An Kalinigan Nagtataong Onra sa Dios
1 An Mosaikong Pagboot igwa nin estriktong mga kahagadan manongod sa kalinigan. Ibinulag kaiyan an Israel bilang sarong banwaan na kaipuhan na magdanay na malinig sa pisikal asin espirituwal. (Lev. 11:35, 36; 15:1-11; Isa. 52:11) An malinig na kamugtakan na ini nagtaong onra sa Dios asin nakakontribuwir sa salud kan nasyon.
2 Ngonyan man, an kalinigan nagpapamidbid na tanda kan banwaan ni Jehova. Alagad mantang ini nagpapamidbid sa banwaan ni Jehova bilang sarong grupo, totoo daw iyan sa kada saro sa sato bilang indibiduwal? An satong pag-ataman sa kahusayan asin personal na kalinigan nagpapabanaag kun gurano niato pinahahalagahan an mga kahagadan ni Jehova.
3 Kumusta man an itsura kan satong harong? Iyan daw nakaiina sa puwersa kan mensahe kan Kahadean? Posible daw na an iba pagdudahan an satong sinseridad kun kita nagtataram dapit sa pagbabago kan daga na magin sarong paraiso mantang an satong sadiring harong bakong areglado asin an natad tinuboan na nin mga doot? Kun an satong harong bakong areglado an itsura o igwa nin mababatang parong huli sa bakong malinig na mga ugale, masasabi daw na napatalubo na niato an “mga arogan nin kalinigan na maangay sa bagong kinaban sa irarom kan Kahadean nin Dios”?—om p. 130-1.
4 Kumusta man an satong gubing, bag nin libro, asin personal na pag-alinyar? Malinig asin presentable daw iyan? Makatanosan na pagdanayon niatong malinig an satong sadiri asin an satong gubing paagi sa dayaday na pagkarigos asin paglaba.—w89-BI 6/1 p. 20-3 (w89-E 6/1 p. 16-19).
5 Kumusta man kun an personal na pag-asikaso sa hawak o mga palibot kan sarong tugang nagin nang langhad sa kongregasyon? Tibaad nangangaipo sana sia nin mamomoton na tabang huli sa edad o diperensia. Kun siring, magigin kabootan na tabangan sia. An saro pang tugang tibaad igwa kan problema asin dai ngani aram iyan; an maboot na sadol tibaad makapahiro saiya na itanos an situwasyon. An mga indibiduwal na padagos na nagtatao nin bakong marahay na halimbawa sa bagay na ini dai makukuwalipikar para sa nangongorog na mga pribilehiyo sa kongregasyon. Siyempre, maninigong magbantay an mga magurang tumang sa pagpirit kan sadiri nindang personal na mga pamantayan o kagustohan.
6 Parate na gustong-gusto niatong mag-imbitar sa mga interesado na umatender sa mga pagtiripon huli ta magayon asin malinig an satong Kingdom Hall. Mangalagkalag sa palibot kan saindong hall. Malinig daw an mga tukawan, salog, asin lanob? Regular daw na linilinigan an mga kasilyas? Kun kita natood nang magheling sa maating salog o mga lanob na nagbabakbak an pintura, dai mahaloy mamansayon ta iyan na puwede na. Pero an mga bisita tibaad magkaigwa nin bakong marahay na impresyon. Kaipuhan tang gibohon an satong pinakamakakaya na mapagdanay na magayon an hall, na ginigibo an satong kabtang kun umabot an panahon para sa paglinig asin paghirahay.
7 Minsan dai nagtataram, mapamumuraway niato an Dios paagi sa satong personal na itsura asin sa kalinigan kan satong mga harong, sasakyan, asin Kingdom Hall. An satong halimbawa dai magtatao nin ano man na dahelan na ikasisingkog kundi magpapaheling na malinig asin matanos an satong pagsamba.—1 Cor. 10:31, 32; Sant. 1:27.