Dai Kamo Magduwaduwa!
1 Kun kita nag-aandam pasiring sa paghuhulit sa harong-harong, an pinakadakulang olang na inaatubang niato tibaad an sadiri mismo niato. An pakamate nin kakulangan tibaad papagduwaduwahon kita sa pagluwas tangani na magtaram kan katotoohan sa “gabos na klase nin tawo.” (1 Tim. 2:4) Alagad dai kita maninigong magduwaduwa sa paghuhulit kan maogmang bareta. Taano ta dai?
2 Iyan Mensahe ni Jehova: Ikinomunikar ni Jehova an saiyang tataramon paagi sa Biblia. Kun dinadara niato sa iba an mensaheng ini, an ipinapaabot niato mga kaisipan nia, bakong an sa sato. (Roma 10:13-15) Kun hinahaboan nin mga indibiduwal an mensahe kan Kahadean, si Jehova an talagang hinahaboan ninda. Pero, dai nanluluya an boot niato. Kompiado kita na an mensaheng ini makapupukaw sa puso kan mga naghihidaw nin pagbabago sa mga kamugtakan sa kinaban asin na nakamamate kan saindang espirituwal na pangangaipo.—Ezeq. 9:4; Mat. 5:3, 6.
3 Dinadagka ni Jehova an mga Tawo: An saro na habong maghinanyog sa sato kan nakaagi tibaad ngonyan andam nang maghimate huli ta nagbago na an saiyang mga kamugtakan asin naglumoy na an kamugtakan kan saiyang puso. Tibaad ipahayag na ni Jehova ngonyan an saiyang marahay na boot sa sarong iyan asin ‘dagkahon sia.’ (Juan 6:44, 65) Kun ini mangyari, boot niatong magin andam na gamiton ni Jehova asin sumunod sa paggiya nin mga anghel sa paghanap kan mga siring.—Kap. 14:6.
4 Itinatao nin Dios sa Sato an Saiyang Espiritu: Pinangyayari kan banal na espiritu na kita magtaram na “may pagkapusoan paagi sa autoridad ni Jehova.” (Gibo 14:1-3) Ginigirumdom na yaon sa sato an mapuersang pagsuportar na ini sa satong ministeryo, dai kita magduduwaduwa na magtaram kan katotoohan sa mga kataed, katrabaho, kaklase, paryente, o halangkaw an inadalan o mayayaman.
5 Tinokdoan Kita ni Jesus Kun Paano: Si Jesus naggamit nin nakapupukaw nin isip na mga hapot, praktikal na mga ilustrasyon, asin sono sa Kasuratan na pangangatanosan. Ipinaliwanag nia an katotoohan sa simple, nakaaakit na paagi, gikan sa saiyang puso. Ini pa man giraray an pinakamarahay na mga paagi ngonyan. (1 Cor. 4:17) Tibaad nagkakalaenlaen an mga kamugtakan kun kita naghuhulit, alagad an mapuersang mensahe kan Kahadean dai nagliliwat.
6 Pribilehio niato na gamiton ni Jehova sa pagtabang sa mga tawo sa daing kaagid asin mahalagang marhay na paagi. Dai kita magduwaduwa! Logod na magin makosog an boot niato asin togotan si Jehova na ‘magbukas sa sato nin tata nin pagtaram’ tangani na kita makapagtaram sa iba kan maogmang bareta.—Col. 4:2-4.