“Magpuka Kamo”
1 Kan sinabi ni Jesus an mga tataramon na nakarekord sa Mateo 26:38-41, sia nagdadangadang sa pinakakritikal na panahon kan saiyang pag-eksister bilang tawo. Nakataya an kaligtasan kan gabos na katawohan. An mga disipulo ni Jesus nangangaipong “magpuka.”
2 Nagtitindog kita ngonyan sa tata kan pagdatong ni Jesus bilang paraligtas asin parakastigo. Bilang mapagbantay na mga Kristiano na nakarerealisar kan pagigin apretado kan mga panahon, dai kita minatukaw sana asin naghahalat sa kaligtasan. Aram niato na dapat kitang magin andam sa gabos na panahon. Kaipuhan na padagos kitang “nagpapagal asin naghihingoa” sa satong paglilingkod ki Jehova. (1 Tim. 4:10) Kumusta an lambang saro sa sato indibiduwalmente? Kita daw nagdadanay na puka?
3 Pagsiyasat sa Satong Sadiri: Si Jesus nagpatanid man: “Mag-ingat kamo sa saindo man sana.” (Luc. 21:34, 35) Kaipuhan kitang magin maingat sa satong sadiri, na sinisierto na kita “daing kasagwean asin daing kasalan . . . sa tahaw nin maraot asin bikong kapagarakian.” (Fil. 2:15) Kita daw namumuhay sa kada aldaw bilang mga Kristiano, na inaarog si Jesus asin naglalakaw na kaoyon kan mga prinsipyong isinurat sa Tataramon nin Dios? Kun sinisiyasat niato an satong sadiri sa liwanag kan Kasuratan, kita daw tunay na puka siring sa instruksion ni Jesus?—Roma 13:11-14.
4 An kamagurangan dapat na magin maigot sa pag-otob kan saindang mga asignasyon sa kongregasyon, na narerealisar na sinda maninimbag sa kun paano ninda inaataman an aripompon. (Heb. 13:17) An mga payo nin pamilya may espesyal na obligasyon sa pagdirehir kan saindang mga pamilya sa mga dalan ni Jehova. (Gen. 18:19; Jos. 24:15; ikomparar an 1 Timoteo 3:4, 5.) Siring man, kaipuhan nanggad na kita gabos mag-otob kan pagboot sa Kasuratan na magkaminorootmootan! Iyan an midbidan kan tunay na Kristianismo.—Juan 13:35.
5 Magin AIisto na Patanidan an Iba: Kalabot sa pagdadanay na puka an labi pa sa pag-iingat sa satong sadiri. Kita pinagbotan na gibohon na mga disipulo an iba. (Mat. 28:19, 20) An pagkamoot sa kataed dapat na magpahiro sa sato na patanidan an iba tanganing sinda makaligtas sa kalaglagan na napaaatubang sa kinaban na ini. Ini responsibilidad na isinasaabaga nin gabos na Kristiano. Importanteng kabtang iyan kan satong pagsamba. (Roma 10:9, 10; 1 Cor. 9:16) Parate kitang nakasusumpong nin kadaihan nin interes o pagtumang sa nagliligtas-buhay na gibohon na ini. Obligasyon niatong magpadagos, minsan kun an mayoriya iniignoro an satong patanid. (Ezeq. 33:8, 9) An tunay na pagkamoot sa Dios asin kapwa mapahiro sa sato na magmaigot.
6 Bako ining panahon sa pagkakampante. Dai kita dapat na mapalabot na marhay sa pan-aroaldaw na mga kahaditan sa buhay o sa mga kasingawan kan sistemang ini sagkod na iyan magin siod. (Luc. 21:34, 35) Kun igwa man nin pangangaipo na makamate nin pagkaapretado, ngonyan na iyan. Idtong mga mata, alisto, asin puka sana an makaliligtas. Kun kita makuyog sa mga instruksion ni Jesus asin “magin mapanggana sa pagdulag sa gabos na ining bagay,” makapasasalamat nanggad kita!—Luc. 21:36.