Paghihinguwang Maarog an Marahay na mga Halimbawa

NAMUNDAG ako kan Disyembre 10, 1936 sa Wichita, Kansas, U.S.A., apat kaming magturugang; ako an panganay. Mga dedikadong parasamba ni Jehova an mga magurang kong si William asin Jean. Company servant an ama ko, an apod kaidto sa nanginginot sa kongregasyon. An nagtukdo nin mga katotoohan sa Bibliya sa sakong ina iyo an saiyang ina na si Emma Wagner. Itinukdo ni Lola Emma sa dakul na tawo an mga katotoohan na iyan, kaiba na si Gertrude Steele na dakul na taon na nagin misyonera sa Puerto Rico.a Kaya dakul akong maaarog na marahay na halimbawa.

PAGGIRUMDOM SA MARAHAY NA MGA HALIMBAWA

Sarong Sabadong banggi kan ako singko anyos, kaiba ako kan sakong ama na nag-aalok kan magasin na The Watchtower asin Consolation (Awake! na ngunyan) sa mga nag-aaragi sa tinampo. Kan panahon na idto, napalabot sa Giyera Mundiyal II an nasyon mi. Sarong burat na doktor an nagdulok samo asin tinaraman nin mararaot si Tatay huli sa saiyang Kristiyanong neutralidad, na sinasabing matalaw daa an ama ko saka nagpapalibreng magsuldados. Ihinampang kan doktor an lalawgon niya sa lalawgon ni Tatay asin nagsabi, “Hoy, matalaw! Ta’no ta dai mo ako suntukon!” Natakot ako pero napahanga akong marhay sa sakong ama. Nagpadagos sana siyang nag-alok nin mga magasin sa mga tawong nakiusyuso. Dangan, may nag-aging suldados, tapos kinurahawan siya kan doktor, “Gibuhon mo an dapat sa matalaw na ini!” Narisa kan suldados na burat an doktor, kaya sinabi niya digdi, “Magpuli ka na para mahali an pagkaburat mo!” Asin pareho sindang naghali. Nagpapasalamat talaga ako sa kusog nin buot na itinao ni Jehova sa sakong ama kan panahon na idto. May duwang barberya sa Wichita an ama ko, asin saro sa mga kostumer niya an doktor na idto!

Kan otso anyos ako, ipinabakal kan mga magurang ko an harong mi asin mga barberya, nagpagibo sinda nin sadit na mobile home, asin nagbalyo sa Colorado tanganing maglingkod kun sain mas dakula an pangangaipo. Nag-istar kami harani sa Grand Junction na diyan nagpayunir an mga magurang ko asin nagtrabaho nin part-time sa tanuman saka rantso. Huli sa bendisyon ni Jehova asin sa paghihinguwa ninda, nagkaigwa duman nin kongregasyon. Kan Hunyo 20, 1948, binawtismuhan ako ni Tatay sa sarong sapa sa bukid, kasabay kan iba pang nag-ako kan mga katotoohan sa Bibliya, arog ni Billie Nichols asin an agom niya. Pag-abot nin panahon, naasignaran sinda sa pansirkitong gibuhon, siring man an aki nindang lalaki asin an agom kaini.

Napadayupot kami sa dakul na iba pang nakikabtang nin lubos sa gibuhon na pang-Kahadian asin nagkaigwa kami nin nakakapakusog sa espirituwal na mga pag-uulay, lalo na sa pamilyang Steele—si Don asin Earlene, si Dave asin Julia, saka si Si asin Martha—na dakula an nagin impluwensiya sa buhay ko. Ipinahiling ninda sako na magkakaigwa nin tunay na kahulugan asin kaugmahan an buhay kun iinuton an Kahadian.

NAGBALYO GIRARAY KAMI

Kan 19 anyos ako, inagda ako ni Bud Hasty, sarong amigo kan pamilya mi, na umiba sa saiya na magpayunir sa timog na parte kan Estados Unidos. Sinabi kan paraataman nin sirkito na magbalyo kami sa Ruston, Louisiana na diyan may nagkapirang Saksi na nagin inaktibo. Tinugon niya kami na isagibo an gabos na pagtiripon kada semana dawa kun pira sana an mag-atender. Nakahanap kami nin angay na lugar para diyan magtiripon, dangan pinakarhay mi iyan. Isinagibo mi an gabos na pagtiripon, pero nahaloy-haloy man na kami sanang duwa an nag-aatender. Nagsusurusalida kaming duwa sa mga kabtang kan pagtiripon, kun siisay an mayo sa plataporma, siya an masimbag kan gabos na hapot. Pero kun an kabtang may kaibang demonstrasyon, pareho kaming masakat sa plataporma, kaya mayong nawawalat sa tukawan para magdangog! Kan huri, sarong may edad nang sister an nagpuon nang mag-atender. Pag-abot nin panahon, may mga nag-atender nang mga tinutukduan sa Bibliya saka nagkapirang inaktibo, asin dai nahaloy, igwa na kami nin sarong nag-uuswag na kongregasyon.

Sarong aldaw, sarong ministro nin Church of Christ an nakaulay mi ni Bud mapadapit sa mga tekstong dai pamilyar sako. Namundo akong marhay kaiyan asin napahiro akong pag-isipan nin mas hararom an mga tinutubod ko. Sa laog nin sarong semana, inaabot ako nin matanga para aramon an simbag sa mga hapot kan ministrong idto. Nakatabang talaga iyan tanganing maisapuso ko an katotoohan, asin dai na ako makahalat na makanumpong giraray nin arog niya.

Dai nahaloy, sinabi sa sako kan paraataman nin sirkito na magbalyo sa El Dorado, Arkansas para tabangan an kongregasyon diyan. Mantang yaon diyan, pabalik-balik ako sa Colorado para magreport sa komite na nagpipili nin mga magigin suldados. Sa saro kong pagbiyahe, nakisakay sa kotse ko an nagkapirang kapwa ko payunir asin naaksidente kami sa Texas kaya dai na magamit an kotse. Sinundo kami nin sarong brother na inapudan mi asin dinara kami sa harong niya saka sa pagtiripon kan kongregasyon. Ipinaisi ninda diyan an nangyari samo, asin huli sa saindang kabuutan, tinawan ninda kami nin pinansiyal na ayuda. Naipabakal man kan brother an kotse ko sa kantidad na $25.

May nasakayan kami pa-Wichita, diyan nagpapayunir si E. F. “Doc” McCartney, sarong dayupot na amigo kan pamilya mi. An kambal niyang aki na si Frank asin Francis, an duwa sa nagin pinakadayupot kong mga amigo kaidto sagkod ngunyan. Ipinabakal ninda sa sako an luma nindang kotse sa kantidad na $25, an eksaktong kabaklan kan naraot kong kotse. Ini an inot na beses na nahiling ko nin malinaw na itinao ni Jehova an pangangaipo ko huling ininot ko an Kahadian. Sa pagbisita kong ini, ipinabisto ako kan pamilyang McCartney sa sarong magayon na sister na si Bethel Crane. Sarong mahigos na Saksi sa Wellington, Kansas an saiyang ina na si Ruth, asin padagos ining nagpayunir sagkod kan labi na ining 90 anyos. Mayo pang sarong taon, ikinasal kami ni Bethel kan 1958 asin nagpayunir na man siya kaiba ko sa El Dorado.

NAKAKAUGMANG MGA IMBITASYON

Pagkatapos na hurop-hurupon an mararahay na halimbawa na nahiling mi kan kami nagdadakula, nagdesisyon kami na pirming iandam an samong sadiri para sa ano man na ipapagibo kan organisasyon ni Jehova. Inasignaran kaming magin espesyal payunir sa Walnut Ridge, Arkansas. Dangan kan 1962, ugmahon kami kan makaresibi kami nin imbitasyon para sa ika-37 klase kan Gilead. Lalo kaming naugma kan maaraman ming magigin kaklase mi si Don Steele. Pagkagradwar mi, idinestino kami ni Bethel sa Nairobi, Kenya. Mamundo kaming marhay kan pahali kami sa New York, pero nasalidahan iyan nin kaugmahan kan sabaton kami kan mga tugang sa airport kan Nairobi!

Nagustuhan mi tulos an Kenya asin an maugmang ministeryo diyan. An inot ming mga tinutukduan sa Bibliya na nagin lingkod ni Jehova iyo si Chris asin Mary Kanaiya. Sagkod ngunyan, maimbod sindang naglilingkod nin bilog na panahon sa Kenya. Kan suminunod na taon, idinestino kami sa Kampala, Uganda, bilang an pinakainot na mga misyonero sa nasyon na iyan. Talagang nakakaugmang mga panahon idto huling kadakul kan gustong-gustong manudan an mga katotoohan sa Bibliya, asin nagin mga Saksi sinda. Pero pagkalihis nin tulo may kabangang taon, naghali kami sa Aprika tanganing magpamilya. Nagbalik kami sa Estados Unidos. Mas mamundo kami kan pahali kami sa Aprika kisa kan pahali kami kaidto sa New York. Namutan mi nang marhay an mga tawo sa Aprika asin gusto ming bumalik diyan pag-abot nin panahon.

SARONG BAGONG ASIGNASYON

Nag-istar kami sa mabukid na lugar sa sulnupan na parte kan Colorado, kun sain nakaistar an mga magurang ko. Mga 17 bulan pagkamundag kan matua ming aking si Kimberly, namundag man si Stephany. Sineryoso ming marhay an bago ming asignasyon bilang mga magurang, asin hininguwa ming maitadom an katotoohan sa magagayon ming aki. Gusto ming arugon asin ipahiling sa sainda an marahay na mga halimbawa na nahiling mi sa iba. Makamumundo nanggad na isipon na dawa dakulang tabang sa pagmolde sa mga aki an pagpahiling nin marahay na halimbawa, bakong garantiya iyan na maglilingkod sinda ki Jehova pagdakula ninda. Binayaan kan duwa kong nguhod na tugang an katotoohan. Lugod na arugon giraray ninda an marahay na mga halimbawa na naipahiling sa sainda.

Talagang maugma kami sa pagpadakula sa mga aki mi asin hinihinguwa ming pirming magkaibanan bilang pamilya. Nakaistar kami harani sa Aspen, Colorado, kaya gabos kami nag-adal mag-ski para paminsan-minsan iriba kaming makapag-ski. Sa mga panahon na iyan nin paglilibang, nagkakaoportunidad kaming makaulay an mga aki mantang nakasakay sa ski lift pasakat sa bukid. Nagkakamping man kami asin maugmang nakakapag-ulay mantang nakapalibot sa campfire. Dawa aki pa sinda, ihinahapot na ninda, “Ano po an gigibuhon ko pagdakula ko?” asin “Ano pong mga ugali dapat igwa an pipilion kong agom?” Hininguwa ming itadom sa isip asin puso ninda an mga pamantayan nin Diyos. Pirmi ming idinuduon sainda na magin pasuhan an bilog na panahon na paglilingkod asin kun taano ta madunong na magpaagom sana sa saro na pareho ninda an pasuhan. Hininguwa ming tabangan sinda na masabutan na pinakamarahay na dai nguna magpaagom kun hoben pa sindang marhay. Nagin kasabihan mi an, “Magdanay na mayong kapadis sagkod na dai pa 23.”

Arog kan ginibo kan mga magurang mi, hininguwa ming makaatender sa mga pagtiripon asin regular na makapaghulit bilang pamilya. Nag-iimbitar kami sa harong nin mga naglilingkod nin bilog na panahon. Parati mi man na maugmang iniistorya an mga eksperyensiya mi kan kami nagmimisyonero pa. Sinasabi mi sa mga aki mi na gusto ming makapa-Aprika kami gabos pag-abot nin panahon. Gustong-gusto ninda iyan.

Regular kaming igwa nin pampamilyang pag-adal na diyan inaakto mi an mga sitwasyon na puwedeng mangyari sa eskuwelahan. An mga aki mi an maakto bilang Saksi asin sisimbagon ninda an mga hapot mi. Talagang gustong-gusto ninda an arog kaiyan na paagi nin pagtutukdo, asin huli kaiyan, nagkaigwa sinda nin kumpiyansa. Kan nagdadakula na sinda, may pagkakataon na nagrereklamo sinda pag maadal na kami bilang pamilya. Sarong beses huling dai ko na aram an gigibuhon sa sainda, pinalaog ko sinda sa kuwarto ninda asin sinabi kong dai na kami mag-aadal. Nabigla sinda asin naghiribi na sinasabing gusto nindang mag-adal. Diyan mi nahiling na talagang naitatadom mi sa puso ninda an pagpapahalaga sa espirituwal na mga bagay mantang hoben pa sinda. Nagdakula sinda na gustong-gusto an pag-adal, asin pinabayaan mi sindang ipahayag an mga iniisip saka namamatian ninda. An masakit lang minsan pag sinasabi nindang dai sinda uyon sa nagkapirang itinutukdo kan Bibliya. Pero huli kaiyan, naaaraman mi kun ano talaga an nasa puso ninda. Pagkatapos ming simbagon sa Bibliya an mga hapot ninda, nasasabutan na ninda an kaisipan ni Jehova sa mga bagay-bagay.

PAKIKIBAGAY SA DAKUL PANG PAGBABAGO

Dai mi linauman na magigin arog kaini karikas an proyektong ini nin pagpadakula sa mga aki mi. Sa tabang asin paggiya kan organisasyon nin Diyos, ginibo mi an pinakamakakaya mi para mapadakula sindang namumutan si Jehova. Talagang nagpapasalamat kaming marhay kan parehong magpayunir an mga aki mi pakagradwar ninda sa hayskul, tapos nakanuod sinda nin mga kasanayan na magagamit ninda para masuportaran an sadiri ninda. Nagbalyo sinda sa Cleveland, Tennessee, kaiba an duwa pang sister para maglingkod kun sain mas dakula an pangangaipo. Talagang napungaw kami sainda, pero maugma kaming marhay huling ginagamit ninda an saindang buhay sa bilog na panahon na paglilingkod. Nagpayunir giraray kami ni Bethel, na nagbukas sa samo nin iba pang nakakaugmang mga pribilehiyo. Naglingkod ako bilang kasalihid na paraataman nin sirkito asin paraataman sa kumbensiyon.

Bago magbalyo sa Tennessee an mga aki mi, nagpa-London, England nguna sinda asin nagbisita sa sangang opisina duman. Duman nabisto ni Stephany, na 19 anyos kaidto, an sarong hoben na Bethelite na si Paul Norton. Kan sunod nindang pagpa-London, namidbid man ni Kimberly si Brian Llewellyn, saro sa mga katrabaho ni Paul. Nagpakasal si Paul asin Stephany—pero kan mag-23 na ini. Nagpakasal si Brian asin Kimberly kan suminunod na taon—kan 25 anyos ini. Kaya talagang nagdanay sindang mayong kapadis sagkod na dai pa sinda 23. Aprubado ming marhay an napili nindang agom.

Sinabi sa samo kan mga aki mi na an marahay na mga halimbawa mi asin kan mga lolo saka lola ninda an nakatabang sa sainda na sunudon an pagbuot ni Jesus na “padagos na hanapon nguna an Kahadian,” dawa sa mga panahon na nasasakitan sinda sa pinansiyal. (Mat. 6:33, NW) Kan Abril 1998, naimbitaran si Paul asin Stephany sa ika-105 klase nin Gilead, dangan idinestino sinda sa Malawi, Aprika. Kasabay kaiyan, naimbitaran man si Brian asin Kimberly na maglingkod sa Bethel sa London asin kan huri, ibinalyo sinda sa Bethel sa Malawi. Ugmahon kami, huling mayo na nin iba pang pinakamarahay na paagi na magagamit nin mga hoben an saindang buhay kundi sa paglilingkod sa Diyos.

SARO PANG NAKAKAUGMANG IMBITASYON

Kan Enero 2001, naresibi ko an apod sa telepono na nasambitan sa kapinunan. Ipinaliwanag ni Brother Marais, paraataman kan Translation Services, na may inaareglo sindang kurso para mas masabutan kan mga paratradusir sa bilog na kinaban an lengguwaheng Ingles, asin sa edad na 64, pinag-iisipan nindang sanayon ako tanganing magin saro sa mga instruktor. Ipinamibi mi ni Bethel an dapit sa bagay na ini asin pinag-ulayan mi ini kaiba kan may edad mi nang mga ina para mahagad an suhestiyon ninda. Pareho ninda gustong akuon mi an imbitasyon, dawa ngani mangangahulugan iyan na dai mi na sinda maaataman. Inapudan ko si Brother Marais asin sinabing nauugma kaming marhay na akuon an magayunon na pribilehiyong ini.

Dangan na-diagnose na may kanser an sakong ina. Sinabi ko sa saiya na dai na kami mahali tanganing matabangan mi an tugang kong si Linda sa pag-ataman sa saiya. Pero sinabi ni Nanay: “Dai nindo kaipuhan na gibuhon iyan. Mas magrabe an pagmati ko kun dai kamo madadagos na maghali.” Uminuyon man si Linda. Talagang pinapasalamatan ming marhay an pagigin mapagsakripisyo ninda asin an tabang kan mga amigo mi sa samong lugar! Sarong aldaw, pagkahali mi pasiring sa Watchtower Educational Center sa Patterson, nag-apod sa samo si Linda asin sinabing gadan na si Nanay. Arog kan gusto niyang gibuhon mi kan siya buhay pa, nagin sibot kaming marhay sa bago ming asignasyon.

Naugma kaming marhay ta an inot ming asignasyon iyo an sangang opisina sa Malawi, kun sain naglilingkod an mga aki mi asin an agom ninda. Maugma kaming nagkairibanan giraray! Sa Zimbabwe mi sunod na itinukdo an kurso dangan sa Zambia. Pagkatapos nin tulo may kabangang taon na pagtutukdo kan kurso, inasignaran kaming magbalik sa Malawi para idokumentaryo an mga eksperyensiya kan pinersegir na mga Saksi duman huli sa saindang Kristiyanong neutralidad.b

Sa giraray, mamundo kaming marhay kan magbalik kami sa harong mi sa Basalt, Colorado kan 2005 na diyan padagos kaming nagpayunir ni Bethel. Kan 2006, nagbalyo si Brian asin Kimberly sa harong na kataid mi para padakulaon an duwa nindang aking babayi, si Mackenzie asin Elizabeth. Nasa Malawi pa si Paul asin Stephany; naglilingkod si Paul bilang miyembro kan Branch Committee. Ngunyan na madali na akong mag-80 anyos, nauugma akong marhay na mahiling an mas hoben na mga lalaki na nakatrabaho ko nin dakul na taon na iyo na an nagsasaabaga kan dating mga responsabilidad ko. Nagin posible an kaugmahan mi, panginot na, huli sa marahay na mga halimbawa na ipinahiling sa samo na hininguwa ming maarog para sa kapakinabangan kan mga aki mi asin mga makuapo.