Papagdanayon an Paglilibang sa Tamang Lugar Kaiyan
1 Sa depisil na mga aldaw na ini, kita gabos kaipuhan na mapaiba man sa panapanahon. Tama an magkaigwa man nin pag-aling-aling. Minsan siring, an dakolon na oras na ginagamit sa paglilibang, pag-aling-aling, asin pagtiripontipon puedeng paluwayon an saro na padikit nang padikit na oras an ginagamit sa espirituwal na mga aktibidad. Dapat na papagdanayon niato an paglilibang sa tamang lugar kaiyan. (Mat. 5:3) Paano ini magigin posible? Paagi sa pagsunod sa sadol na yaon sa Efeso 5:15-17.
2 Magbugtak nin mga Limitasyon: Nagsurat si Pablo na an mga Kristiano dapat na ‘magmaan na marhay’ sa kun paano ninda ginagamit an saindang buhay sa madonong na paagi. Kaipuhan an pagigin tama sana asin an pagpopogol sa sadiri tangani na malimitaran an panahon nin paglilibang sa kun ano talaga an kaipuhan. Marahay na seryosong horophoropon an paagi nin paggamit niato sa satong libreng panahon. An pag-aling-aling maninigo na para sa kapakipakinabang na katuyohan imbes na mamatean niato na sinayang sana niato an satong panahon o pagal-pagal kita. Kun an pagmate niato kita daing halaga, deskontento, asin medyo may sala pakatapos na magpartisipar sa sarong aktibidad, ini mag-iindikar na kaipuhan na gumibo nin mga pagliliwat sa paggamit niato nin panahon.
3 Magin Makatanosan: Si Pablo nagtao nin hatol manongod sa ‘pagtubos sa angay na panahon’ para sa mas importanteng mga bagay sa buhay, na dai magin “bakong makatanosan.” Dai totogotan nin dusay na mga Kristiano na an saindang buhay nakasentro sa paglilibang. Minsan ngani an pahingalo asin dibersion puedeng pakosogon giraray kita sa pisikal, an burabod nin espirituwal na kosog iyo an puersa aktiba nin Dios. (Isa. 40:29-31) Inaako niato an saiyang espiritu may koneksion sa teokratikong mga aktibidad—pag-adal sa Biblia, pag-atender sa mga pagtiripon kan kongregasyon, paglilingkod sa langtad—bakong paagi sa pag-aling-aling.
4 Magbugtak nin mga Prioridad: Ininstruksionan ni Pablo an mga Kristiano na “padagos na saboton kun ano an kabotan ni Jehova.” Itinokdo ni Jesus na an satong mga aktibidad maninigong nakasentro sa Kahadean nin Dios bilang satong prioridad sa buhay. (Mat. 6:33) Kaipuhan na gibohon nguna niato an mga bagay na matogot sa sato na otobon an pagdusay niato ki Jehova. Pakatapos, an panahon nin paglilibang puede nang ibugtak sa tamang lugar kaiyan. Kun nagibo na iyan, iyan magkakaigwa nin nakapakokosog na epekto, asin orog niato iyan na ikaoogma.—Ecl. 5:12.