Mga Magurang—Itadom an Kapakipakinabang na mga Ugale sa Saindong mga Aki
1 An kapakipakinabang na mga ugale bakong naturalesa, ni na iyan nagkanorongod sana. Dugang pa, nagkakaipo nin panahon an pagtadom nin marahay na mga ugale sa mga aki. An “pagtadom” nangangahulogan na “itao nin luway-luway” o “ilaog nin padikitdikit.” Kaipuhan sa mga magurang an dai pagliwatliwat tanganing “padagos na padakulaon [ninda an mga aki ninda] sa disiplina asin pagtatanos nin isip ni Jehova.”—Efe. 6:4.
2 Ponan sa Pagkaomboy: Pambihira an abilidad nin sadang pang marhay na mga aki na makanood asin gumibo nin bagong mga bagay. Minsan ngani an mga nasa edad na parateng nadedepisilan na makanood nin bagong lenguahe, an mga aki sa kindergarten puedeng makanood nin duwa o tolong lenguahe nin durungan. Dai noarin man isipon na sadit pang marhay an saindong aki tangani na mapatalubo an marahay na mga ugale. Kun an pagtotokdo sa katotoohan na nasa Biblia pinoponan nin amay asin ipinagpapadagos, pag-abot kan panahon na an aki mga pirang taon na, an saiyang isip mapapano nin kaaraman na ‘magpapadonong sa saiya para sa kaligtasan.’—2 Tim. 3:15.
3 Ugaleon an Paglilingkod sa Langtad: An sarong kapakipakinabang na ugale na dapat itadom durante kan mga taon nin pagdakula kan aki iyo an regular na paghuhulit kan maogmang bareta kan Kahadean nin Dios. Ini pinoponan nin dakol na magurang paagi sa pag-iba kan saindang mga aki sa ministeryo sa harong-harong mientras na an mga aki omboy pa. An regular na pakikiiba kan mga magurang sa paghuhulit nakatatabang sa saindang mga aki na mapatalubo an pagpahalaga asin kaigotan para sa ministeryo. Puedeng ipaheling kan mga magurang sa mga aki kun paano makikikabtang sa pagtao nin patotoo sa kada kabtang kan paglilingkod sa langtad.
4 An pagigin nakalista sa Teokratikong Paadalan sa Pagmiministro nakatatabang man sa mga aki. Itinotokdo kaiyan sa sainda an marahay na mga ugale sa pag-adal asin kun paano mabasa na may pakasabot. Nanonodan ninda na makipag-olay dapit sa Biblia, magdalaw liwat, asin magkondukta nin mga pag-adal sa Biblia. An siring na pagsasanay puedeng makainspirar sa sainda na magpayunir asin pag-aaboton an espesyal na mga pribilehio nin paglilingkod. Dakol na Bethelite asin misyonero an naoogmang girumdomon an saindang enot na mga aldaw sa paadalan asin ibinibilang iyan na sarong probisyon na nakatabang sa sainda na mapatalubo an kapakipakinabang na mga ugale.
5 Kita gabos siring sa dalipay na nasa kamot kan Dakulang Paragibo nin Koron, si Jehova. (Isa. 64:8) Mientras na bago an dalipay, iyan mas pasil na moldehon. Mientras na iyan naaalang, iyan nagigin mas matagas. Siring man kaiyan an mga tawo. Kun sinda aki pa, sinda mas mapagpahunod—asin mientras na aki pa, mas marahay an resulta. An saindang mga taon nin pagkaaki mga taon nin pagdakula, na sa panahon na iyan mangyayari an pagmolde para sa ikararahay o para sa ikararaot. Bilang mapagmalasakit na magurang, ponan nin amay na itadom sa saindong mga aki an kapakipakinabang na mga ugale sa Kristianong ministeryo.