An Gabos na Bagay Posible ki Jehova

PAGTRABAHO PUON MAG-AAGAHON SAGKOD MAGSINAROM

Namundag ako kan 1937 sa sarong kolkhoz. Saro iyan na mahiwas na tanuman na sadiri kan estado na diyan tarabang na nagtatrabaho an mga parauma. Harani iyan sa Tokmok, Kyrgyzstan. Mga Kyrgyz kaming magkakapamilya, saka Kyrgyz an lengguwahe mi. Mga parauma an mga magurang ko. Nagtatrabaho sinda sa kolkhoz puon mag-aagahon sagkod magsinarom. Regular na rinarasyunan nin kakanon an mga parauma, pero taunan sana an pasuweldo. Nasakitan si Nanay sa pag-asikaso samo kan tugang kong babayi na mas nguhod sako. Pagkatapos nin limang taon na pag-eskuwela, bilog na panahon na man akong nagtrabaho sa kolkhoz.

Tios an kadaklan na nakaistar sa rehiyon mi saka mapagalon an trabaho makaraos lang sa kada aldaw. Bilang hoben, dai ko lamang kaidto pinag-iisipan an katuyuhan nin buhay o an puturo. Dai ko talaga naisip kaidto na mababago an buhay ko huli sa pambihirang mga katotoohan dapit ki Jehova asin sa katuyuhan niya. Magayunon talaga an istorya kun paano nag-abot asin naglakop sa Kyrgyzstan an katotoohan. Nagpuon iyan gabos sa dinakulaan kong rehiyon sa norteng parte kan Kyrgyzstan.

DINARA KAN MGA IDINISTIYERO AN KATOTOOHAN SA KYRGYZSTAN

Nag-abot kan dekada nin 1950 sa Kyrgyzstan an katotoohan dapit ki Jehova. Dai nagin madali an pagpuon kan katotoohan huli sa impluwensiya kan makusog na ideolohiya. Kaidto kaya, miyembro kan Union of Soviet Socialist Republics (USSR) an inaapod na ngunyan na nasyon nin Kyrgyzstan. Nagdanay na neutral pag-abot sa pulitika an mga Saksi ni Jehova sa bilog na USSR. (Juan 18:36) Kaya ibinilang sindang kaiwal asin pinersegir kan estadong Komunista. Pero mayong ideolohiya an makakapugol sa Tataramon nin Diyos na maabot an puso kan sadiyosan na mga tawo. Kaya, an saro sa pinakamahalagang nanudan ko sa buhay iyo na pag-abot ki Jehova, “an gabos na bagay posible.”—Mar. 10:27.

Huli sa persekusyon, naglakop an mga Saksi ni Jehova sa Kyrgyzstan. Paano iyan nangyari? Iiniba kan USSR an Siberia sa mga lugar na diyan idinidistiyero an mga kaiwal kan Estado. Kan pinatalingkas na an mga ini, dakul an nagduruman sa Kyrgyzstan asin dara kan pira sa sainda an katotoohan. Saro diyan si Emil Yantzen, na namundag sa Kyrgyzstan kan 1919. Ipinadara siya sa sarong kampo nin puwersahan na pagtrabaho asin diyan siya nakabisto nin mga Saksi. Inako niya an katotoohan asin nagpuli kan 1956. Nag-istar si Emil harani sa Sokuluk, sa dinakulaan kong rehiyon asin diyan nabilog an inot na kongregasyon sa Kyrgyzstan kan 1958.

Pakalihis nin mga sarong taon, nagbalyo si Victor Vinter sa Sokuluk. Pauruutrong nag-agi nin kasakitan an maimbod na brother na ini. Duwang beses siyang nasentensiyahan nin tulong taon na pagkabilanggo huli sa pagdadanay na neutral; dangan ibinilanggo giraray nin sampulong taon, tapos idinistiyero nin limang taon. Sa ibong kaiyan, dai napapundo nin persekusyon an paglakop kan tunay na pagsamba.

MAS NAGRANI SAMO AN KATOTOOHAN

Pag-abot kan taon 1963, mga 160 na an Saksi sa Kyrgyzstan, asin dakul sa sainda an dating taga Germany, Ukraine, asin Russia. Saro sainda si Eduard Varter. Nabawtismuhan siya sa Germany kan 1924 bago idinistiyero. Kan dekada nin 1940, ipinadara siya kan mga Nazi sa sarong kampo de konsentrasyon. Dangan pakalihis nin pirang taon, idinistiyero siya kan mga Komunista. Kan 1961, nagbalyo an maimbod na brother na ini sa banwaan nin Kant na haraning marhay sa banwaan mi.

Nakaistar man sa Kant si Elizabeth Fot, na sarong maimbod na lingkod ni Jehova. Paratahi siya. Matibayon siyang magtahi kaya nagpapatahi sa saiya dawa mga propesyonal arog nin mga doktor saka maestra. Saro sa mga kostumer niya si Aksamai Sultanalieva, na agom nin sarong opisyal sa opisina kan pampublikong piskal. Bado an tuyo ni Aksamai ki Elizabeth pero kadakul siyang hapot dapit sa katuyuhan nin buhay asin sa kamugtakan nin mga gadan. Sinimbag ni Elizabeth nin direkta sa Bibliya an mga hapot kaini. Pag-abot nin panahon, nagin maigot na parahulit kan maugmang bareta si Aksamai.

Kan panahon man na iyan, ninombrahan bilang paraataman nin sirkito si Nikolai Chimpoesh na taga Moldova, asin naglingkod siya sa laog nin haros 30 taon sa asignasyon na iyan. Bako sanang pagbisita sa mga kongregasyon an ginibo ni Nikolai. Siya man an nag-organisar kan pagkopya asin pagdistribwir kan mga literatura ta. Dai nakalampas sa mga awtoridad an mga aktibidad niya. Kaya may nakakapakusog na sadol si Eduard Varter ki Nikolai: “Kun kuwestiyunon kamo kan mga awtoridad, prangka nindong sabihon na an mga literatura ta hali sa headquarters sa Brooklyn. Hilingon nindo nin mata sa mata an opisyal kan KGB. Mayo kamong dapat ikatakot.”—Mat. 10:19.

Dai nahaloy pagkatapos kan pag-uulay na iyan, ipinaapod si Nikolai sa headquarters kan KGB sa Kant. Inistorya niya an sunod na nangyari: “Naghapot an KGB kun sain ta kinukua an mga literatura. Sinabi ko na hali iyan sa Brooklyn. Dai niya aram an isisimbag sako. Pinahali na sana niya ako saka dai na ako utro ipinaapod.” An mga daing takot na Saksing iyan padagos asin maingat na pinalakop an maugmang bareta sa rehiyon mi sa norteng parte kan Kyrgyzstan. Kaya kan dekada nin 1980, nakaabot man giraray sa pamilya mi an mahalagang marhay na katotoohan dapit ki Jehova. An agom kong si Mairambubu an inot na nakadangog kaiyan.

NASABUTAN TULOS NI AGOM NA INI AN KATOTOOHAN

Hali si agom sa Rehiyon nin Naryn kan Kyrgyzstan. Sarong aldaw kan Agosto 1974, nagbisita siya sa harong kan tugang kong babayi asin diyan kami inot na nagkamidbidan. Pakahiling ko pa sana saiya, nagkagusto na ako saiya. Nagpakasal kami kan aldaw man sanang idto.

Kan Enero 1981, kan nagbibiyahe si agom sakay nin bus pasiring sa saudan, nadangog niya an pag-uulay na sinambit sa kapinunan. Gusto ni agom na makanuod nin dakul pa, kaya hinagad niya sa babayi an pangaran asin adres kaini. Sinabi kan babayi na an pangaran niya Apun, pero maingat siya huling ipinagbabawal dawa kan dekada nin 1980 an mga gibuhon kan mga Saksi. Kaya imbes na itao ki agom an adres niya, an adres mi an hinagad niya. Ugmahon si agom pag-abot sa harong.

“Magayunon su mga nadangog ko,” an sabi ni agom. “Sinabi sako nin sarong babayi na madali nang mag-abot an panahon na dai na magagadan an mga tawo. Dawa an layas na mga hayop magigin magaro.” Para sako, garo sana iyan alamat. Kaya sinabi ko: “Halaton ta na sana lugod siyang magdigdi para sabihon niya an mga detalye.”

Nagbisita sa harong si Apun pakalihis nin tulong bulan. Mga pirang beses pa siyang nagbisita asin diyan mi nagkabiristo an pira sa pinakainot na mga Saksing Kyrgyz. An mga sister na ini an nagmuklat samo sa makangangalas na mga katotoohan dapit ki Jehova asin sa katuyuhan niya para sa katawuhan. Ginamit ninda an librong From Paradise Lost to Paradise Regaineda para tukduan kami. Sasaro sana an librong ini sa Tokmok, kaya mano-mano mi iyan na pigkopya para magkaigwa kami kaiyan.

Kaiba sa inot na mga nanudan mi an propesiya sa Genesis 3:15. Mauutob ini paagi ki Jesus bilang an Mesiyanikong Hadi. Mahalagang marhay na mensahe iyan na dapat madangog kan gabos! Mas nakadagdag iyan sa dahilan na makisumaro kami sa pagbalangibog na iyan. (Mat. 24:14) Dai nahaloy, nagpuon nang mabago kan katotoohan sa Bibliya an buhay mi.

MGA PAGTIRIPON ASIN BAWTISMO SA IRAROM NIN PAGBABAWAL

Inimbitaran kami nin sarong brother na mag-atender sa sarong kasal sa Tokmok. Narisa mi tulos ni agom na ibang-iba an paggawi kan mga Saksi. Mayong inumon na de alkohol, saka areglado an kasal. Kabaliktaran iyan kan mga kasalan na naatenderan mi kaidto, na diyan sa parati nagbubururat an mga bisita tapos mandata an mga iginagawi saka an mga sinasabi.

Nag-atender man kami sa pirang pagtiripon kan kongregasyon sa Tokmok. Ginigibo iyan sa kakahuyan pag marahay an panahon. Aram kan mga tugang na minamanmanan kami kan mga pulis, kaya may iinasignar sindang magbantay sa palibot. Pag tiglipot, nagtitiripon kami sa harong nin tugang. Mga pirang beses na may nagduman na mga pulis sa pigtitiripunan mi asin pinagpaliwanag kami kun ano an ginigibo mi. Kan mabawtismuhan kami ni agom kan Hulyo 1982 sa Chüy River, kinaipuhan ming magin maingat. (Mat. 10:16) Padiit-diit na nag-arabot an mga tugang dangan nagtiripon kami sa kadlagan. Nagkanta kami nin sarong kanta na pang-Kahadian asin nagdangog sa pahayag sa bawtismo.

INAPROBETSARAN AN OPORTUNIDAD NA PAHIWASON AN MINISTERYO

Kan 1987, nakiulay sako an sarong brother na dalawon an sarong interesado na nakaistar sa banwaan nin Balykchy. Apat na oras sakay nin tren an biyahe paduman. Pagkatapos nin pirang beses na pagbiyahe sa Balykchy para maghulit, nadiskubre ming kadakul interesado duman. Malinaw na oportunidad ini para pahiwason mi an samong ministeryo.

Parati kaming nagbibiyahe ni agom pa-Balykchy. Haros kada Sabado saka Domingo, yaon kami diyan para maghulit asin magsagibo nin mga pagtiripon. Dai nahaloy, kadakul nang gustong magbasa kan mga publikasyon. Dinadara mi haling Tokmok an mga publikasyon na nakalaag sa mishok, na sarong sakong ginagamit sa pagpaktora nin patatas. An duwang sako na pano nin literatura kada bulan haros dai pa magkaigo. Dawa nagbibiyahe kami sa tren pasiring asin hali sa Balykchy, nakakapaghulit kami sa mga pasahero.

Kan 1995, nabilog an sarong kongregasyon sa Balykchy—walong taon pakalihis kan inot ming pagdalaw sa banwaan na iyan. Magastos an pabalik-balik na pagbiyahe sa Tokmok asin Balykchy. Limitado an pagbuhay mi, kaya paano mi iyan nagibo? May brother na regular na nagtatao samo nin kuwarta para mahipnuan an mga pangangaipo mi. Nahiling ni Jehova na gustong-gusto ming pahiwason an samong ministeryo, kaya binuksan niya an “mga bintana nin kalangitan” para sa samo. (Mal. 3:10, An Marahay na Bareta Biblia) Totoo nanggad na para ki Jehova an gabos na bagay posible!

NAGIN SIBOT SA PAGPAMILYA ASIN PAGMIMINISTERYO

Kan 1992, ninombrahan ako bilang elder. Ako an inot na Kyrgyz na nagin elder sa nasyon. Nagkaigwa nin bagong mga oportunidad nin paghuhulit sa samuyang kongregasyon sa Tokmok. May mga eskuwelahan sa lugar mi asin dakul na estudyante diyan an nagin Bible study mi. An saro sa sainda naglilingkod na ngunyan sa Branch Committee, asin may duwang nagin espesyal payunir. Hininguwa mi man na tabangan an iba sa samuyang mga pagtiripon. Kan inot na mga taon kan dekada nin 1990, nasa lengguwaheng Russian an mga publikasyon asin mga pagtiripon mi. Pero nagdadakul sa kongregasyon an mga nagtataram nin Kyrgyz bilang kinagimatan nindang lengguwahe. Kaya nag-interpret ako para sa sainda tanganing mas madali nindang masabutan an katotoohan.

Nagin sibot man kami ni agom sa pag-asikaso sa nagdadakula ming pamilya. Iiniiba mi an mga aki sa paghuhulit asin sa mga pagtiripon kan kongregasyon. Gustong-gusto kan aki ming babayi na si Gulsayra—na 12 anyos pa sana kaidto—na makipag-ulay sa mga nag-aagi sa tinampo asin istoryahan sinda dapit sa Bibliya. Saka gustong-gusto man kan mga aki mi na magtuom nin mga teksto. Paagi kaini, nagin sibot sa mga aktibidad sa kongregasyon an mga aki mi asin, kan huri, an mga makuapo mi. Sa 9 na aki asin 11 makuapo ming buhay pa, 16 an naglilingkod ki Jehova o nag-aatender sa mga pagtiripon kaiba kan saindang mga magurang.

PAMBIHIRANG MGA PAGBABAGO

An mga namumutan ming kapagtubod na nagpuon kan gibuhon ni Jehova sa lugar mi kan dekada nin 1950 mangangalas pag nahiling ninda an mga pagbabagong nangyari. Halimbawa, puon kan dekada nin 1990, mas libre na kaming nakakapaghulit kan maugmang bareta asin nakakapagsagibo nin darakulang pagtiripon.

Kan 1991, nag-atender kami ni agom sa kainot-inuting kumbensiyon sa Alma-Ata, na Almaty na ngunyan, sa Kazakhstan. Asin kan 1993, inorganisar kan mga tugang sa Kyrgyzstan an inot na kumbensiyon na ginibo sa Spartak Stadium sa Bishkek. Bago an kumbensiyon, sarong semanang lininigan kan mga parahayag an istadyum. Naghangang marhay an direktor kaya ipinagamit niya samo nin libre an mga pasilidad.

Kan 1994, nagkaigwa na man nin sarong mahalagang pangyayari—nagpuon na mag-imprenta nin mga publikasyon sa lengguwaheng Kyrgyz. Regular na ngunyan na itinatradusir nin sarong translation team an mga literatura sa lengguwaheng Kyrgyz sa sangang opisina sa Bishkek. Apuwera kaiyan, kan 1998, legal nang minidbid an gibuhon kan mga Saksi sa Kyrgyzstan. Nagdakula an organisasyon, asin ngunyan labi na kaming 5,000 na parahayag. May 83 na digding kongregasyon asin 25 grupo sa lengguwaheng Chinese, Ingles, Kyrgyz, Russian, Russian Sign Language, Turkish, Uighur, asin Uzbek. An gabos na namumutan na mga brother na ini nagkakasararong naglilingkod ki Jehova dawa iba-iba an saindang kultura asin pinaghalian. Pinangyari ni Jehova na magin posible an gabos na pambihirang pagbabagong ini.

Binago man ni Jehova an buhay ko. Nagdakula ako sa tios na pamilya nin mga parauma saka limang taon sana akong nag-eskuwela. Pero, ginamit ako ni Jehova na maglingkod bilang elder asin magtukdo nin mga katotoohan sa Bibliya sa mga tawong mas may inadalan kisa sako. Iyo, pinangyari ni Jehova an mga bagay na talagang dai ko inaasahan na mangyayari. Napapahiro ako kan mga eksperyensiya ko na padagos na maimbod na magpatotoo dapit ki Jehova, an saro na “an gabos na bagay posible.”—Mat. 19:26.