Mga Paghukom nin Diyos—Pirmi Daw Siyang Nagtatao nin Igong Patanid?

INAANALISAR nin sarong weather forecaster an nabibilog na imahe sa radar. May nahiling siyang sarong peligrosong bagyo na marikas na paparani sa sarong lugar na may dakulang populasyon. Huling iniisip niya an kaligtasan kan mga tawo, ginibo niya an gabos na paagi para patanidan sinda bago mahuri an gabos.

Sa kaagid na paagi, pinapatanidan ngunyan ni Jehova an mga nakaistar sa daga dapit sa sarong “bagyo” na mas peligroso nanggad kisa sa ano man na tibaad madangog nindang bareta dapit sa kamugtakan nin panahon. Paano niya iyan ginigibo? Asin taano ta makakasigurado kita na tinatawan niya an mga tawo nin igong panahon na makapag-andam? Para masimbag iyan, pag-ulayan ta nguna an nagkapirang patanid na itinao kaidto ni Jehova.

PAG NAGTATAO KAIDTO NIN MGA PATANID AN DIYOS

Kan mga panahon kan Bibliya, nagpatanid si Jehova dapit sa manlain-lain na “bagyo,” o mga paghukom, na ipapaabot niya sa mga tuyong nagsusuway sa saiyang mga pagbuot. (Tal. 10:25, BPVa; Jer. 30:23) Sa lambang kaso, iniimpormaran na niya haloy pa an maaapektaran na mga tawo asin sinasabi sa sainda na gumibo nin mga pagbabago na kauyon kan saiyang kabutan. (2 Ha. 17:12-15; Neh. 9:29, 30) Tanganing tabangan sindang gibuhon iyan, sa parati ginagamit niya an saiyang maimbod na mga lingkod sa daga tanganing ipaisi an saiyang mga paghukom asin ipasabot sa mga tawo na kaipuhan na nindang humiro tulos.—Amos 3:7.

Saro si Noe sa maimbod na mga lingkod na iyan. Sa laog nin dakul na taon, kusog-buot niyang pinatanidan an imoral asin madahas na mga tawo kan panahon niya mapadapit sa papaabot na pangglobong Baha. (Gen. 6:9-13, 17) Sinabi niya man sa sainda kun ano an kaipuhan na gibuhon tanganing makaligtas—maigot niyang ginibo iyan kaya pag-abot nin panahon inapod siyang “sarong parahulit nin katanusan.”—2 Ped. 2:5.

Sa ibong kan mga paghihinguwa ni Noe, binaliwala kan mga tawo kan panahon bago an Baha an saiyang mensahe na hali sa Diyos. Nagpahiling sinda nin grabeng kawaran nin pagtubod. Bilang resulta, nagadan sinda kan an Delubyo “uminabot . . . asin inaranod sinda gabos.” (Mat. 24:39; Heb. 11:7) Kan mag-abot na an saindang katapusan, dai nanggad ninda masasabi na dai sinda pinatanidan nin Diyos.

Sa ibang mga pagkakataon, nagpatanid si Jehova halipot na panahon bago magpuon an “bagyo” kan saiyang paghukom. Dawa arog kaiyan, sinigurado niya na an mga tawong maaapektaran matatawan nin igong panahon na makaandam. Halimbawa, nagtao siya nin patiinot na mga patanid durante kan Sampulong Damat na nagpasakit sa suanoy na Ehipto. Bilang halimbawa, isinugo ni Jehova si Moises asin Aaron ki Faraon tanganing patanidan ini asin an mga lingkod kaini mapadapit sa ikapitong damat, an mapandestrosong bagyong yelo. Sa sunod na aldaw na an bagyo, kaya igo daw an panahon na itinao nin Diyos para makahanap sinda nin pailihan asin makaligtas sa bagyo? Sinabi kan Bibliya: ‘Natakot sa itinaram [ni Jehova] an ibang mga opisyal kan hadi, kaya pinasirong ninda an saindang mga uripon asin mga hayop. Alagad an iba dai natakot sa patanid [ni Jehova] kaya pinabayaan sa kaumahan an saindang mga uripon asin mga hayop.’ (Ex. 9:18-21, BPV) Malinaw na tinawan sinda ni Jehova nin igong patanid, kaya an mga huminiro tulos dai nagsapar nin grabeng danyos arog kan iba.

Pinatanidan man si Faraon asin an mga lingkod niya bago mangyari an ikasampulong damat. Alagad, binaliwala ninda an patanid. (Ex. 4:22, 23) Bilang resulta, nagkagaradan an saindang mga panganay na aking lalaki. Nakakamundo nanggad! (Ex. 11:4-10; 12:29) Magigibo daw kuta nindang masunod an patanid bago mahuri an gabos? Iyo nanggad! Pinatanidan tulos ni Moises an mga Israelita mapadapit sa papaabot na ikasampulong damat asin ininstruksiyunan sinda kun paano ililigtas an saindang pamilya. (Ex. 12:21-28) Pirang tawo an nagdangog sa patanid? Sigun sa pirang pagtantiya, tulong milyon na tawo, kaiba diyan an mga Israelita asin an “sarong dakulang grupo” nin mga bakong Israelita saka mga Ehipsiyo, an nakaligtas sa paghukom nin Diyos asin naghali sa Ehipto.—Ex. 12:38, NW.

Arog kan ipinapahiling kan mga halimbawang ini, pirming sinisiyerto ni Jehova na may igong panahon an mga tawo na magdangog sa saiyang mga patanid. (Deut. 32:4) Ano an motibo nin Diyos sa paggibo kaiyan? Sinabi ni apostol Pedro na “habo [kaya ni Jehova na] malaglag an siisay man, imbes, gusto niya na an gabos magkaigwa nin oportunidad na magsulsol.” (2 Ped. 3:9) Iyo, nagmamalasakit an Diyos sa mga tawo. Gusto niya na magsulsol sinda asin humiro kauyon kan saiyang sadol bago mag-abot an saiyang paghukom.—Isa. 48:17, 18; Roma 2:4.

PAGDANGOG SA PATANID NIN DIYOS NGUNYAN

Sa panahon ta ngunyan, gabos na tawo dapat man na magdangog sa sarong apuradong patanid na ipinapaisi ngunyan sa bilog na daga. Kan nasa daga si Jesus, nagpatanid siya na pag-abot nin panahon an presenteng sistema nin mga bagay lalaglagon sa panahon nin “grabeng kasakitan.” (Mat. 24:21) Mapadapit sa paghukom na iyan sa maabot na panahon, nagtao siya nin detalyadong propesiya na diyan sinabi niya kun ano an aasahan kan saiyang mga parasunod na mahihiling asin maeeksperyensiyahan ninda mantang paparani an panahon na iyan. Kaya sinaro-saro ni Jesus an mahalagang mga pangyayari sa bilog na kinaban na nahihiling tang nangyayari ngunyan.—Mat. 24:3-12; Luc. 21:10-13.

Kauyon kan propesiyang iyan, dinadagka na ngunyan ni Jehova an gabos na magpasakop sa Saiyang mamumuton na pamamahala. Mawot niya na maeksperyensiyahan kan masinunod na mga tawo an mas marahay na buhay ngunyan pati man an mga bendisyon na makakamtan sa saiyang matanos na bagong kinaban. (2 Ped. 3:13) Tanganing tabangan kitang magtubod sa saiyang mga panuga, nagtao si Jehova nin nagliligtas-buhay na mensahe—an ‘maugmang bareta kan Kahadian,’ na ihinula ni Jesus na “ihuhulit sa bilog na kinaban bilang patotoo sa gabos na nasyon.” (Mat. 24:14) Inorganisar nin Diyos an saiyang tunay na mga parasamba tanganing itao an ‘patotoong’ ini, o ihulit an mensaheng ini na hali sa Diyos, sa mga 240 kadagaan. Gusto ni Jehova na magdangog sa patanid an pinakadakul na tawong posible tanganing makaligtas sinda sa papaabot na “bagyo” kan saiyang matanos na paghukom.—Sof. 1:14, 15; 2:2, 3.

Kun siring, an mahalagang marhay na hapot bako kun baga tinatawan ni Jehova nin igong panahon an mga tawo na magdangog sa saiyang mga patanid. Base sa mga ebidensiya, iyan an pirming ginigibo niya. Imbes, an mahalagang hapot: Magdadangog daw an mga tawo sa patanid nin Diyos mantang igwa pa nin panahon? Lugod na bilang mga mensahero nin Diyos, padagos niyatong tabangan an pinakadakul na tawong posible na makaligtas sa katapusan kan sistemang ini nin mga bagay.