Pag-otob sa Satong Promesa Aroaldaw
1 An salmistang si David napahirong magpahayag ki Jehova: “Mag-aawit ako sa saimong ngaran sagkod lamang, tangani na maotob ko an sakong mga promesa aroaldaw.” (Sal. 61:8) Aram ni David na an paggibo nin promesa saro na biyong boluntaryong bagay. Minsan siring, nasasabotan man nia na kun sia magpromesa, obligado siang otobon iyan.
2 Kan kita magdusay ki Jehova, gikan sa boot kitang nagpromesa na gibohon an saiyang kabotan. Pinaindahan niato an satong sadiri asin ginibo an paglilingkod ki Jehova na satong pangenot na aktibidad sa buhay. (Luc. 9:23) Huli kaini, kita man dapat na mag-otob kan satong promesa aroaldaw. (Ecl. 5:4-6) An satong pagpahayag sa publiko na ginibo kan panahon nin bautismo sa tubig dapat na mabanaag sa satong bilog na pamumuhay, mantang aram niato na “paagi sa ngoso na an saro nagpapahayag sa publiko para sa kaligtasan.” (Roma 10:10) Kabale digdi an paghuhulit kan maogmang bareta. (Heb. 13:15) Laen-laen na marhay an personal na mga kamugtakan, alagad aroaldaw kita gabos puedeng gibohon na pasohan niato na ihiras sa iba an maogmang bareta.
3 Gumibo nin mga Oportunidad na Maghulit Aroaldaw: Tangani na ikahiras an maogmang bareta aroaldaw kaipuhan kitang gumibo nin mga oportunidad na maghulit kun itinotogot kan satong mga kamugtakan. Dakol na maogmang eksperyensia an nakamtan na kan mga nagsadiring boot na maghulit nin impormal sa trabaho o sa eskuelahan asin sa kataraed o sa iba pa na nanonompongan ninda aroaldaw. Pati an pagsurat o paggamit kan telepono puedeng magin mga paagi nin pagpatotoo sa iba. An gabos na paaging ini siring man an regular na pagtagama nin panahon para sa pagpatotoo sa mga pinto asin mga pagdalaw liwat puedeng gumiya sa kagayagayahan na gikan sa pagkondukta nin pag-adal sa Biblia sa harong. Iyo, aroaldaw puede kitang makagibo nin mga oportunidad na maghulit.
4 An sarong tugang na babae nagpoon na basahon an Pagsiyasat sa Kasuratan Aroaldaw durante kan saiyang pahingalo sa trabaho. Inimbitaran nia an sarong katrabaho na basahon kaiba nia an teksto kan aldaw, asin dai nahaloy iyan puminasiring sa sarong pag-adal sa Biblia kaiba kan babae. Nag-adal sinda sa laog nin kabangang oras kada aldaw, limang aldaw sa sarong semana. An saro pang katrabaho namasdan an saindang pag-adal aroaldaw. Pag-abot nin panahon nagpamidbid sia bilang inaktibong tugang na lalaki. Napahiro kan kaigotan kan tugang na babae, kinaolay nia an sarong magurang sa kongregasyon tangani na magin aktibo giraray. An tugang na babaeng ini naimpluwensiahan sa positibong paagi an duwa pang tawo huli sa paghihingoa na otobon an saiyang promesa aroaldaw.
5 Kun kita namomotibar nin mapagpahalagang puso, an pag-otob kan satong promesa nin pagdusay aroaldaw magtatao sa sato nin kagayagayahan asin pagkakontento. Siring kan salmista, ikapahahayag niato: “Inoomaw taka, O Jehova na sakuyang Dios, sa bilog kong puso, asin papamurawayon ko an saimong ngaran sagkod sa panahon na daing sagkod.”—Sal. 86:12.