An Katotoohan Manungod sa Kahadian nin Diyos
Tinukduan ni Jesus an saiyang mga disipulo na mamibi: “Ama niyamo na nasa langit, pakangbanalon an pangaran mo. Dumatong lugod an Kahadian mo. Mangyari lugod an kabutan mo, kun paano sa langit, siring man sa daga.” (Mateo 6:9, 10) Ano an Kahadian nin Diyos? Ano an ginigibo kaiyan? Asin taano ta dapat tang ipamibi iyan?
Si Jesus an Hadi kan Kahadian nin Diyos.
Lucas 1:31-33: “Papangaranan mo siyang Jesus. An sarong ini ibibilang na importanteng marhay saka aapudon na Aki kan Kahuruhalangkawi, asin itatao sa saiya kan Diyos na Jehova an trono ni David na saiyang ama, asin mamamahala siya sagkod lamang bilang Hadi sa mga gikan ni Jacob, asin dai magkakaigwa nin katapusan an saiyang Kahadian.”
An Kahadian an pinakatema ni Jesus sa saiyang paghuhulit.
Mateo 9:35: “Naglibot si Jesus sa gabos na siyudad asin baryo, na nagtutukdo sa saindang mga sinagoga asin naghuhulit kan maugmang bareta kan Kahadian saka nagpapaumay nin gabos na klase nin hilang asin gabos na klase nin kamatian.”
Nagtao si Jesus nin tanda para tabangan an saiyang mga disipulo na maaraman kun nuarin madali nang dumatong an Kahadian.
Mateo 24:7: “Huli ta an nasyon makikilaban sa nasyon asin an kahadian makikilaban sa kahadian, asin magkakaigwa nin sunod-sunod na kakulangan nin kakanon saka linog sa manlain-lain na lugar.”
An mga disipulo ni Jesus naghuhulit ngunyan sa bilog na kinaban manungod sa Kahadian.
Mateo 24:14: “Asin an maugmang baretang ini kan Kahadian ihuhulit sa bilog na kinaban bilang patotoo sa gabos na nasyon, dangan maabot an katapusan.”