Anong Klaseng Espiritu an Ipinapaheling Nindo?

¹ Tinapos ni Pablo an saiyang surat sa kongregasyon sa Filipos paagi sa makosog na sadol na ini: “An dai na kutana maninigong kabootan kan Kagurangnan na Jesu-Cristo logod mapasa espiritu na saindong ipinapaheling.” (Fil. 4:23) Kinomendaran nia sinda huli sa saindang tunay na interes sa paghuhulit kan maogmang bareta siring man sa saindang mainit, mamomoton na pagmakolog para sa karahayan kan lambang saro.​—Fil. 1:​3-5; 4:​15, 16.

² Maninigong magin satong pagmawot na ipaheling an kaparehong espiritu sa satong kongregasyon. Kun an gabos nagpapaheling nin kaigotan, kabootan, asin pagkamapagpasakat, ini nagpapangyari nin sarong espiritu na naheheling kan mga paramasid. An positibo asin mamomoton na espiritu nagdadara nin pagkasararo asin espirituwal na pag-oswag. (1 Cor. 1:10) An negatibong espiritu nagbubunga nin pagkadisganar asin pagkanapipiritan.​—Kap. 3:15, 16.

³ An mga Magurang Nangengenot: An mga magurang igwang paninimbagan na magpadanay nin marahay, positibong espiritu sa tahaw ninda mismo asin sa laog kan saindang kongregasyon. Taano? Huli ta an kongregasyon puwedeng maimpluwensiahan kan saindang kaisipan asin paggawe. Pinahahalagahan niato an pagkakaigwa nin mga magurang na maigot sa paglilingkod sa langtad, na nagtataratara sa sato paagi sa mainit na paghuyom asin maboot na tataramon, asin na positibo saka nakakapakosog sa saindang hatol, baga man itinao sa pribado o sa plataporma.​—Heb. 13:7.

⁴ Siyempre, kita gabos maninigong gumibo kan satong kabtang na gibohon an kongregasyon na parapakikatood, mapagpasakat, maigot, asin may kaisipan na pan-espirituwal. Bilang indibiduwal, makakapaheling kita nin init asin pagkamoot sa satong pakikiasosyar sa iba. (1 Cor. 16:14) Maninigong mayong pagpapalaen sa edad, rasa, edukasyon, o mga kamugtakan sa ekonomiya sa tahaw niato. (Ikomparar an Efeso 2:21.) Huli sa satong paglaom, makakapaheling kita nin espiritu nin kagayagayahan, matinaong pagpasakat, asin kaigotan sa ministeryo.​—Roma 12:13; Col. 3:​22, 23.

⁵ An gabos na nakikiasosyar sa sato, kabale an mga bagohan, maninigong pamateon na inaako asin makamate kan pagkamoot asin debosyon kan kasararoan nin magturugang. Paagi sa satong ministeryo asin paagi sa pagpapaheling nin mararahay na Kristianong kuwalidad, nagtatao kita nin ebidensia na an kongregasyon sarong “harigi asin tukod kan katotoohan.” (1 Tim. 3:15) Naeeksperyensiahan man niato “an katoninongan nin Dios” na nagbabantay sa satong puso asin pag-isip. (Fil. 4:​6, 7) Kita logod gabos mahigos na magmaigot na ipaheling an klase nin espiritu na mag-aasegurar sa sato kan dai na kutana maninigong kabootan ni Jehova paagi sa Kagurangnan na Jesu-Cristo.​—2 Tim. 4:22.