An Topikong Mapag-oolayan

¹ An Mayo, 1977 na An Satong Paglilingkod sa Kahadean nag- introduser kan artikulong “Topikong Mapag- oolayan” asin nagtao nin mga suhestion kun paano magagamit ini nin epektibo. Kita gabos nakinabang hale sa artikulong ini durante kan nakaaging 12 taon. Nakatabang ini sa dakol tanganing paoswagon an saindang pagigin epektibo sa pag-aatubang kan maogmang bareta.

² Durante kan nakaaging nagkapirang taon, an bagong Topikong Mapag-oolayan inintroduser lambang tolo o apat na bulan. Sa ngapit, mas parateng babagohon kan An Satong Ministeryo sa Kahadean an isinusuherir na Topikong Mapag-oolayan. Sa pankagabsan, magkakaigwa nin laen na topiko sa lambang panahon na binabago an alok na literatura. Makatatabang ini sa sato na gibohon na mas pulido an pagbalyo hale sa satong Makakasuratan na presentasyon pasiring sa pag-alok kan literatura. Makakadugang ini sa orog pang pagkalaenlaen sa satong ministeryo.

PAGBAGOBAGO KAN Topikong Mapag-oolayan

³ Ordinaryo sana, manonompongan nindo na an pangenot na isinuherir na Topikong Mapag-oolayan puwedeng iatubang sa lambang puwertahan. Minsan siring, mayo nin maninigong magduwaduwa na bagohon an topiko o gumamit nin laen kun garo may bentaha na gibohon iyan. Siyempre, kun pinatotood an bagohan o mga hobenes, tibaad marahay na magdanay na sinusunod an isinuherir na Topikong Mapag-oolayan.

⁴ An mga payunir, siring man an gabos na parateng naghuhulit sa saindang teritoryo, mayong duwa-duwang nanompongan na makatatabang na gumamit nin pagkalaenlaen sa isinuherir na topiko tanganing malikayan na magin rutina an saindang presentasyon. An manlaenlaen na kamugtakan tibaad gibohon na marahay kun minsan na gumamit nin topiko na laen sa isinuherir sa An Satong Ministeryo sa Kahadean.

PAGHAHALEAN NA MATERYAL PARA SA MGA PRESENTASYON

⁵ Kun namamatean niato an pangangaipo na laenon an Topikong Mapag-oolayan, saen kita puwedeng kumua nin ibang ideya na gagamiton? Makatatabang an nakaaging mga isyu kan An Satong Ministeryo sa Kahadean. An publikasyon na inaalok nindo puwede man na gamiton bilang paghahalean kan saindong topikong mapag-oolayan. Pumili nin retrato, sarong teksto, o sarong tema nin kapitulo asin gumibo nin halipot na presentasyon tanganing pukawon an interes. Pagmaigotan na pakapotan sa kagharong an publikasyon tanganing maheling nia mismo ini. Magngangalas kamo na maheling kun gurano kadali na makawaras sa paaging ini. Pakatapos, kun minadalaw liwat, puwede kamong magpaliwanag kan detalye. Kaya pagdanayon na medyo halipot an enot na presentasyon.

⁶ Kita gabos maninigong padagos na humagad ki Jehova nin “dila nin mga madodonong” tanganing maaraman niato kun paano totokdoan idtong mga nanonompongan niato sa satong mga teritoryo. (Isa. 50:4) Ini an satong odok na pagmawot na gamiton nin epektibo an Topikong Mapag-oolayan. Nakataya an mga buhay. —1 Tim. 4:16.