Magkasorogpon na May Pagkaoroyon
1 Gurano kaparate na kamo nagngalas sa ekspertong disenyo kan hawak nin tawo? (Sal. 139:14) An lambang kabtang kan hawak naghihiro kaoyon kan ibang kabtang. Iinaagid kan Tataramon nin Dios an Kristianong kongregasyon sa sarong nagkakaoroyon nanggad na hawak. Sa irarom kan Payo, si Cristo, an gabos na miembro kan kongregasyon ‘magkasorogpon na may pagkaoroyon asin pinangyaring magtarabangan paagi sa lambang pagsokmolan na nagtatao kan kinakaipuhan.’ (Efe. 4:16a) Sa siring, nagagamit ni Jehova an saiyang nagkakasararong banwaan tangani na gibohon an makangangalas na mga bagay.
2 An mga miembro kan kongregasyon kan enot na siglo naghiro na “may pagkasararo” sa pag-asikaso sa espirituwal asin materyal na mga pangangaipo kan lambang saro. (Gibo 2:44-47) Huli sa pagsuportar ni Jehova, nagkakasararo nindang inatubang asin napangganahan an maringis na pagtumang. (Gibo 4:24-31) Ipinahayag ninda an mensahe kan Kahadean saen man sinda nagduman, na nalakopan kan maogmang bareta an midbid na kinaban kaidto. (Col. 1:23) Sa presenteng mga panahon, an Kristianong kongregasyon nagkakasararong ginigibo an iyo man sanang mga bagay sa mas mahiwas pa ngani na sokol. Anong mga bagay an nakakokontribwir sa pagkasararong ini?
3 Nagkakasararo Paagi sa Pagtotokdo nin Dios: Sa bilog na kinaban, kita nagkakasararo paagi sa satong pagsamba. Paano ini posible? Rinerekonoser niato an naheheling na pinakapaagihan ni Jehova sa pagtao nin espirituwal na “kakanon sa igong panahon.” (Mat. 24:45) Pinahahalagahan man niato an “balaog na mga lalaki” na itinao nia bilang mga paratokdo sa kongregasyon. Mantang mapakumbaba niatong inaako an mga probisyon ni Jehova sa pagpakakan sa sato sa espirituwal, an pakasabot niato sa Tataramon nin Dios nagtatalubo asin nagpapahiro sa sato na magmawot man na arogon si Jesus bilang saiyang mga disipulo. Dapat na padagos niatong pag-adalan an Tataramon nin Dios, na odok na naghihingoang “makaabot sa pagkasararo sa pagtubod.” (Efe. 4:8, 11-13) Kamo daw nakakokontribwir sa satong espirituwal na pagkasararo paagi sa pagbasa kan Biblia aroaldaw?
4 Nagkakasararo Paagi sa Kristianong Pakikiasosyar: An pagkamoot pinagsasararo kita sa dayupot na pakikiasosyar sa Kristianong mga pagtiripon. Sa mga pagtiripon na ini, ‘kinokonsiderar niato an lambang saro.’ (Heb. 10:24, 25) Kalabot digdi an pagheling nin lampas pa sa panluwas na itsura asin talagang pagmidbid sa satong mga tugang, na minamansay sinda na mahal na marhay, siring kan pagheling ni Jehova sa sainda. (Hag. 2:7, nota sa ibaba.) Mantang naghihinanyog kita sa saindang mga kapahayagan nin pagtubod, nagrararom an pagkamoot niato sa sainda asin napakokosog an pagkasararo niato. Kamo daw midbid na saro na regular na nag-aatender sa mga pagtiripon kan kongregasyon?
5 Mga Kapwa Trabahador sa Langtad: An paghuhulit kan maogmang bareta kaiba kan mga kapagtubod pinagsasararo kita sa paggibo kan kabotan nin Dios. Inapresyar ni apostol Pablo an saiyang ‘mga kapwa trabahador para sa kahadean nin Dios.’ (Col. 4:11) An pagpinahayagan nin mga eksperyensia asin pagtinabangan mientras na nasa ministeryo nakakatabang sa sato na magibo an sugo sa sato bilang Kristiano patin pinakokosog an satong bungkos nin pagkasararo.—Col. 3:14.
6 Nakakapasararong Impluwensia nin Banal na Espiritu: Mantang nagmamaigot kitang gibohon an saiyang kabotan, itinatao sa sato ni Jehova an saiyang espiritu. Tinatabangan kita kaini na areglohon an mga dai pagkaintindihan asin mag-ontok na may pagkasararo. (Sal. 133:1) Minomotibar kita kaiyan “na otobon an pagkasararo kan espiritu sa nakakapasararong bungkos nin katoninongan.” (Efe. 4:3) An balang saro sa sato puedeng makakontribwir sa pagkaoroyon kan banwaan nin Dios paagi sa pagpaheling kan bunga kan espiritu sa satong pagtratar sa lambang saro.—Gal. 5:22, 23.
7 An paglilingkod na nagkakasararo sa irarom kan pagkapayo ni Cristo “nagbubunga kan pagtalubo kan hawak para sa pagkosog mismo kaiyan sa pagkamoot.” (Efe. 4:16b) Dugang pa, iyan nagpapamuraway ki Jehova, “an Dios na nagtatao nin katoninongan.”—Roma 16:20.