Suportaran an Soberaniya ni Jehova!

1, 2. Ano an dapat na magin malinaw sa kada saro sa sato? (Hilingon an ritrato sa itaas.)

AROG kan ipinaliwanag sa nainot na artikulo, pinapaluwas kan Diyablo na bakong maninigo si Jehova na mamahala sa katawuhan huling bakong makatanusan an pamamahala niya asin na mas mapapakarhay an mga tawo kun sinda an mamamahala sa sadiri ninda. Tama daw si Satanas? Ipamugtak ta na kaya kan mga tawo na pamahalaan an sadiri ninda asin na mabubuhay man sinda nin daing sagkod. Mas mapapakarhay daw sinda na bako an Diyos an namamahala sa sainda? Mas magigin maugma ka daw kun biyo kang talingkas sa Diyos asin nabubuhay nin daing katapusan?

² Mayong ibang puwedeng sumimbag kan mga hapot na iyan para sa saimo kundi ika sana. Dapat na pag-isipan na marhay iyan kan kada saro sa sato. Paagi kaiyan, magigin mas malinaw na may deretso si Jehova na magin Soberano asin na an pamamahala niya an pinakamarahay. Asin maninigo sana niyatong suportaran iyan nin bilog na puso. Pag-ulayan niyato an makusog na mga dahilan na itinatao kan Bibliya para magtiwala kita na si Jehova sana an may deretso na magin Soberano.

MAY DERETSO SI JEHOVA NA MAMAHALA

3. Taano ta si Jehova sana an may deretso na magin Soberano?

³ Si Jehova sana an may deretsong magin Soberano kan uniberso huling siya an Diyos na makakamhan sa gabos asin an Kaglalang. (1 Cron. 29:11; Gibo 4:24) Sa sarong bisyon sa Kapahayagan 4:11, an 144,000 na kairibang tagapamahala ni Cristo sa langit nagsabi: “Angay ka, Jehova na samuyang Diyos, na mag-ako kan kamurawayan asin kan onra asin kan kapangyarihan, huli ta linalang mo an gabos na bagay, asin huli sa saimong kabutan, sinda nag-eksister asin nalalang.” Iyo, huling si Jehova an naglalang kan gabos na bagay, siya sana an may deretso na pamahalaan an mga tawo pati an espiritung mga linalang.

4. Taano ta salang paggamit kan libertad na magdesisyon an pagrebelde sa soberaniya nin Diyos?

⁴ Mayo nin ano man na bagay na linalang si Satanas. Huli kaiyan, mayo siyang deretsong pamahalaan an uniberso. Nagin pangahas siya asin an inot na mag-agom na tawo kan magrebelde sinda sa soberaniya ni Jehova. (Jer. 10:23) Totoo, bilang mga linalang na may libertad na magdesisyon, puwede nindang pilion na dai magpasakop sa Diyos. Pero nagtatao daw iyan sa sainda nin deretso na magrebelde sa Diyos? Dai. An libertad na magdesisyon nagtatao sa saro nin deretso na gumibo nin mga desisyon pero bako para magrebelde sa Kaglalang asin Paratao nin Buhay. Malinaw na an pagrebelde ki Jehova salang paggamit kan libertad na magdesisyon. Bilang mga tawo, kaipuhan niyato an matanos na pamamahala ni Jehova.

5. Taano ta makakasigurado kita na makatanusan an mga desisyon nin Diyos?

⁵ May saro pang dahilan kun taano ta si Jehova an may deretso na magin Soberano. Mahihiling sa paggamit niya kan saiyang awtoridad an perpektong hustisya. Sinabi niya: ‘Nagdadanay an sakong pagkamuot, saka ginigibo ko an tama asin matanos. Iyan an mga bagay na nawiwilihan ko. Ako si Jehova.’ (Jer. 9:24, BPVa) Dai ni Jehova kaipuhan an ano man na ley na ginibo nin bakong perpektong mga tawo para sa pagdesisyon kun ano an tama. Sa saiya mismo hali an perpekto niyang hustisya, asin basado diyan, nagtao siya nin mga katugunan para sa mga tawo. ‘Katanusan asin hustisya an mga pundasyon kan saiyang trono,’ kaya makakasigurado kita na makatanusan an gabos niyang katugunan, prinsipyo, asin mga desisyon. (Sal. 89:14; 119:128, BPV) Sa kabaliktaran, dai makatao si Satanas nin hustisya sa kinaban sa ibong kan mga sahot niya na bakong makatanusan na tagapamahala si Jehova.

6. Ano an sarong dahilan kun taano ta si Jehova an may deretsong pamahalaan an kinaban?

⁶ An saro pang dahilan kun taano ta si Jehova an may deretso na magin Soberano iyo na igwa siya kan kaaraman asin kadunungan na kaipuhan tanganing pamahalaan an uniberso. Isipon ini, tinawan nin Diyos nin kakayahan an saiyang Aki na magpaumay nin mga hilang na dai kayang bulungon nin mga doktor. (Mat. 4:23, 24; Mar. 5:25-29) Para ki Jehova, bako iyan milagro. Aram niya kun paano nagpupunsiyonar an hawak nin tawo asin kaya niyang hirahayon an ano man na magin depekto kaiyan. Kaya man niyang buhayon liwat an mga gadan asin papunduhon an natural na mga kalamidad.

7. Taano ta mas nakakalabi nanggad an kadunungan ni Jehova kisa sa kadunungan kan kinaban na pinamamahalaan ni Satanas?

⁷ An kinaban na pinamamahalaan ni Satanas naghahanap pa man giraray nin paagi tanganing mapapundo an iriwal sa laog man kan nasyon o sa pag-ultanan nin mga nasyon. Si Jehova sana an may kadunungan tanganing magkaigwa nin katuninungan sa bilog na kinaban. (Isa. 2:3, 4; 54:13) Mantang mas nanunudan niyato an kaaraman asin kadunungan ni Jehova, namamatian ta an arog kan sinabi ni apostol Pablo: “Kadakul nanggad kan mga bendisyon nin Diyos asin hararumon an saiyang kadunungan saka kaaraman! Dai nanggad marurop an saiyang mga desisyon asin dai nanggad masusog an saiyang mga dalan!”—Roma 11:33.

AN PAMAMAHALA NI JEHOVA AN PINAKAMARAHAY

8. Ano an nakakaparani sa saimo ki Jehova kun mapadapit sa paagi niya nin pamamahala?

⁸ Malinaw na pinapatunayan kan Bibliya na may deretso si Jehova na mamahala. Ipinapahiling man kaiyan an dahilan kun taano ta an saiyang pamamahala nakakalabi sa gabos. An saro iyo na namamahala siya na may pagkamuot. Iyo, napaparani kita sa saiya pag iniisip-isip ta an paagi niya nin pamamahala. Siya “mahihirakon asin mapagmalasakit, dai tulos naaanggot asin abunda sa maimbod na pagkamuot asin katotoohan.” (Ex. 34:6, NW) Tinatrato niya an saiyang mga lingkod nin may dignidad asin paggalang. An pagmalasakit niya sa sato urog pa kisa sa pagmalasakit ta sa satong sadiri. Sinasabi kan Diyablo na habong itao ni Jehova an ano man na marahay na bagay para sa saiyang maimbod na mga parasamba, pero bako iyan totoo. Itinao niya ngani an saiyang namumutan na marhay na Aki tanganing magkaigwa kita nin paglaom na mabuhay nin daing sagkod!—Basahon an Salmo 84:11; Roma 8:32.

9. Paano niyato naaraman na nagmamakulog si Jehova sa lambang indibidwal?

⁹ Dai sana si Jehova nagmamakulog sa saiyang banwaan sa pangkagabsan. Interesado man siyang marhay sa lambang indibidwal. Pag-isipan an nangyari kaidtong suanoy na mga panahon. Sa laog nin mga tulong siglo, naggamit si Jehova nin mga hukom tanganing giyahan asin iligtas an nasyon nin Israel laban sa mga nang-aapi sa sainda. Sa masakiton na panahon na iyan, dai nakalampas sa paghiling ni Jehova an bakong Israelitang si Ruth. Dakula an isinakripisyo niya tanganing magin parasamba ni Jehova. Binendisyunan ni Jehova si Ruth nin agom asin sarong aki. Pero bako sana iyan. Pag binuhay na liwat si Ruth, maaaraman niya na an saiyang aki nagin saro sa mga ginikanan kan Mesiyas. Asin isipa kun ano an mamamati niya kun maaraman niyang an istorya kan buhay niya isinurat sa Bibliya, sa sarong libro na ipinangaran sa saiya!—Rut 4:13; Mat. 1:5, 16.

10. Taano ta bakong sobra kaistrikto an pamamahala ni Jehova?

¹⁰ An pamamahala ni Jehova bakong maringis o sobra kaistrikto. An mga sakop kaiyan nakakamati nin katalingkasan asin kaugmahan. (2 Cor. 3:17) Sinabi ni David dapit ki Jehova: ‘Kamurawayan asin dangog nasa atubangan nin Diyos; kakusugan asin kaugmahan nasa saiyang irukan.’ (1 Cron. 16:7, 27) Kaagid kaiyan, nagsurat an salmistang si Etan: ‘Paladan an banwaan na tataong mag-umaw sa saimo. Magraralakaw sinda, O Jehova, sa liwanag nin saimong lalawgon. Diyan sa saimong ngaran magkakaurugma sinda sa bilog na aldaw; asin sa saimong katanusan papahalangkawon sinda.’—Sal. 89:15, 16.

11. Paano niyato mapapakusog an satong pagtitiwala na an pamamahala ni Jehova an pinakamarahay?

¹¹ Kun parati niyatong huhurop-hurupon an karahayan ni Jehova, mapapakusog kaiyan an satong pagtitiwala na an saiyang pamamahala an pinakamarahay. Mamamati niyato an arog kan namati kan salmista: ‘Urog karahay an sarong aldaw diyan sa saimong [mga patyo] kisa sa sangribong aldaw sa luwas kaiyan!’ (Sal. 84:10) Taano ta nasabi niya iyan? Bilang satong mamumuton na Disenyador asin Kaglalang, aram ni Jehova kun ano an kaipuhan ta tanganing magin tunay na maugma, asin bulaos niyang itinatao iyan. Ano man an kahagadan niya sa sato, para iyan sa satong kapakinabangan asin siguradong maresulta iyan sa satong kaugmahan. Totoo iyan dawa pa kun an saiyang mga kahagadan mangangahulugan nin pagsakripisyo sa parte niyato.—Basahon an Isaias 48:17.

12. Ano an panginot na dahilan kaya sinusuportaran ta an soberaniya ni Jehova?

¹² Ipinapahiling kan Bibliya na pagkatapos kan Sangribong Taon na Paghadi ni Cristo, may mga tawong marebelde sa soberaniya ni Jehova. (Kap. 20:7, 8) Ano an puwedeng mag-impluwensiya sa sainda na gibuhon iyan? An Diyablo, na pinatalingkas sa pagkabilanggo asin desididong dayaon an katawuhan, siguradong mahinguwa tanganing impluwensiyahan an mga tawo na magin makasadiri. Iyan an pirming ginigibo niya. Tibaad purbaran niyang kumbinsiron sinda na may paagi para mabuhay sinda nin daing sagkod dawa dai sinda nagsusunod ki Jehova. Siyempre, bako nanggad iyan totoo. Pero an mas mahalaga: Maniniwala daw kita sa kaputikan na iyan? Kun namumutan niyato si Jehova asin naglilingkod kita sa saiya huli ta kumbinsido kita na marahay siya asin na siya an may deretso na magin Soberano kan uniberso, ikakabaldi nanggad niyato an kaputikan na iyan. Nungka niyatong mamawuton an buhay na dai sakop kan lehitimo asin mamumuton na soberaniya ni Jehova.

MAIMBOD NA SUPORTARAN AN SOBERANIYA NIN DIYOS

13. Taano ta masasabi niyato na pagpapahiling nin suporta sa soberaniya nin Diyos an pag-arog sa saiya?

¹³ Tunay nanggad na angay sana na suportaran niyato nin bilog na puso an soberaniya ni Jehova. Arog kan napag-ulayan niyato, may deretso siyang mamahala, asin an paagi niya nin pamamahala an pinakamarahay. Masusuportaran ta an soberaniya ni Jehova paagi sa pagpapadanay kan satong integridad asin maimbod na paglilingkod sa saiya. Paano pa niyato iyan masusuportaran? Gibuhon niyato an mga bagay-bagay uyon sa pamamaagi ni Jehova. Iyo, kun aarugon niyato si Jehova, maipapahiling ta na pinapahalagahan asin sinusuportaran ta an saiyang paagi nin pamamahala.—Basahon an Efeso 5:1, 2.

14. Paano maaarog si Jehova kan mga elder asin kan mga payo nin pamilya?

¹⁴ Sa pag-adal niyato sa Bibliya, nanudan niyato na ginagamit ni Jehova an saiyang awtoridad sa mamumuton na paagi. Kauyon kaiyan, an mga payo nin pamilya asin mga elder na nagpapahalagang marhay sa saiyang soberaniya dai dapat na magin sobra kaistrikto, na garo baga may sadiri man sindang sadit na soberaniya. Dapat nindang arugon si Jehova. Hininguwang marhay ni Pablo na arugon an Diyos asin an saiyang Aki. (1 Cor. 11:1) Dai ipinapasupog ni Pablo an iba asin dai man niya sinda pinipirit na gibuhon kun ano an tama. Imbes, nakiulay siya sa sainda. (Roma 12:1; Efe. 4:1; Filem. 8-10) Arog kaiyan si Jehova. Kaya, arog man dapat kaiyan an gabos na nagpapahalaga asin nagsusuportar sa paagi niya nin pamamahala.

15. Paano pa niyato maipapahiling na pinapahalagahan ta an paagi nin pamamahala ni Jehova?

¹⁵ Ano an dapat na magin pagmansay niyato sa mga tinawan nin Diyos nin awtoridad? Kun magalang kitang makikikooperar sa sainda, maipapahiling niyato na sinusuportaran ta an soberaniya ni Jehova. Dawa kun dai niyato lubos na nasasabutan an sarong desisyon o dai kita uyon diyan, nagpapasakop pa man giraray kita sa teokratikong areglo. Lain na marhay iyan sa ginigibo kan mga tawo sa kinaban, pero iyan an paagi nin pamumuhay sa irarom kan pamamahala ni Jehova. (Efe. 5:22, 23; 6:1-3; Heb. 13:17) Kun gigibuhon ta iyan, makikinabang kita huling gusto nin Diyos an pinakamarahay para sa sato.

16. Paano naggigibo nin personal na mga desisyon an mga nagsusuportar sa soberaniya nin Diyos?

¹⁶ Maipapahiling man niyato na sinusuportaran ta an soberaniya nin Diyos paagi sa satong personal na mga desisyon. Dai nagtatao si Jehova nin espesipikong susundon para sa lambang sitwasyon. Imbes, ginigiyahan niya kita paagi sa pagsabi sa sato kan saiyang kaisipan. Halimbawa, dai siya nagtatao nin detalyadong susundon dapit sa pagbado kan mga Kristiyano. Pero, sinasabi niya na buot niya na pilion niyato an mga istilo nin pagbado asin pagpakarhay sa sadiri na mabini asin angay para sa mga ministrong Kristiyano. (1 Tim. 2:9, 10) Habo man niyang makapasingkog kita sa iba huli sa satong mga desisyon. (1 Cor. 10:31-33) Kun an satong mga desisyon ibinabasar niyato panginot na sa kaisipan ni Jehova, bako sanang sa kun ano an gusto niyato, maipapahiling ta na pinapahalagahan niyato asin sinusuportaran an paagi niya nin pamamahala.

17, 18. Ano an pirang paagi na maipapahiling kan mga mag-agom na sinusuportaran ninda an soberaniya ni Jehova?

¹⁷ Pag-isipan an sarong paagi na masusuportaran kan mag-agom na mga Kristiyano an mga pamamaagi ni Jehova asin sa siring masuportaran an saiyang soberaniya. Paano kun dai nagin magayon an pag-ibanan nindong mag-agom? Paano kun garo nakakadisganar pa ngani iyan? Hurop-hurupon an nagin pagtratar ni Jehova sa Israel. Inapod niya an saiyang sadiri bilang an agom kan suanoy na nasyon na iyan. (Isa. 54:5; 62:4) Kaso dai nanggad nagin marahay na “agom” an Israel. Pero dai tulos nagsuko si Jehova. Pauruutro siyang nagpahiling nin pagkahirak sa nasyon asin nin kaimbudan sa tipan niya sa sainda. (Basahon an Salmo 106:43-45.) Bako daw na napaparani kita ki Jehova huli sa maimbod na pagkamuot niyang iyan?

¹⁸ Kaya, hihinguwahon kan mga mag-agom na nagpapahalaga sa mga pamamaagi ni Jehova na arugon siya. Magkaproblema man an saindang relasyon, dai sinda mahanap nin bakong suno sa Kasuratan na dahilan tanganing tapuson iyan. Aram ninda na pinagsaro sinda ni Jehova asin na gusto niyang ‘magdanay’ sindang magkaibanan. An solamenteng suno sa Kasuratan na dahilan nin pagdiborsiyo na nagtutugot sa saro na mag-agom giraray iyo an seksuwal na imoralidad. (Mat. 19:5, 6, 9) Kun gigibuhon ninda an saindang pinakamakakaya para magin mapanggana an saindang pag-ibanan, ipinapahiling ninda na sinusuportaran ninda an matanos na paagi nin pamamahala ni Jehova.

19. Kun makagibo kita nin sala, ano an dapat niyatong gibuhon?

¹⁹ Huling bako kitang perpekto, makakagibo kita kun minsan nin mga bagay na makakapamundo ki Jehova. Aram niya ini asin mamumuton siyang nagtao nin probisyon para sa sato paagi sa pantubos ni Cristo. Kaya, kun makagibo kita nin sala, dapat kitang maghagad nin tawad ki Jehova. (1 Juan 2:1, 2) Imbes na pagparabasulon an satong sadiri, dapat niyatong hinguwahon na dai na utruhon an satong sala. Kun magdadanay kitang harani ki Jehova, papatawadon niya kita asin tatabangan niya kitang makabangon saka mapangganang maatubang an kaagid na mga sitwasyon sa maabot.—Sal. 103:3.

20. Taano ta dapat na niyatong suportaran ngunyan an soberaniya ni Jehova?

²⁰ Sa bagong kinaban, an gabos mapasakop sa soberaniya ni Jehova asin makakanuod kan saiyang matanos na mga pamamaagi. (Isa. 11:9) Pero ngunyan pa sana, dakul na kitang nanunudan sa saiya. Asin madali nang maresolberan an isyu dapit sa soberaniya. Ngunyan na an panahon na suportaran an soberaniya nin Diyos paagi sa satong kaimbudan, paglilingkod, asin maigot na paghihinguwang arugon siya sa gabos niyatong ginigibo.