebelde ni Adan asin Eva. Asin dai man nawara an pagkaugma sa mga tawo kan saro na kaiba ni Jehova sa paglalang kan inot na mag-agom. (Tal. 8:30, 31) Pero paano isasagibo an pagligtas na ini?

11. Anong probisyon an itinao ni Jehova tanganing tabangan an katawuhan?

¹¹ An pagkabakong perpekto nin tawo asin an kagadanan parehong bunga kan pagkakasala ni Adan asin kan matanos na paghukom ni Jehova. (Roma 5:12, 16) Mababasa ta: “Paagi sa sarong paglapas an bunga sa gabos na tawo iyo an pagkakondenar.” (Roma 5:18, NW) Paano hahalion ni Jehova an saiyang pagkondenar na dai binabaliwala an saiya mismong mga pamantayan? Mahihiling ta an simbag sa sinabi ni Jesus: ‘An Aki nin tawo napadigdi tanganing magtao kan saiyang buhay sa pagtubos sa [dakul].’ (Mat. 20:28) Lininaw kan inot na espiritung aki ni Jehova, na namundag sa daga bilang perpektong tawo, na siya an magigin pantubos. Paano mapapaniguan an hustisya paagi kan pantubos?—1 Tim. 2:5, 6.

12. Ano an katimbang na pantubos na nakapanigo sa hustisya ni Jehova?

¹² Bilang perpektong tawo, puwedeng mabuhay si Jesus nin sagkod lamang, arog ni Adan bago ini magkasala. An katuyuhan ni Jehova iyo na panuon an daga nin perpektong mga aki ni Adan. Huli sa hararom na pagkamuot ni Jesus sa saiyang Ama asin sa mga aki ni Adan, itinao niyang atang an saiyang buhay bilang tawo. Iyo, itinao ni Jesus an sarong perpektong buhay bilang tawo na katimbang kan naiwara ni Adan. Pagkatapos, binuhay liwat ni Jehova an saiyang Aki bilang espiritu. (1 Ped. 3:18) Huling napaniguan kaiyan an hustisya ni Jehova, inako niya an atang kan perpektong tawong si Jesus bilang pantubos, o pambayad, tanganing tubuson an pamilya ni Adan asin maibalik an buhay na daing sagkod na naiwara ni Adan. Garo man sana si Jesus an nagin karibay ni Adan. Nagpaliwanag si Pablo: ‘Siring man nasusurat: “An inot na tawong si Adan nagin buháy na kalag.” An huring Adan nagin espiritung nagtatao nin buhay.’—1 Cor. 15:45.

13. Paano mahiro ‘an huring Adan’ tanganing tabangan an mga nagadan?

¹³ Bilang “espiritung nagtatao nin buhay,” madali nang humiro ‘an huring Adan’ tanganing tawan nin buhay na daing sagkod an mga gikan ni Adan. Kabilang diyan an kadaklan sa mga nagadan kaidto. Bubuhayon sinda liwat digdi sa daga.—Juan 5:28, 29.

14. Anong probisyon hali ki Jehova an matabang na mahali an pagkabakong perpekto na ipinamana ni Adan sa saiyang mga aki?

¹⁴ Paano makakatalingkas an katawuhan sa minana nindang pagkabakong perpekto? Nagtao si Jehova nin sarong gobyernong Kahadian na kompuwesto kan ‘huring Adan’ asin kan mga kairibang pinili hali sa katawuhan. (Basahon an Kapahayagan 5:9, 10.) An kairibang idto ni Jesus sa langit dating mga tawong bakong perpekto. Sa laog nin sangribong taon, an katawuhan tatabangan ni Jesus asin kan kairiba niyang namamahala na madaog an pagkabakong perpekto na dai kayang gibuhon kan mga tawo kun sinda sana.—Kap. 20:6.

15, 16. (a) Anong kagadanan na “huring kaiwal” an sa katapos-tapusi paparaon, asin nuarin iyan mangyayari? (b) Uyon sa 1 Corinto 15:28, ano an gigibuhon ni Jesus sa maabot na panahon?

¹⁵ Sa katapusan kan sangribong taon na pamamahala kan Kahadian, nakatalingkas na an makinuyog na mga tawo sa gabos na kaiwal na ibinunga kan pagigin bakong makinuyog ni Adan. An Bibliya nagsasabi: ‘Siring na diyan ki Adan an gabos nagagadan, siring man diyan ki Cristo an gabos bubuhayon. Alagad an gabos siring sa saindang pagkasurunod-sunod: si Cristo an tinagba [“inot na bunga,” NW], dangan an mga ki Cristo [an kairiba niyang namamahala] sa pagdatong niya. Dangan, an katapusan, sa pagtao niya kan Kahadian sa Diyos na Ama, kun mapara na niya an gabos na pagsakop asin an gabos na kapangyarihan asin kabagsikan. Huli ta kaipuhan na siya maghadi sagkod na ikabugtak niya an gabos niyang kaiwal sa irarom nin saiyang mga bitis. An huring kaiwal na paparaon iyo an kagadanan.’ (1 Cor. 15:22-26) Iyo, an kagadanan na minana ki Adan sa katapos-tapusi paparaon na. ‘An tahob’ na nakakatahob sa bilog na pamilya nin tawo hahalion sagkod lamang.—Isa. 25:7, 8.

¹⁶ Tinapos ni apostol Pablo an ipinasabong na sumaryo paagi sa arog kaining mga tataramon: ‘Kun an gabos na bagay ipinasakop na sa saiya, dangan an Aki man mapasakop sa puminasakop sa saiya kan gabos na bagay, tanganing an Diyos magin gabos sa gabos.’ (1 Cor. 15:28) Sa panahon na iyan, natapos na an katuyuhan kan pamamahala kan Aki. Dangan, may kaugmahan niyang ibabalik an saiyang awtoridad ki Jehova asin ipepresentar sa Saiya an perpekto nang pamilya nin tawo.

17. Ano an pinakahuring gigibuhon ki Satanas?

¹⁷ Ano an mangyayari ki Satanas, an inot na pinaghalian kan gabos na kasakitan kan katawuhan? Sinisimbag iyan kan Kapahayagan 20:7-15. Sa pangultimong pagbalo sa gabos na perpektong tawo, tutugutan si Satanas na purbaran sindang ilagalag. An Diyablo asin an mga masurunod sa saiya permanenteng lalaglagon sa ‘ikaduwang kagadanan.’ (Kap. 21:8) An ‘ikaduwang kagadanan’ dai paparaon huling dai na mabubuhay giraray an magkakagaradan sa kagadanan na ini. Pero, an ‘ikaduwang kagadanan’ bakong kaiwal kan mga tawong namumuot asin naglilingkod sa saindang Kaglalang.

18. Paano mauutob an asignasyon na itinao nin Diyos ki Adan?

¹⁸ Dangan, an perpekto nang katawuhan matindog sa atubangan ni Jehova bilang lubos na inuyunan para sa buhay na daing katapusan, na mayo na nin mga kaiwal. An asignasyon na itinao ki Adan mauutob na mayo siya. Mapapano an bilog na daga kan saiyang mga aki, na lubos na mauugmang pangatamanan iyan asin an manlain-lain na buháy na linalang na yaon diyan. Lugod na dai nuarin man mawara an satong pagpapahalaga sa mamumuton na ginibo ni Jehova tanganing mapara an huring kaiwal, an kagadanan!