Aram Mo Daw?

Ano an papel kan mga katiwala kan mga panahon kan Bibliya?

KAN mga panahon kan Bibliya, an katiwala an nagmamanehar sa harong o pagsadiri nin iba. An Hebreo asin Griegong mga termino na trinadusir na “katiwala” kun minsan nanunungod sa sarong paraataman o mayordomo sa harong.

Kan si Jose, na aki kan patriyarkang si Jacob, uripon sa Ehipto, nagi siyang katiwala kan bilog na harong kan saiyang kagurangnan. Sa katunayan, ‘ipinabaya [kan saiyang Ehipsiyong kagurangnan] an gabos niyang pagsadiri sa kamot ni Jose.’ (Gen. 39:2-6) Pag-abot nin panahon, kan si Jose mismo nagin makapangyarihan na tagapamahala sa Ehipto, nagnombra siya nin sarong katiwala sa bilog niyang harong.—Gen. 44:4.

Kan panahon ni Jesus, sa parati an mga hasyendero nakaistar sa mga siyudad harayo sa saindang mga hasyenda. Kaya nagnonombra an mga hasyendero nin mga katiwala tanganing pangatamanan an pang-aroaldaw na mga trabaho kan mga trabahador na nag-aasikaso sa mga dagang ini.

Siisay an kuwalipikadong magin katiwala? An inot na siglong Romanong parasurat na si Columella nagsabi na an sarong uripon na ninombrahan na magin paraataman, o katiwala, dapat na “saro na prubado na nin mga eksperyensiya.” Siya sarong tawong “igwa kan mga kuwalidad na pag nagpahiling siya nin awtoridad, dai siya magigin pabaya asin maringis.” Sinabi pa niya: “Ini an urog sa gabos na dapat na igwa siya—dai siya mag-isip na aram niya an mga bagay na dai niya man talaga aram, asin dapat na gustong-gusto niya pirming makanuod.”

Ginagamit kan Tataramon nin Diyos an halimbawa asin trabaho nin katiwala tanganing iilustrar an nagkapira sa mga aktibidad sa Kristiyanong kongregasyon. Halimbawa, dinadagka ni apostol Pedro an mga Kristiyano na gamiton an saindang mga kakayahan na itinao nin Diyos “sa paglilingkod sa lambang saro bilang mahusay na mga katiwala kan daing kapantay na kabuutan nin Diyos.”—1 Ped. 4:10.

Ginamit mismo ni Jesus an halimbawa nin sarong katiwala sa ilustrasyon na nasa Lucas 16:1-8. Apuwera kaiyan, sa sarong propesiya mapadapit sa tanda kan saiyang presensiya bilang Hadi, siniyerto ni Jesus sa saiyang mga parasunod na manombra siya nin “maimbod asin mapagmansay na uripon,” o “maimbod na katiwala.” An panginot na asignasyon kan katiwala iyo na magtao nin dagos-dagos na suplay nin espirituwal na kakanon para sa mga parasunod ni Cristo sa panahon kan katapusan. (Mat. 24:45-47; Luc. 12:42) Nagpapasalamat kita na kabilang kita sa mga nag-aako kan nakakapakusog sa pagtubod na mga publikasyon na ipinepreparar kan maimbod na katiwala asin pinapagin posibleng makua sain man sa kinaban.