Arogon an Saindang Pagtubod
1 Si apostol Pablo tinawan nin kahulogan an pagtubod bilang “an siertong paghalat sa mga bagay na linalaoman, an hayag na pagpapaheling kan mga katunayan minsan dai naheheling.” Idinugang pa nia na “kun dai nin pagtubod dai mahihimo na makapaoyon sa [Dios].” (Heb. 11:1, 6) Dinagka kita ni Pablo na gumibo nin pagtubod, magsopay dian, pag-aaboton iyan.—2 Cor. 4:13; Col. 2:7; 2 Tim. 2:22.
2 Dakol an pambihirang halimbawa nin pagtubod na isinaysay sa Biblia. Sa Hebreo 11, si Pablo nagtatao nin halabang listahan nin mga saksi na nagpaheling nin dai nababaring pagtubod. Kabale sa listahan na ini si Abel, na enot na nagadan na martir huli sa saiyang pagtubod. Si Noe ilinista huli ta paagi sa saiyang pagtubod nagpaheling sia nin diosnon na takot tanganing ikaligtas an saiyang kairiba sa harong. Si Abraham tinawan nin komendasyon huli sa saiyang pagtubod asin pagkamakinuyog. Inomaw si Moises huli ta paagi sa saiyang pagtubod nagdanay siang marigon na garo baga naheheling an Saro na dai naheheling. Kanigoan an satong pasasalamat na mapakokosog ta an satong pagtubod paagi sa pagrepaso kan saindang “banal na mga gawe asin gibo nin diosnon na debosyon”!—2 Ped. 3:11.
3 Kan enot na siglo, si Jesus naghapot: “Kun mag-abot an Aki nin tawo, makukua daw nanggad nia an pagtubod sa daga?” (Luc. 18:8) Bueno, kun siring, kita daw igwa nin buhay na mga halimbawa nin pagtubod sa tahaw niato ngonyan? May naheheling daw kitang mga lalaki asin babae na nagpapaheling nin dai natatanyog na pagtubod ki Jehova siring kan totoo sa banwaan nin Dios kaidtong mga panahon kan Biblia?
4 Mga Halimbawa nin Pagtubod sa Modernong Panahon: Napalilibotan kita nin pambihirang mga halimbawa nin pagtubod! An pagtubod kan mga paraataman na nangengenot sa tahaw niato angay na arogon. (Heb. 13:7) Alagad bako sana sinda an mga arogan sa pagtubod. Nakaasosyar sa lambang kongregasyon an mga maimbod na may halawig na rekord nin fiel na paglilingkod ki Jehova, na sa parate ginibo sa irarom nin masakit na marhay na mga kamugtakan.
5 Dapat niatong hangaan an fiel na mga tugang tang babae na, sa laog nin dakol na taon, tinagalan an pagkontra kan mga agom na lalaki. An nagsosolong mga magurang kinaipuhan na atubangon an angat nin pagpadakula sa mga aki. May mga may edad nang balong babae sa sato na nungkang nagpapalta sa mga aktibidad kan kongregasyon maski ngani tibaad mayo sinda nin mga kapamilya na matabang sa sainda. (Ikomparar an Lucas 2:37.) Naghahanga kita sa pagtubod kaidtong mga tinatagalan an pabalikbalik na mga problema sa salud. An dakol padagos na naglilingkod na may kaimbodan dawa ngani igwa sindang mga limitasyon na nakaoolang sa sainda na maasignaran nin dugang pang pribilehio nin paglilingkod. May hoben na mga Saksi na may kapusoan na naggigibo nin pagtubod sa ibong nin pagkontra sa eskuelahan. Lalong minakosog an satuyang diosnon na debosyon mantang minamasdan ta an fiel na mga payunir na nagmamaigot taon-taon sa ibong nin kadakoldakol na problema.
6 An mga halimbawang ini nin mga fiel nagtatao sato nin karangahan asin pamparigon sa boot. (1 Tes. 3:7, 8) Marahay na arogon niato an saindang pagtubod huli ta “an mga minagaweng fiel sarong kaogmahan [ki Jehova].”—Tal. 12:22.