“Mag-ingat Kamo na Dai Kamo Mabihag nin Siisay Man”!

1. Sigun sa Colosas 2:4, 8, paano hinihinguwa ni Satanas na mabihag an satong isip?

GUSTO ni Satanas na talikdan niyato si Jehova. Tanganing magibo iyan, hinihinguwa niyang impluwensiyahan an satong isip asin sa siring mabihag niya iyan asin magin masinunod sa saiya. Hinihinguwa niyang kumbinsiron o dayaon kita na sumunod sa saiya paagi sa paggamit nin mga bagay na nakakaakit sa sato.—Basahon an Colosas 2:4, 8.

2-3. (a) Taano ta dapat niyatong tawan nin atensiyon an patanid na mababasa sa Colosas 2:8? (b) Ano an pag-uulayan niyato sa artikulong ini?

² Talaga daw na namemeligro kitang marhay na madaya ni Satanas? Iyo nanggad! Tandaan na an patanid na nasa Colosas 2:8 isinurat ni Pablo bako para sa mga bakong kapagtubod. Isinurat niya iyan para sa mga Kristiyanong linahidan nin banal na espiritu. (Col. 1:2, 5) An mga Kristiyanong idto nameligrong madaya, pero mas urog kitang namemeligro ngunyan. (1 Cor. 10:12) Taano? Huling ihinulog si Satanas sa daga, asin nagmamaigot siyang marhay sa pandadaya sa maimbod na mga lingkod nin Diyos. (Kap. 12:9, 12, 17) Dugang pa, nabubuhay kita sa panahon na an maraot na mga tawo asin impostor ‘lalo pang nagigin maraot.’—2 Tim. 3:1, 13.

³ Sa artikulong ini, pag-uulayan niyato kun paano ginagamit ni Satanas an “mapandaya pero daing saysay na mga ideya” tanganing impluwensiyahan an satong kaisipan. Aaramon niyato an tulo sa saiyang mga “tusong gibo-gibo,” o “mga pakana.” (Efe. 6:11; nota sa ibaba.) Dangan sa masunod na artikulo, pag-uulayan niyato kun paano hahalion an ano man na maraot na epekto kan saiyang mga taktika na tibaad nakakaapektar sa satong kaisipan. Pero pag-ulayan ta nguna kun ano an manunudan niyato kan dayaon ni Satanas an mga Israelita pagkalaog ninda sa Dagang Panuga.

TINENTARAN NA MAGSAGIBO NIN IDOLATRIYA

4-6. Sigun sa Deuteronomio 11:10-15, anong pagbabago sa mga pamamaagi nin pagtanom an kinaipuhan na gibuhon kan mga Israelita kan mag-istar na sinda sa Dagang Panuga?

⁴ May katusuhan na tinentaran ni Satanas an mga Israelita na magsagibo nin idolatriya. Paano niya iyan ginibo? Inaprobetsaran niya an saindang pangangaipo nin kakanon. Kan makalaog na sa Dagang Panuga an mga Israelita, kinaipuhan nindang baguhon an mga pamamaagi ninda sa pagtanom. Kan nasa Ehipto sinda, pinapatubigan ninda an saindang mga pananom gamit an tubig hali sa Nilo. Pero sa Dagang Panuga, an sistema nin agrikultura nakadepende bako sa tubig na kinukua sa mga salog, kundi sa tubig na nakukua sa panahon nin tig-uran, pati man sa ambon, o tûnog, na nagbabaribi sa mga pananom. (Basahon an Deuteronomio 11:10-15; Isa. 18:4, 5) Kaya kaipuhan kan mga Israelita na makanuod nin bagong mga pamamaagi sa pagtanom. Dai iyan magigin pasil huling an kadaklan sa mga may eksperyensiya sa pagtanom nagadan na sa kaawagan.

⁵ Ipinaliwanag ni Jehova sa saiyang banwaan na nagbago na an sitwasyon ninda. Dangan idinagdag niya an minasunod na patanid na sa inot na hiling garo mayo man koneksiyon sa agrikultura: ‘Mag-ingat kamo, tibaad madaya an saindong puso, tibaad magsuway kamo, maglingkod sa ibang mga diyos asin magsamba sainda.’ (Deut. 11:16, 17, An Banal na Biblia) Taano ta nagpatanid si Jehova laban sa pagsamba sa palsong mga diyos mantang nagtataram siya mapadapit sa pag-adal nin bagong mga pamamaagi sa pagtanom?

⁶ Aram ni Jehova na matetentaran an mga Israelita na magpatukdo sa mga pagano sa palibot ninda dapit sa nagkapirang pamamaagi nin pagtanom sa lugar na iyan. Siyempre kumpara sa mga Israelita, mas eksperyensiyadong marhay an mga pagtaraid ninda, asin makakanuod sa sainda an banwaan nin Diyos nin nagkapirang kapaki-pakinabang na kakayahan. Pero may peligro. An kaisipan kan mga paraumang Canaanita impluwensiyado kan pagsamba ninda ki Baal. Naniniwala sinda na si Baal an kagsadiri kan langit asin paratao nin uran. Habo ni Jehova na madaya an saiyang banwaan kan siring na palsong mga paniniwala. Alagad pauruutrong pinili kan mga Israelita na magsamba ki Baal. (Bil. 25:3, 5; Hok. 2:13; 1 Ha. 18:18) Ngunyan risahon kun paano nabihag ni Satanas an mga Israelita.

TULONG TAKTIKA NA GINAMIT NI SATANAS TANGANING MABIHAG AN MGA ISRAELITA

7. Paano nabalo an pagtubod kan mga Israelita paglaog ninda sa Dagang Panuga?

⁷ An inot na taktika na ginamit ni Satanas iyo an pag-aprobetsar sa normal na pagmawot na mahiling an daga na nababaribian nin uran. Kada taon, bihira asin dikiton na marhay an uran sa Dagang Panuga puon sa huring kabtang kan Abril sagkod Setyembre. Tanganing may suplay sinda nin kakanon asin magin abunda an ani, kaipuhan na marhay an panahon nin tig-uran na sa parati nagpupuon pag mga Oktubre. Dinaya ni Satanas an mga Israelita na maniwala na tanganing magdakul an ani, kaipuhan nindang arugon an mga kaugalian kan mga paganong tawo sa palibot ninda. Naniniwala an mga pagano na kaipuhan nin partikular na mga ritwal tanganing magpauran an saindang mga diyos. An mga kulang an pagtubod ki Jehova naniwala na iyo sana ini an paagi tangani na malikayan an halawig na tigmara, kaya nagsagibo sinda nin paganong mga ritwal para sa palsong diyos na si Baal.

8. Ano an ikaduwang taktika na ginamit ni Satanas? Ipaliwanag.

⁸ Naggamit si Satanas nin ikaduwang taktika sa mga Israelita. Inaprobetsaran niya an saindang imoral na mga pagmawot. An paganong mga nasyon nagsasamba sa saindang mga diyos paagi sa makababalding imoral na mga gibo. Kaiba sa biribid na porma nin pagsambang ini an prostitusyon nin mga babayi asin lalaki sa templo. An homoseksuwalidad asin an iba pang porma nin seksuwal na imoralidad dai lang kinonsinte kundi nagin normal na sana! (Deut. 23:17, 18; 1 Ha. 14:24) Naniniwala an mga pagano na kun gigibuhon ninda an mga ritwal na ini, papangyarihon kan saindang mga diyos na magin mataba an daga. Dakul na Israelita an naakit kan imoral na mga ritwal na ini kan mga pagano asin pinabayaan na madara sinda kaiyan na maglingkod sa palsong mga diyos. Pero an totoo, nabihag sinda ni Satanas.

9. Kauyon kan Oseas 2:16, 17, paano pinangyari ni Satanas na magin malabog sa isip kan mga Israelita kun siisay talaga si Jehova?

⁹ Naggamit si Satanas nin ikatulong taktika. Pinangyari niyang magin malabog sa isip kan mga Israelita kun siisay talaga si Jehova. Kan panahon ni propeta Jeremias, sinabi ni Jehova na pinangyari kan palsong mga propeta na malingawan kan banwaan ni Jehova an Saiyang pangaran “huli ki Baal.” (Jer. 23:27) Minalataw na nagpundo an banwaan nin Diyos sa paggamit kan pangaran ni Jehova, imbes ginamit ninda an pangaran na Baal, na nangangahulugan na “Kagsadiri” o “Kagurangnan.” Huli kaiyan, nagin malabog sa mga Israelita an pagkakalain ni Jehova asin ni Baal, kaya nagin madali na sana sa sainda na isalak sa pagsamba ki Jehova an mga ritwal sa pagsamba ki Baal.—Basahon an Oseas 2:16, 17.

MGA TAKTIKA NI SATANAS NGUNYAN

10. Anong mga taktika an ginagamit ngunyan ni Satanas?

¹⁰ Ginagamit ni Satanas an iyo man sanang mga taktika ngunyan. Binibihag niya an mga tawo paagi sa pag-aprobetsar sa normal na mga pagmawot, pagpaluwas na normal na sana an seksuwal na imoralidad, asin pagpangyaring magin malabog sa mga tawo kun siisay talaga si Jehova. Pag-ulayan nguna niyato an huring taktikang iyan.

11. Paano pinangyari ni Satanas na magin malabog sa mga tawo kun siisay talaga si Jehova?

¹¹ Pinapangyari ni Satanas na magin malabog sa mga tawo kun siisay talaga si Jehova. Pagkagadan kan mga apostol ni Jesus, nagpuon na magpalakop nin palsong mga katukduan an nagkapirang naghihingakong Kristiyano. (Gibo 20:29, 30; 2 Tes. 2:3) Pinangyari kan mga apostatang ini na magin malabog sa mga tawo kun siisay talaga an iyo sanang tunay na Diyos. Halimbawa, dai na ninda ginamit an pangaran nin Diyos sa pagkopya ninda kan Bibliya asin mas pinili an mga tataramon na arog kan “Kagurangnan.” Kan halion ninda an personal na pangaran nin Diyos asin salidahan iyan nin “Kagurangnan,” nagin dipisil sa mga nagbabasa nin Bibliya na mahiling kun paano napapalain si Jehova sa iba pang mga “kagurangnan” na sinambit sa Kasuratan. (1 Cor. 8:5) Ginamit ninda pareho ki Jehova asin ki Jesus an terminong “Kagurangnan,” kaya nagin dipisil na masabutan na si Jehova asin an saiyang Aki magkaibang indibidwal na may magkalain na katungdan. (Juan 17:3) An pagkaribong na ini nakakontribwir sa pagpuon kan doktrina nin Trinidad—sarong doktrina na dai itinutukdo kan Tataramon nin Diyos. Bilang resulta, iniisip kan dakul na an Diyos misteryoso asin imposible daa na mamidbid siya. Kaputikan nanggad iyan!—Gibo 17:27.

12. Ano an pinalakop kan palsong relihiyon, asin arog kan ipinaliwanag sa Roma 1:28-31, ano an nagin resulta kaiyan?

¹² Inaaprobetsaran ni Satanas an imoral na mga pagmawot. Kan panahon kan suanoy na Israel, ginamit ni Satanas an palsong relihiyon tanganing palakupon an imoralidad. Arog man kaiyan an ginigibo niya ngunyan. Kinukunsinti kan palsong mga relihiyon asin inuuyunan pa ngani an imoral na mga paggawi. Bilang resulta, dakul na naghihingakong naglilingkod sa Diyos an binabaliwala na an saiyang malinaw na mga pamantayan sa moral. Ilinadawan ni apostol Pablo sa saiyang surat sa mga taga Roma an nagin resulta kaiyan. (Basahon an Roma 1:28-31.) Kaiba sa mga “bagay na dai maninigo” an gabos na porma nin seksuwal na imoralidad, arog nin homoseksuwalidad. (Roma 1:24-27, 32; Kap. 2:20) Importante nanggad na magsunod kita sa malinaw na mga katukduan kan Bibliya!

13. Ano an saro pang taktika na ginagamit ni Satanas?

¹³ Inaaprobetsaran ni Satanas an normal na mga pagmawot. May natural kitang pagmawot na makanuod nin mga kakayahan o skill na makakatabang sa sato na masuportaran an satong sadiri asin pamilya. (1 Tim. 5:8) Sa parati, puwede tang manudan an mga kakayahan na iyan paagi sa mahigos na pag-eskuwela. Pero dapat kitang mag-ingat. An sistema nin edukasyon sa dakul na nasyon tinutukduan an mga estudyante bako sana nin praktikal na mga kakayahan kundi pati man nin pilosopiya nin tawo. Ineengganyar an mga estudyante na kuwestiyunon an pag-eksister nin Diyos asin na baliwalaon an Bibliya. Itinutukdo sa sainda na an teoriya nin ebolusyon an solamenteng lohikal na eksplikasyon kun paano nagpuon an buhay. (Roma 1:21-23) An siring na mga katukduan kontra sa “kadunungan nin Diyos.”—1 Cor. 1:19-21; 3:18-20.

14. Ano an nakukultibar kan pilosopiya nin tawo?

¹⁴ Binabaliwala o kinokontra kan pilosopiya nin tawo an matanos na mga pamantayan ni Jehova. An nakukultibar kaiyan bako an bunga kan espiritu nin Diyos, kundi “an mga gibo kan laman.” (Gal. 5:19-23) Huli kaiyan, nagigin mapalangkaw asin arogante an mga tawo, kaya nagigi sindang “interesado na sana sa sadiri nindang kapakanan.” (2 Tim. 3:2-4) An mga kuwalidad na ini kabaliktaran kan kahuyuan asin kapakumbabaan na dapat yaon sa mga lingkod nin Diyos. (2 Sam. 22:28) May mga Kristiyanong nagkua nin halangkaw na edukasyon na namolde an isip kan kaisipan nin tawo imbes na kan kaisipan nin Diyos. Pag-ulayan niyato an sarong halimbawa kun ano an puwedeng mangyari.

15-16. Ano an nanudan mo sa eksperyensiya nin sarong sister?

¹⁵ Sarong sister na labi nang 15 taon sa bilog na panahon na paglilingkod an nagsabi: “Bilang bawtisadong Saksi, nabasa asin nadangog ko na an mapadapit sa mga peligro kan pagkua nin halangkaw na edukasyon, pero binaliwala ko iyan. Inisip ko na bakong aplikado sako an konsehong iyan.” Anong mga kadipisilan an napaatubang sa saiya? Sinabi niya: “Nangaipo nin dakulon na panahon asin kusog an pag-eskuwela ko kaya mayo na akong panahon na mamibi ki Jehova arog kan dati, pagalon na ako para ma-enjoy na makipag-ulay sa iba dapit sa Bibliya asin makaandam na marhay para sa mga pagtiripon. Marahay na sana ta kan marealisar kong nararaot kan pagigin sibot ko sa halangkaw na edukasyon an relasyon ko ki Jehova, aram kong kaipuhan ko nang magpundo. Asin iyan an ginibo ko.”

¹⁶ Paano naapektaran kan halangkaw na edukasyon an kaisipan kan sister? Nagsimbag siya: “Nakakasupog man na admitiron pero dahil sa pag-eskuwela sa unibersidad nagin mapagkritika ako sa iba, lalo na sa mga tugang, halangkawon an inaasahan ko sa sainda, asin isinuway ko an sadiri ko sa sainda. Kinaipuhan ko nin halawig na panahon para mahali an kaisipan na iyan. Dahil sa eksperyensiyang iyan, nahiling ko kun gurano kapeligroso na baliwalaon an mga patanid na itinatao kan satong Ama sa langit paagi kan saiyang organisasyon. Mas midbid ako ni Jehova kisa sa pakamidbid ko sa sadiri ko. Kun nagdangog lang kuta ako sa saiya kaidto!”

17. (a) Ano an dapat na magin determinasyon niyato? (b) Ano an pag-uulayan niyato sa masunod na artikulo?

¹⁷ Magin determinado na dai nanggad mabihag ni Satanas “paagi sa pilosopiya asin sa mapandaya pero daing saysay na mga ideya” kan saiyang kinaban. Padagos na magin mapagbantay sa mga taktika ni Satanas. (1 Cor. 3:18; 2 Cor. 2:11) Dai nanggad pagtugutan na dahil ki Satanas magin malabog sa isip mo kun siisay talaga si Jehova. Mamuhay kauyon kan halangkaw na mga pamantayan ni Jehova sa moral. Asin dai tugutan na dayaon ka ni Satanas na baliwalaon an mga sadol ni Jehova. Pero paano kun marisa mong naimpluwensiyahan ka na kan kaisipan kan kinaban na ini? Ipapahiling kan masunod na artikulo kun paano kita matatabangan kan Tataramon nin Diyos na halion dawa an mga kaisipan asin ugali na “nakagamot na nin marigon.”—2 Cor. 10:4, 5.