Puede daw Kamong Maglingkod Kun Saen Mas Dakula an Pangangaipo?
1 Napaghorophorop na daw nindo na bumalyo kun saen nangangaipo nin mas dakol na parabalangibog kan Kahadean? Kun imbitaran na ‘bumalyo asin tumabang,’ masimbag daw kamo nin siring ki apostol Pablo? (Gibo 16:9, 10) Sa dakol na kongregasyon, nangangaipo nin mga pamilya na maygurang sa espirituwal, mga payunir na matabang na hulitan an teritoryo, o nin kualipikadong kamagurangan asin ministeryal na mga lingkod na matabang sa pangengenot. Kamo daw magigin andam na sumimbag sa pangangaipong ini? Paano daw posible na magin mapanggana dian?
2 Kaipuhan an Pagtubod Asin Pagtitiwala: Sa pagboot nin Dios, binayaan ni Abram an saiyang ginikanan na banwaan nin Ur asin nagbaklay nin 1,000 kilometros pa-Haran kaiba an saiyang agom, sobrino, asin gurang nang ama, si Tare. (Gen. 11:31, 32; Neh. 9:7) Pagkagadan ni Tare, pinagbotan ni Jehova si Abram, ngonyan 75 anyos na, na humale sa Haran asin sa saiyang mga paryente patin magbaklay pasiring sa sarong daga na ipaheheling nin Dios sa saiya. Si Abram, Sarai, asin Lot ‘naghale.’ (Gen. 12:1, 4, 5) Siempre, si Abram dai nagbalyo tanganing maglingkod kun saen mas dakula an pangangaipo para sa mga ministro. Alagad an pagbalyo nia nagkaipo nin sarong bagay. Ano?
3 Nagkaipo nin pagtubod asin pagtitiwala tangani na probaran ni Abram an siring na gibohon. Kinaipuhan na bagohon an pag-isip asin pamumuhay nia. Kinaipuhan niang bayaan an seguridad na itinatao kan saiyang mga paryente. Alagad sia nagtiwala ki Jehova na babantayan sia asin an saiyang kasararo sa harong. Dakol ngonyan an nagpaheling kan saindang pagtitiwala ki Jehova sa kaagid na paagi.
4 Pagbalyo sa mga Kongregasyon na Nangangaipo nin Tabang: Dakol pang kongregasyon sa Pilipinas an kulang nin supisyenteng kamagurangan o ministeryal na lingkod. Kun kamo yaon sa kongregasyon na dakol an maygurang na tugang na lalaki asin gustong tumabang sa ibang kongregasyon sa saindong sirkito, kun siring marahay na dumolok sa saindong paraataman sa sirkito. Kabisado nia an bilog na sirkito asin an mga pangangaipo kaiyan patin puede nia kamong impormaran kun saen kamo makakatabang. An nagbibiaheng mga paraataman parateng nagdodolok sa mga tugang na lalaki kun may aram sindang pangangaipo asin kun dolokon kamo, maboluntaryo daw kamo tangani na tumabang?
5 Mga Asignasyon sa Halipot Sanang Panahon: Nakamtan na daw nindo an mayaman na mga bendisyon na minagikan sa paghuhulit sa dai pa naasignaran na teritoryo, maski sa laog nin halipot sanang panahon? Dai pa sana nahahaloy, duwa sa satong mga paraataman sa sirkito an naggibo nin inisyatiba na gamiton an saindang semana nin pagpapayunir sa pag-areglo nin mga grupo nin andam na mga tugang na lalaki na mapatotoo sa napapasuway na mga teritoryo sa saindang sirkito na dai pa nahulitan sa laog nin dakol na taon. Bawi daw an paghihingoa?
6 An saro sa mga paraataman na ini sa sirkito iiniba an 35 tugang na lalaki tangani na dalawon an napapasuway na mga baryo sa sarong mabukid na lugar. Nagdara sinda nin sadiring balon asin nag-istar kun saen sinda puede durante kan sarong semanang biahe. An resulta? Sinongko ninda an mga tawo na dai pa nakanupar nin mga Saksi sa haros 30 taon. Sinda nakapasakamot nin total na 60 libro, 186 na magasin, 50 brosyur, asin 287 pulyeto. Nakapoon man sinda nin 74 pag-adal sa Biblia. Ano daw an namatean kan mga tugang? Nagsabi an paraataman sa sirkito: “An paminsanminsan na paghuhulit na ini tunay nanggad na bako sanang napakosog an samong bogkos nin sa magturugang na pagkamoot kundi an samo man na pagtubod ki Jehova.” Ikinaogma iyan na marhay kan tolo na nasa grupo kaya napahiro sindang mag-aplay para sa regular na pagpapayunir.
7 An pag-ako nin temporaryong asignasyon na maglingkod kun saen mas dakula an pangangaipo puedeng magserbi sa saro pang katuyohan. An mga naggigibo kaiyan puedeng makakua nin kapakipakinabang na impormasyon na makakatabang sa sainda na ‘kuentahon an gastos’ sa pagbalyo sa ibang parte kan nasyon.—Luc. 14:28.
8 Pagbalyo Kun Saen Mas Dakula an Pangangaipo: Determinado si Jehova na ikapahayag an maogmang bareta “sa bilog na ineerokan na daga” bago dumatong an katapusan. (Mat. 24:14) Sa pakaaram kaini, andam daw kamong bumalyo dawa sa luwas kan saindong sirkito kun saen mas dakula an pangangaipo?
9 Kamo daw nagretiro na? Igwa daw kamo nin dagos-dagos na entrada? Kun mayo, puede daw kamong mag-areglo nin sadiri nindong trabaho? Kun dai nindo kayang bumalyo, puede daw nindong tabangan an sarong miembro kan pamilya na maglingkod sa ibang lugar?
10 Kun pakatapos nin mapagngayongayong pagkonsiderar naniniwala kamo na kaya nindong atubangon an angat na bumalyo kun saen mas dakula an pangangaipo, ipakipag-olay an bagay na iyan sa pamilya nindo asin sa kamagurangan sa saindong kongregasyon. Marahay man na ipakipag-olay iyan sa saindong paraataman sa sirkito, huli ta tibaad may aram siang mga lugar sa harani na nangangaipo nin tabang. Kun gusto nindo na dumuman sa mas harayong mga lugar, puede kamong gumibo nin surat sa Departamento nin Paglilingkod sa sangang opisina. Itao an surat nindo sa kamagurangan tanganing ikaiba ninda an saindang mga komento asin rekomendasyon bago iyan ipadara sa Sosyedad.
11 Ano an dapat nindong iiba sa surat nindo? An saindong edad, petsa nin bautismo, mga paninimbagan sa kongregasyon, kun may agom na, asin kun baga igwa kamo nin menor de edad na mga aki. Importante na sabihon na kaya nindong suportaran sa pinansial an saindong sadiri. Sambiton an mga probinsia na duman nindo mas gustong maglingkod, segun sa saindong personal na mga pangangaipo.
12 Nagtotogot daw an mga kamugtakan nindo na kamo maglingkod kun saen mas dakula an pangangaipo? Kun iyo, masdan nindo kun paano dagos-dagos na ibinububo ni Jehova an mayaman na mga bendisyon sa mga nagtitiwala sa saiya mantang ipinaheheling ninda an espiritu nin pagsakripisyo sa sadiri!—Sal. 34:8; Mal. 3:10.