An Bendisyon ni Jehova Nakapayayaman sa Sato
1 An kapangganahan nin saro parateng sinosokol sa kadakulaan kan saiyang sueldo. Iyan an dahelan kun taano ta minamansay nin kadaklan na tawo an mga igwa nin kuarta bilang an pinakamaogma asin pinakakontento. Minsan siring, an mga tawong naniniwala na puedeng bakalon nin kuarta an kaogmahan nasasalang marhay. (Ecl. 5:12) Mayo nin nagdadanay na kagayagayahan para sa mga “determinadong yumaman” sa materyal na paagi. (1 Tim. 6:9) Sa kabaliktaran, an mga lingkod ni Jehova totoong magayagaya asin iyo an pinakamayaman sa kinaban. (Tal. 10:22; Kap. 2:9) Taano man?
2 Ebidensia kan Satong mga Kayamanan: Kita igwa nin mayaman na espirituwal na pakarorop asin pakasabot sa Tataramon nin Dios, an Biblia. Paagi sa saiyang daganon na organisasyon, padagos kitang tinotokdoan ni Jehova dapit sa saiyang sadiri asin sa saiyang Aki, para sa satong nagdadanay na kapakinabangan. An tamang pakasabot pinagigin posible na kita magin dayupot ki Jehova asin magkamit nin haraning marhay na relasyon sa saiya. (Sant. 4:8) An pagmansay sa marahay asin maraot patin pagsunod sa mga ley nin Dios pinoprotehiran kita sa nagkapirang helang asin peligro. Makasasarig kita na si Jehova an matao nin probisyon sa sato, na nagreresulta sa diosnon na pagkakontento asin katoninongan sa isip.—Mat. 6:33.
3 Kita nagkakamit nin katoninongan asin pagkasararo sa laog kan satong espirituwal na kasararoan nin magturugang huli ta kinukultibar niato an mga bunga kan espiritu nin Dios. Huling nagkakasararo sa makosog na bogkos nin pagkamoot, dai kita noarin man kaipuhan na makamate na inabandonar nin Dios o kan satong mga tugang kun napapaatubang kita sa kalamidad.—Gal. 6:10.
4 May tunay na kahulogan asin katuyohan an satong buhay. Ibinibilang niatong marahayon na pribilehio na makikabtang sa panglobong paghuhulit kan maogmang bareta. Ini nagtatao nin nagdadanay na kagayagayahan mantang tinatabangan niato an iba na magkaigwa nin marahay na relasyon sa Dios asin maglingkod na kasaro niato sa dalisay na pagsamba. An satong daing kaagid sa halagang kayamanan na ministeryo nagtataong onra ki Jehova asin nagtatao sa sato nin satispaksion sa pagkontribwir sa santipikasyon kan ngaran nia. Pinagdadanay niato an positibong nasa isip na aktitud, sa pakaaram na an satong paglaom para sa ngapit maootob sa dai na mahahaloy.
5 Pagpaheling kan Satong Pag-apresyar: Logod na padagos kitang magin mapag-apresyar sa mga bendisyon ni Jehova, na nagpapangyari sa sato na magin an tunay na pinakamayaman sa daga. (Tal. 22:4) An pagkaigwa nin oras kada aldaw sa paghorophorop sa kun ano an igwa kita nagpapahiro sa sato na pasalamatan si Jehova sa saiyang dakulang pagkamoot asin padagos na itao sa saiya an satong dai nababangang debosyon.