Pagpaheling nin Pagkamoot sa Dios Asin Kataed
1 Bilang simbag sa hapot na: “Paratokdo, arin an pinakadakulang togon sa Pagboot?” si Jesus nagsimbag: “‘Mamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.’ Iyo ini an pinakadakula asin enot na togon. An ikaduwa, na arog kaini, iyo ini, ‘Mamotan mo an saimong kataed nin siring sa saimo man sana.’”—Mat. 22:36-39.
2 An hararom na pagkamoot ni Jesus sa Dios risa kan sia magsabi: “An sakong kakanon iyo an sakong paggibo kan kabotan nia na nagsugo sako asin pagtapos kan saiyang gibohon.” (Juan 4:34) An pagkamoot nia sa kataed nagpahiro saiya na ihulit na may kaigotan an maogmang bareta kan Kahadean nin Dios. Nagpaomay man sia. Asin kanigoan kapambihirang pagpapaheling nin pagkamoot an naheling kan itao nia an saiyang buhay bilang pantubos sa katawohan! Paano daw niato maaarog si Jesus sa pagpaheling nin pagkamoot sa Dios asin kataed?
KUN PAANO MAKAPAGPAPAHELING NIN PAGKAMOOT
3 An pagsabi sa iba kan maogmang bareta kan Kahadean sarong dakulang paagi na magibo ini. An mga tawo kaipuhan na tawan nin paglaom asin impormasyon tanganing matabangan sinda na maatubang an delikadong mga panahon na ini. (2 Tim. 3:1) An pagtubod niato sa Kahadean maninigong magmotibar sato na tawan nin oportunidad an gabos na makadangog kan katotoohan. An pagtaram kan katotoohan manongod sa Kahadean nagtataong-onra ki Jehova. Igwa daw kita kan siring na pagkamoot sa Dios asin kataed? Inaaprobetsaran daw niato an gabos na oportunidad na magpatotoo nin impormal sa mga paryentes, kataraed, asin iba pa? Kita daw lubos na nakikikabtang sa paghuhulit kan Kahadean sa harong-harong?
4 An iba naghohona na idto sanang mga edukado an kuwalipikadong magdara kan siring kahalagang mensahe. Imbes, an mahalaga iyo an satong pagsarig ki Jehova. (Luc. 11:13; 1 Cor. 1:26, 29, 31) An pagkamoot sa Dios asin kataed makatatabang sato na mahale an negatibong mga saboot asin makanompong nin tunay na kagayagayahan sa ministeryo. Kun gigirumdomon niato na tinatabangan niato an mga tawo na “maniwang asin nagkakaralagalag siring sa mga karnero na mayong pastor,” dai nang gayo kita maghahadit manongod sa satong sadiri.—Mat. 9:35, 36.
KUN PAANO MAKIKIKABTANG NGONYAN NA ABRIL
5 Ngonyan na Abril igwa kita nin marahayon na oportunidad na ipahayag an satong pagkamoot sa Dios asin kataed paagi sa lubos na pakikikabtang sa ministeryo saka pagtabang sa mga maluya asin bagohan na makikabtang. Dugang pa iaalok niato an sarong taon na suskripsion sa The Watchtower sa kontribusyon na ₱60.00 o sa Torrengbantayan sa kontribusyon na ₱30.00. An mga luwas sa Abril may impormasyon na nagbubuyagyag sa Dakulang Babilonya, na maninigong tumabang sa dakol na magdesisyon na lumuwas sa saiya. An bagong Topikong Mapag-oolayan nagdodoon kan mga paghokom ni Jehova tumang sa saiya. Minsan ngani ini makosog na mensahe, iyan nagpapaheling nin tunay na pagkamoot sa mga “nag-aaragagha asin nag-aaragrangay” sa karatan sa kinaban huli sa saindang matanos na puso.—Ezeq. 9:4; Kap. 18:4.
6 Kita logod gabos maghingoa na ipaheling an satong pagkamoot sa Dios asin kataed paagi sa pagpaisi kan Kahadean ni Jehova sa gabos na oportunidad sa laog kan bulan nin Abril!