Naikumparar Mo Na Daw an Tinutubod Mo sa Itinutukdo kan Bibliya?

IBINIBILANG mo daw an sadiri mo na Kristiyano? Kun iyo, kabilang ka sa labing duwang bilyon na tawo sa kinaban—haros 1 sa kada 3—na nagsasabing parasunod sinda ni Cristo. Ngunyan, may rinibong denominasyon na nagsasabing Kristiyano sinda, pero magkakakontra asin magkakaiba an saindang mga doktrina asin tinutubod. Kaya tibaad ibang-iba an tinutubod mo sa ibang inaapod man na Kristiyano. Mahalaga daw talaga kun ano an tinutubod mo? Iyo nanggad—kun gusto mong isabuhay an Kristiyanismong itinutukdo mismo kan Bibliya.

An inot na mga parasunod ni Jesu-Cristo namidbid bilang ‘mga Kristiyano.’ (Guibo 11:26) Saro sana an Kristiyanong relihiyon kaidto kaya mayo nang ibang apod sainda. Nagkakasararong sinusunod ninda an katukduan asin mga instruksiyon kan Kagpundar kan Kristiyanismo, si Jesu-Cristo. Arog man daw kaiyan sa relihiyon nindo? Itinutukdo daw kaiyan an mga itinukdo ni Cristo asin an mga pinaniwalaan kan inot na mga parasunod ni Cristo? Paano mo iyan masisigurado? Saro sana an paagi—gamiton an Bibliya bilang basehan.

Pag-isipan ini: Dakula an paggalang ni Jesu-Cristo sa Bibliya huling Tataramon iyan nin Diyos. Kontra siya sa mga tawong mas pinapahalagahan an tradisyon nin tawo imbes na an mga katukduan sa Bibliya. (Marcos 7:9-13) Kaya tama sanang sabihon niyato na sa Bibliya dapat nakabasar an tinutubod kan tunay na mga parasunod ni Jesus. Marahay na haputon nin lambang Kristiyano an saindang sadiri, ‘Kauyon daw kan Bibliya an itinutukdo sa samong relihiyon?’ Para masimbag iyan, taano ta dai ikumparar an itinutukdo kan saindong relihiyon sa talagang sinasabi kan Bibliya?

Sinabi ni Jesus na an satong pagsamba sa Diyos dapat nakabasar sa katotoohan—an katotoohan na yaon sa Bibliya. (Juan 4:24; 17:17) Sinabi man ni apostol Pablo na an satong kaligtasan nakadepende sa pagkaigwa niyato nin tamang ‘pakasabot sa katotoohan.’ (1 Timoteo 2:4) Kaya mahalagang marhay na nakabasar an satong mga tinutubod sa tamang katotoohan na nasa Bibliya. Nakataya diyan an sato mismong kaligtasan!

KUN PAANO IKUKUMPARAR AN MGA TINUTUBOD TA SA SINASABI KAN BIBLIYA

Basahon tabi an anom na hapot na yaon digdi asin an simbag kan Bibliya sa mga hapot na iyan. Buksan sa Bibliya an sitadong mga teksto, asin isip-isipon an mga simbag. Dangan haputon an sadiri, ‘Kauyon daw sa sinasabi kan Bibliya an itinutukdo sa samong relihiyon?’

An mga hapot na ini makakatabang sa saimo na ikumparar an tinutubod mo sa itinutukdo kan bibliya. Gusto mo daw na ikumparar an iba pang itinutukdo kan relihiyon nindo sa sinasabi kan Bibliya? Mauugma an mga Saksi ni Jehova na tabangan kang pag-adalan an malinaw na katotoohan sa Bibliya. Kun gusto mo nin libreng pag-adal sa Bibliya, puwede kang magsabi sainda. O puwede mong buksan an website na jw.org/bcl.

1 HAPOT: Siisay an Diyos?

SIMBAG: Si Jehova, na Ama ni Jesus, an Diyos na dai nin katapusan, an makakamhan sa gabos, asin an Kaglalang kan gabos na bagay.

AN SABI KAN BIBLIYA:

‘Danay kaming nagpapasalamat sa Diyos na Ama kan satong Kagurangnan na si Jesu-Cristo, kun namimibi kami para saindo.’—Colosas 1:3, An Marahay na Bareta Biblia.

‘Ika O Jehova, ika sana. Ika an naggibo kan kalangitan, asin kan daga asin kan gabos na yaon diyan; asin ika an nagbubuhay kan gabos na ining mga bagay.’—Nehemias 9:6.

Hilingon man an Joel 2:32; 1 Timoteo 1:17.

2 HAPOT: Siisay si Jesu-Cristo?

SIMBAG: Si Jesus an panganay na Aki nin Diyos. Linalang si Jesus, kaya may kapinunan siya. Si Jesus mas hababa sa Diyos asin pirmi niyang ginigibo an kabutan nin Diyos.

AN SABI KAN BIBLIYA:

‘An ama urog sa sako.’—Juan 14:28.

‘[Si Jesus] an ladawan nin Diyos na dai nahihiling, an panganay sa gabos na linalang.’—Colosas 1:15.

Hilingon man an Mateo 26:39; 1 Corinto 15:28.

3 HAPOT: Ano an espiritu santo o banal na espiritu?

SIMBAG: An banal na espiritu sarong puwersa na ginagamit nin Diyos tanganing utubon an saiyang kabutan. Bako iyan persona. An mga tawo puwedeng mapano nin banal na espiritu asin pahiruon kaiyan.

AN SABI KAN BIBLIYA:

‘Pakadangog ni Elizabet kan patara-tara ni Maria, an aki kuminibol-kibol sa saiyang tulak, asin si Elizabet napano nin espiritu santo.’—Lucas 1:41.

‘Kamo maako nin kapangyarihan kun dumatong na sa saindo an espiritu santo.’—Guibo 1:8.

Hilingon man an Genesis 1:2; Guibo 2:1-4; 10:38.

4 HAPOT: Ano an Kahadian nin Diyos?

SIMBAG: An Kahadian nin Diyos sarong gobyerno sa langit. Si Jesus an Hadi sa Kahadian nin Diyos. Dai mahaloy, paagi sa Kahadian na iyan, mangyayari an kabutan nin Diyos sa bilog na daga.

AN SABI KAN BIBLIYA:

‘An ikapitong anghel nagpatanog; asin nagsunod an haralangkaw na tingog sa langit, asin sinda nagsabi, “An kahadian kan kinaban nagin Kahadian kan satong Kagurangnan, asin kan saiyang Cristo, asin siya maghahadi sagkod lamang.”’—Kapahayagan 11:15.

Hilingon man an Daniel 2:44; Mateo 6:9, 10.

5 HAPOT: Masakat daw sa langit an gabos na marahay na tawo?

SIMBAG: Dai. Limitadong bilang sana kan maimbod na mga tawo an pinili nin Diyos para magsakat sa langit. Inaapod sindang ‘sadit na aripumpon.’ Makakaibanan sinda ni Jesus sa paghadi sa bilog na katawuhan.

AN SABI KAN BIBLIYA:

‘Dai kamo matakot sadit na aripumpon; huli ta iyo iyan an marahay na buot nin saindong Ama na itao saindo an Kahadian.’—Lucas 12:32.

‘Sinda magigin mga saserdote nin Diyos asin ni Cristo, patin maghahadi sa kaibahan niya.’—Kapahayagan 20:6.

Hilingon man an Kapahayagan 14:1, 3.

6 HAPOT: Ano an kabutan nin Diyos para sa daga asin sa katawuhan?

SIMBAG: Sa pamamahala kan Kahadian nin Diyos, an daga magigin paraiso asin an maimbod na mga tawo magkakaigwa nin perpektong hawak, daing katapusan na katuninungan, asin buhay na daing sagkod.

AN SABI KAN BIBLIYA:

‘An mga mahuyo magmamana kan daga, asin magkakararanga nin labi-labi sa katuninungan.’—Salmo 37:10, 11.

‘Papahidon niya an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmundo, ni pagtangis, ni kulog. An mga inot na bagay nakalihis na.’—Kapahayagan 21:3, 4.

Hilingon man an Salmo 37:29; 2 Pedro 3:13.