Mabalyo daw Kamo?
Kun iyo an simbag sa hapot na iyan, dakol an bagay na kamo asin an iba pa kaipuhan na gumibo nin inisyatiba. Paagi sa pagsunod sa pundamental na mga lakdang na sinasabi sa ibaba, madali kamong magin establisado sa saindong bagong kongregasyon.
(1) Oras na aram na nindo an lugar na babalyohan nindo, puedeng makua kan sekretaryo sa saindong presenteng kongregasyon an adres kan Kingdom Hall kan saindong bagong kongregasyon. Pag-abot nindo sa lugar na iyan, tolos na hanapon an hall asin siertohon an oras kan mga pagtiripon kan kongregasyon. Kun labi sa sarong kongregasyon an naggagamit kan Kingdom Hall, hapoton an kamagurangan kun sa arin na teritoryo an lugar na iniistaran nindo. Dai mag-atraso na umatender sa mga pagtiripon asin makimidbidan sa lokal na kamagurangan.
(2) An mga sekretaryo kapwa kan saindong presente asin bagong kongregasyon magkokooperar sa pagbalyo kan Congregation’s Publisher Record cards para sa saindo asin sa saindong pamilya. Sarong surat nin pagpamidbid an ipadadara man sa kamagurangan kan saindong bagong kongregasyon. (Helingon an “Hapot” sa Marso 1991 An Satong Ministeryo sa Kahadean.) An Komite sa Paglilingkod kan Kongregasyon duman maninigo na paaramon an tamang konduktor sa pag-adal sa libro manongod kan pag-abot nindo tanganing makaolay nia kamo asin matabangan kamo sa paghanap kan saindong bagong grupo sa pag-adal sa libro.—Roma 15:7.
(3) An gabos na parahayag sa saindong bagong kongregasyon igwa nin magayagayang kabtang na dapat gibohon—an makamidbid kamo asin ipamate na kamo maogmang inaako. (Ikomparar an 3 Juan 8.) Siempre, nangangahulogan ini na dapat na presente kamo sa mga pagtiripon tanganing kamtan an pagparinigonan nin boot asin pagpakinorosogan kaiba kan saindong mga tugang na lalaki asin babae.
(4) Dai nindo maninigong halaton sagkod na matapos an gabos na trabahong imbuelto sa pagbalyo bago kamo makikabtang sa ministeryo sa langtad kaiba kan saindong bagong kongregasyon. Mantang ineenot nindo an intereses kan Kahadean, maaasikaso an ibang bagay, asin magigin komportable kamong marhay sa saindong bagong mga kamugtakan. (Mat. 6:33) Kun kamo areglado na sa saindong bagong harong, posible na bobooton nindo na mag-imbitar nin nagkapira hale sa kongregasyon na magbisita asin orog kamong magkamiridbidan.—Roma 12:13b.
Dakulang proyekto an pagbalyo. Minsan siring, kun ginigibo kan lambang imbuelto an isinusuherir digdi, dai magkakaigwa nin espirituwal na mga kaolangan. An gabos mapapahanga sa satong mamomoton na Kristianong kasararoan nin magturugang.