Kaipuhan Niato an Kongregasyon
1 Sarong beses an mga aki ni Core nagpahayag kan saindang pag-apresyar sa kongregasyon ni Jehova sa paaging ini: “An sarong aldaw sa saimong mga patyo orog na marahay kisa sarong ribo sa ibang lugar.” (Sal. 84:10) Para sa sainda, an kinaban mayo nin mas marahay na ikaoopresir. Kun arog kaiyan an saindong mga saboot, maninigo na gibohon nindo an kongregasyon na sentro kan saindong buhay.
2 Poon sa kapinonan kaiyan perming ipinaheling kan Kristianong kongregasyon na iyan may bendisyon ni Jehova. (Gibo 16:4, 5) Dai nin siisay man sato na maninigong palimanlimanan an kongregasyon o maghona na iyan saro sanang paagi tanganing tiponon kita sa pisikal. An kongregasyon an lugar nin pagpakinorosogkosogan para sa Mga Saksi ni Jehova sa lambang komunidad. Iyan nagpapangyari nin nagkakasararong asosasyon tanganing matokdoan kita ni Jehova asin organisaron sa pan-Kahadean na aktibidad.—Isa. 2:2.
3 An Kristianong kongregasyon sarong pundamental na paagihan para sa pagtokdo sa satuya kan katotoohan. (1 Tim. 3:15) An mga parasunod ni Jesus dapat na “gabos magin saro”—kasaro nin Dios, ni Kristo, asin nin lambang saro. (Juan 17:20, 21; ikomparar an Isaias 54:13.) Saen man kita magduman sa kinaban, an satong mga tugang nagtutubod sa mga katokdoan asin prinsipyo kan Biblia asin minagawe kaoyon sa mga iyan.
4 Kita sinasanay asin sinasangkapan na otobon an satong asignasyon na gumibo nin mga disipulo. Kada bulan, An Torrengbantayan, Awake!, asin An Satong Ministeryo sa Kahadean nagtatao nin nakatatabang na impormasyon tanganing tabangan kita na makapoon nin orolay sa Kasuratan. An mga pagtiripon dinesenyo tanganing ipaheling sa sato kun paano hahanapon asin paooswagon an interes. An pagdakol na naheheling niato sa bilog na kinaban nagpapatunay na yaon sa sato an langitnon na pagsuportar sa gibohon na ini.—Mat. 28:18-20.
5 Paagi sa kongregasyon, nag-aako kita nin aroaldaw na pagpakosog ‘na nagdadagka sato sa pagkamoot asin marahay na mga gibo.’ (Heb. 10:24, 25) Pinakokosog kita na tagalan na may kaimbodan an mga pagbalo. An mamomoton na mga paraataman tinatabangan kita na mapangganahan an mga kagabatan asin kahaditan. (Ecl. 4:9-12) Tinatawan kita nin kinakaipuhan na sadol kun kita namemeligrong malagalag. Ano pang ibang organisasyon an nakatatao nin siring kamamomoton na pag-ataman?—1 Tes. 5:14.
6 Kabotan ni Jehova kaya kita nagdadanay na dayupot sa saiyang organisasyon tanganing mapagdanay an satong pagkasararo. (Juan 10:16) An sarong paagi na tinatabangan kita kan kongregasyon na mapagdanay nin relasyon sa maimbod na grupong oripon iyo an pagsugo nin nagbibiaheng mga paraataman tanganing pakosogon kita. An satong pagsunod sa mamomoton na paggiya pinagsasararo kita sa kadayupotan na nakatatabang sato na magdanay na makosog sa espirituwal.
7 An kongregasyon mahalaga sa satong espirituwal na kaligtasan. Kun siblag dian imposibleng makapaglingkod ki Jehova sa inaakong paagi. Kun siring, magdanay kitang dayupot sa itinagama ni Jehova. Gumibo logod kita kaoyon sa mga pasohan kaiyan asin odok na iaplikar an sadol na inaako niato dian. Solamente sa paaging ini na ikapaheheling niato kun gurano kahalaga sa sato an kongregasyon.—Sal. 27:4.