Bagong Miyembro kan Namamahalang Grupo

KAN Miyerkules nin aga, Enero 24, 2018, naugma an pamilyang Bethel kan Estados Unidos asin kan Canada huli sa sarong espesyal na paisi: Si Brother Kenneth Cook, Jr., idinagdag sa Namamahalang Grupo kan Mga Saksi ni Jehova.

Namundag asin nagdakula si Brother Cook sa Pennsylvania, U.S.A. Nanudan niya an katotoohan sa sarong kaklase kan madali na sindang maggradwar sa hayskul asin nabawtismuhan siya kan Hunyo 7, 1980. Nagpuon siya sa bilog na panahon na paglilingkod bilang regular payunir kan Setyembre 1, 1982. Pagkatapos magpayunir nin duwang taon, inimbitaran siya sa Bethel. Nagpuon siyang maglingkod sa Bethel sa Wallkill, New York kan Oktubre 12, 1984.

Sa suminunod na 25 taon, naglingkod si Brother Cook sa manlain-lain na asignasyon sa Printery asin sa Bethel Office. Nagpakasal sinda ni Jamie kan 1996, asin naglingkod na man ini sa Bethel sa Wallkill. Kan Disyembre 2009, ibinalyo si Brother asin Sister Cook sa Watchtower Educational Center sa Patterson, New York, na diyan iinasignar si Brother Cook sa Writing Correspondence Department. Kan Abril 2016, pagkatapos maglingkod giraray sa pasilidad sa Wallkill nin halipot na panahon, ibinalyo si Brother asin Sister Cook sa Brooklyn, New York. Pakalihis nin limang bulan, nagbalyo sinda sa world headquarters sa Warwick, New York. Kan Enero 2017, ninombrahan si Brother Cook na maglingkod bilang paratabang sa Writing Committee kan Namamahalang Grupo.