Igwa Daw nin Paglaom an mga Gadan?

Mabubuhay pa daw an mga gadan?

AN SIMBAG KAN BIBLIYA: ‘An oras madatong na an gabos na nasa lulubngan makakadangog kan tingog ni Jesus asin maruluwas.’​—Juan 5:28, 29.

Kaya ihinula ni Jesus na maabot an panahon, sa pamamahala kan saiyang Kahadian, mawawaran nin laog an Lulubngan. “Ngalason ako kan primero kong mabasa an Juan 5:28, 29,” an nagigirumduman ni Fernando na nasambit sa inot na artikulo. “Nagtao iyan sako nin tunay na paglaom, asin nagin positibo na an kaisipan ko dapit sa maabot na panahon.”

Inaasahan kaidto kan maimbod na tawong si Job na pag nagadan siya, maabot an panahon na bubuhayon siya nin Diyos. Naghapot si Job: ‘Kun an tawo magadan, mabubuhay pa daw siya?’ Dangan may pagtitiwala siyang nagsimbag na mahalat siya sa Lulubngan sagkod na buhayon siya. Sabi niya: “Maapod ka, asin ako masimbag sa saimo.”​—Job 14:14, 15.

An pagkabuhay liwat bako nang bago ki Marta na tugang ni Lazaro. Pagkagadan ni Lazaro, sinabi saiya ni Jesus: “An saimong tugang mabubuhay liwat.” Nagsimbag si Marta: ‘Aram ko na siya mabubuhay liwat sa huring aldaw.’ Dangan sinabi sa saiya ni Jesus: ‘Ako iyo an pagkabuhay liwat asin an buhay. An minatubod sa sako, minsan magadan mabubuhay.’ (Juan 11:23-25) Dangan, tulos na binuhay ni Jesus si Lazaro! An nakakaugmang salaysay na iyan nagtatao sa sato nin dikit na patanaw kan mas dakulang mga pangyayari sa maabot na panahon. Imahinara na sana na nangyayari sa bilog na kinaban an siring na pagbuhay liwat!

May mga bubuhayon daw pasiring sa langit?

AN SIMBAG KAN BIBLIYA: Ipinapahiling kan Tataramon nin Diyos na an pagkabuhay liwat ni Jesus ibang-iba sa walong pagkabuhay liwat na mababasa sa Bibliya. An walong idto nabuhay liwat digdi sa daga. Pero dapit sa pagkabuhay liwat ni Jesus, mababasa ta: ‘Si Jesu-Cristo nasa tuo nin Diyos, huling siya nagpalangit na.’ (1 Pedro 3:21, 22) Si Jesus sana daw an bubuhayon liwat pasiring sa langit? Sinabihan kaidto ni Jesus an saiyang mga apostol: ‘Kun ako magduman asin mag-andam saindo nin lugar, ako madigdi liwat asin iiiba ko kamo, tanganing kun sain ako, duman man kamo.’​—Juan 14:3.

Si Cristo nagpalangit asin nag-andam para sa pag-abot kan nagkapirang disipulo niya. Pag-abot nin panahon, an mga bubuhayon pasiring sa langit maabot sa bilang na 144,000. (Kapahayagan 14:1, 3) Pero ano an gigibuhon duman kan dayupot na mga parasunod ni Jesus?

Sinda magigin sibot na marhay! Sinasabi sa sato kan Kasuratan: ‘Paladan asin banal an igwa nin kabtang sa inot na pagkabuhay liwat; sa sainda an ikaduwang kagadanan dai na nin kapangyarihan, kundi sinda magigin mga saserdote nin Diyos asin ni Cristo, patin maghahadi sa kaibahan niya sa laog nin sangribong taon.’ (Kapahayagan 20:6) An mga bubuhayon liwat pasiring sa langit mamamahala bilang mga hadi asin saserdote kaiba ni Cristo sa bilog na daga.

Sairisay an sunod na bubuhayon?

AN SIMBAG KAN BIBLIYA: Yaon sa ipinasabong na Kasuratan an mga tataramon na ini ni apostol Pablo: ‘Ako may paglaom sa Diyos na pinaghahalat man kan mga ini, na magkakaigwa nin pagkabuhay liwat an mga matanos asin bakong matanos.’​—Guibo 24:15.

Sairisay an kaiba sa sinambit ni Pablo na ‘mga matanos’? Magkua kita nin halimbawa. Kan madali nang magadan an maimbod na si Daniel, sinabihan siya: ‘Magagadan ka, alagad mabangon ka tanganing akuon an balos sa katapusan kan panahon.’ (Daniel 12:13, BPV)a Sain mabangon si Daniel hali sa pagkakaturog sa kagadanan? ‘Masasadirihan kan mga matanos an daga asin mag-iirok sinda diyan sagkod lamang.’ (Salmo 37:29, BPV) Ihinula man ni Jesus: “Paladan an mga mahuyo, huli ta sinda an magmamana kan daga.” (Mateo 5:5, BPV) Si Daniel asin an iba pang maimbod na mga lalaki saka babayi bubuhayon liwat tanganing mag-istar giraray digdi sa daga, nin daing sagkod pa ngani.

Sairisay an kaiba sa sinambit ni Pablo na ‘mga bakong matanos’? Sinda an binilyon na tawong nagadan, na an dakul dai lamang nagkaigwa nin oportunidad na masabutan asin maiaplikar an itinutukdo kan Bibliya. Pag binuhay na sinda, mamimidbid asin mapapahalagahan ninda si Jehovab asin si Jesus. (Juan 17:3) An gabos na nagdesisyon na maglingkod sa Diyos magkakaigwa nin oportunidad na mabuhay sagkod na nabubuhay si Jehova​—daing katapusan.

Ano an magigin kamugtakan sa daga?

AN SIMBAG KAN BIBLIYA: ‘Papahidon nin Diyos an gabos na luha sa saindang mga mata, an kagadanan madadai na, asin dai na magkakaigwa nin pagmundo ni pagtangis ni kulog.’ (Kapahayagan 21:4) ‘Mapatindog sinda nin mga harong, asin mag-uuruntok sinda diyan; magiribo sinda nin mga ubasan asin kakakanon an mga bunga kaiyan.’​—Isaias 65:21.

Imahinara na nabubuhay ka sa arog kaiyan na kamugtakan kaiba an mga namumutan mo na binuhay liwat! Pero an hapot, Paano ka makakasiguro na magkakaigwa nin pagkabuhay liwat?