Tabangan an Iba na Makapagdusay Asin Makapabautismo
1 Nakaoogma nanggad na maheling an nagdadakol na mga tawo na nag-aadal sa Biblia asin nakiaasosyar sa organisasyon ni Jehova! Asin mas dakula pa ngani an kaogmahan sa pagtabang sa sainda na mapatalubo asin mapagdanay an dayupot na espirituwal na relasyon ki Jehova Dios mismo.—Ikomparar an Gibo 20:35.
2 Marahayon na maheling na kadakol kan mga bagohan na nagoswag sagkod na magin aprobadong kairiba, asin an kadaklan sa sainda regular na nakikakabtang sa paghuhulit. Ngonyan sinda maninigong maghingoang makapagdusay asin makapabautismo. Paano niato sinda matatabangan na maabot an pasohan na iyan?—Mat. 28:19.
KUN PAANO KITA MAKATATABANG
3 Kaipuhan na tabangan niato an mga nag-aadal sa Biblia na mapatalubo an pagkamoot asin pag-apresyar ki Jehova tanganing mapahiro sinda nin pagtubod na idusay sa saiya an saindang sadiri. (1 Cron. 28:9a) Kaya, sa oras kan pag-adal sa Biblia, tokdoan sinda na mamansayan an mga kuwalidad ni Jehova mantang pinag-oolayan nindo an saiyang mga ginibo asin pamantayan.
4 Itampok an mamomoton na katuyohan ni Jehova para sa tawo asin sa daga, saka an pagpakangbanal sa Saiyang banal na ngaran. Tabangan an nag-aadal na malinaw na masabotan kun paano sia napapalabot asin kun paano sia makatatao nin simbag sa saro na nagduduhagi ki Jehova. (Tal. 27:11) Aprobetsaran an lambang oportunidad na tabangan an nag-aadal na magtalubo sa espirituwal tanganing “paindahan nia an saiyang sadiri asin pasanon an saiyang hariging pasakitan,” na nagpapabautismo bilang disipulo ni Jesu-Cristo.—Mat. 16:24.
5 Tabangan an mga nag-aadal na masabotan na an mga ley asin prinsipyo ni Jehova para sa ikararahay niato. Kaipuhan na marealisar ninda na kun maghahalat sinda sagkod sa ultimong minuto na manindogan para sa tunay na pagsamba, puwede sindang mawaran kan premyong buhay. (Luc. 21:34, 35) Ipahayag sa sainda an saindong pag-apresyar sa saiyang organisasyon, sa kongregasyon, sa mga pagtiripon, sa asosasyon nin magturugang. (Sal. 100:2) Gamiton an Tataramon nin Dios sa pagpahiro sainda na makiasosyar sa banwaan nin Dios sa mga pagtiripon asin asamblea.
DAI MAG-ATRASO
6 An kapon na Etiope dai nag-atraso sa pagpabautismo. Siniyasat nia an saiyang isip asin puso patin hinapot si Felipe kun baga may nakaoolang sa saiya sa pagpabautismo. Huling mayo nin naheling na dahelan sa pag-atraso, sia listong nagpabautismo. (Gibo 8:26-38) Iyan an espiritu na boot niatong pataluboon sa mga nag-aadal sa Biblia ngonyan.—Ikomparar an Juan 14:23; 2 Corinto 5:14, 15.
7 Solamente an mga ‘tinandaan’ para sa kaligtasan an makaliligtas pasiring sa bagong palakaw ni Jehova. (Ezeq. 9:2-6) An mga nag-ako sa ‘pagtandang’ ini maoogma huli sa saindang nagdusay na relasyon ki Jehova, na sinimbolisaran nin pagpabautismo sa tubig!