Pag-aatubang kan Maogmang Bareta—Sa Panahon kan Kapiyestahan
1 Sa panahon na ini kan taon an dakol naghihingoang maogma sa ibong kan mga problema sa kinaban na ini. Nagkaigwa na daw kamo nin negatibong kaisipan manongod sa paghihingoang maghulit sa siring na mga tawo sa panahon na ini nin risang kasibotan? Sa ibong kan mga pagpalabilabi na uso sa panahon kan kapiyestahan, an isip nin dakol nasa Dios mantang nadadangog ninda an paorootrong mga tataramon na “Katoninongan sa daga, marahay na boot sa mga tawo.”
2 Sierto na makakanompong kita nin mga tawo na talagang sibot sa panahon kan kapiyestahan. Ini magkakaipo kan satong konsiderasyon. Kan si Jesus nasa daga, bako sanang minidbid nia an saboot nin iba asin naherak sa sainda kundi naghingoa man na tabangan sinda. An mga tawo ngonyan igwa man kan kaparehong pangangaipo sa mensahe kan Kahadean.—Mat. 9:36, 37.
3 Kun minaatubang sato an kagharong, pagmaigotan na magin makonsiderasyon. Sibot daw sia sa pag-istimar nin mga bisita? Kun siring tibaad pinakamarahay na gibohon na halipot sana an saindong pag-aatubang. Sa ibang kaso tibaad marisa nindo na bako man na gayong sibot an kagharong asin puwede nindong mataktikang ipagpadagos an pagpatotoo.
ANO DAW AN SASABIHON NINDO?
4 Pakatapos nin makikatood na introduksion, puwede nindong sabihon: “Kadakol kan sinasabi ngonyan manongod sa katoninongan sa daga asin marahay na boot sa mga tawo. Naisip na daw nindo kun baga maabot an tunay na katoninongan sa daga?” Pasimbagon an kagharong, dangan dumagos sa saindong pag-aatubang asin alok na babasahon.
5 Kun angay an mas halipot na pag-aatubang, puwede nindong sabihon: “Sa panahon na ini kan taon, naririsa mi na an dakol iniisip-isip an pagkamundag ni Jesus. Idto napakahalaga nanggad na okasyon. Puwede ko daw na ipaheling saindo an sinasabi kan Biblia manongod sa saro pang mahalagang okasyon—an pagdatong kan Kahadean nin Dios? Si Jesus mismo an nagsabi . . . [Basahon an Mateo 6:33.].” Dangan ialok an presenteng alok, na itinatampok an sarong punto manongod sa Kahadean.
6 Kun taratarahon kita na maogma logod kita sa kapiyestahan, dai kaipuhan na gibohon na isyu an saindang pataratara. Imbes, puwede niato sindang pasalamatan sa saindang kabootan asin panahon sa paghinanyog sa sato. Siyempre, kun sinda espisipikong maghapot sato kun ano an saboot niato manongod sa kapiyestahan, kita masimbag nin totoo asin magalang. An librong Reasoning nagtatao nin marahay na impormasyon sa pahina 176-8 [pahina 111-3 sa Tagalog] na makatatabang saindo.
MAGPAHELING NIN KONSIDERASYON
7 Sa Aldaw nin Navidad asin Bagong Taon makakapaheling kita nin konsiderasyon sa dai pagsongko nin sobra kaamay, ta dakol an gustong magpaodto sa pagtorog kun panahon nin kapiyestahan. O puwede niatong ponan an satong paglilingkod sa pagdalaw liwat sa mga aram niato na magpapadagos sa sato. Pinahahalagahan niato an kadonongan kan hatol ni Pablo: “Sa gabos na paagi pinatutunayan niamo an samong sadiri na mga ministro nin Dios.”—2 Cor. 6:4.
8 Dakol na marahay na mga eksperyensia an ibinunga nin pakikikabtang sa paghuhulit kun kapiyestahan. Minsan siring, kaipuhan na kita gabos magin mataktika asin gibohon an satong mensahe na nakadadagka sa puso asin isip kan kagharong. Girumdoma an hatol ni Pablo sa Colosas 4:6: “An saindo logod na pagtaram danay na igwa nin kabootan, na tinimplahan nin asin.”