Magin Atento sa Makangangalas na mga Ginibo nin Dios
1 Sa laog nin tolong marahayon na aldaw, kita nagtiripon sa “Mga Paraotob kan Tataramon nin Dios” na Pandistritong Kombension. Hinale niato an satong atension sa aroaldaw na mga inaasikaso sa buhay asin nagkonsentrar kita sa makangangalas na mga ginibo ni Jehova. Paano kita nakikinabang sa mga bagay na itinokdo sa sato?—Juan 13:17.
2 Nagkukuyog an mga Pamilya sa Tataramon nin Dios: An simposium na “Magin Makinuyog sa Tataramon nin Dios” nakatabang sa sato na siyasaton an espirituwal na kamugtakan kan satong pamilya. An mga aki gustong-gustong makanood. Sa siring, inenkaminar an diosnon na mga magurang na gibohon an pampamilyang pag-adal sa Biblia na magin pundasyon para sa pagtogdok nin pamilya na makosog sa espirituwal. Ipinakikipag-olay kan dakol na payo nin pamilya sa saindang sadit na mga aki an bagong brosyur na Puede Kang Magin Katood nin Dios! Tatabangan sinda kaini na makapatalubo nin maogma asin tiwasay na relasyon ki Jehova. Mga magurang, tokdoan an saindong mga aki kun paano magigin atento sa mga saboot nin Dios. Magin mapagpahayag kan saindong pagkamoot sa saiya asin sa saiyang mga ginibo. (Sal. 103:2) Magtinabangan sa pagbugtak asin pag-abot sa espirituwal na mga pasohan saka biyong iubos an atension sa paglilingkod ki Jehova.
3 An Tataramon nin Dios Nagpapaliwanag sa Satong Dalan: Napalukso an puso niato na akoon an kompletong New World Translation sa Tagalog asin madangog na sa dai na mahahaloy iyan makukua na man sa Cebuano asin Iloko! Kita naogma man na marhay na akoon an bagong librong Isaiah’s Prophecy—Light for All Mankind I. Gurano na kamo karayo sa pagbasa kan enot na tomong ini? Ihinuhula kan libro ni Isaias an mga paghokom para sa maraot na mga nasyon siring man an maogmang mga bendisyon kan Kahadean para sa banwaan nin Dios. (Isa. 34:2; 35:10) Pinaririgon man kaiyan an pagtubod asin kompiansa ki Jehova saka sa saiyang paagi nin paggibo nin mga bagay.—Isa. 12:2-5.
4 Kun binabasa an Isaiah’s Prophecy I, maririsa nindo sa kapinonan pa sana kun paano pinagdanay ni Isaias an saiyang integridad ki Jehova mientras na sia napalilibotan nin karatan. Kan imbitaran na magin mensahero nin Dios, nagsimbag si Isaias: “Uya ako! Sugoa ako.” (Isa. 6:8) An paghorophorop sa saiyang andam na espiritu maparigon sa boot nindo na padagos na maghulit kan maogmang bareta, na lubos na nakikikabtang sa “pagpatotoo sa gabos na nasyon.”—Mat. 24:14.
5 An satong pagigin atento sa mga ginibo ni Jehova ibabantog an saiyang kadakulaan. Kaya pakamahalon an pribilehio nin pagigin mga paraotob kan tataramon nin Dios!