Magpaheling nin Kristianong Kaimbodan Kun Natiwalag an Sarong Paryente
1. Anong situwasyon an puedeng bumalo sa kaimbodan nin sarong Kristiano?
1 An bogkos kan mga miembro nin pamilya puedeng makosog na marhay. Ini nagigin pagbalo sa sarong Kristiano kun an agom, aki, magurang, o ibang haraning paryente natiwalag o nagdisasosyar kan saiyang sadiri sa kongregasyon. (Mat. 10:37) Paano maninigong trataron nin maimbod na mga Kristiano an siring na paryente? May pagkakalaen daw kun sia nag-iistar sa saindong harong? Enot, repasohon niato an sinasabi kan Biblia manongod sa temang ini, na an mga prinsipyo kaiyan parehong minaaplikar sa mga natiwalag asin nagdisasosyar kan saindang sadiri.
2. Sono sa Biblia, paano dapat na trataron kan mga Kristiano an mga natiwalag sa kongregasyon?
2 Kun Paano Tatrataron an mga Tiwalag: An Tataramon nin Dios nagboboot sa mga Kristiano na dai makiiba o makiasosyar sa saro na natiwalag sa kongregasyon: “Umontok sa pakikiiba sa siisay man na inaapod na tugang na parapakisaro o tawong mahanab o parasamba sa idolo o paramuda o paraburat o parakikil, na dai ngani magkakan kaiba nin siring na tawo. . . . Haleon nindo an maraot na tawo dian sa tahaw nindo.” (1 Cor. 5:11, 13) An mga tataramon ni Jesus na nasusurat sa Mateo 18:17 may koneksion man sa bagay na iyan: “Ibilang mo [an natiwalag] na arog kan tawo kan mga nasyon asin parasingil nin buhis.” Aram na marhay kan mga nagdadangog ki Jesus na an mga Judio kan panahon na idto dai nakikiamistad sa mga Hentil asin na rinarayoan ninda an mga parasingil nin buhis bilang mga isinikwal. Sa siring iniinstruksionan ni Jesus an saiyang mga parasunod na dai makiibaiba sa mga tiwalag.—Helingon An Torrengbantayan na Marso 1, 1982, p. 21-4 (w81-E 9/15 p. 18-20).
3, 4. Anong klaseng pakikiiba sa mga natiwalag asin nagdisasosyar an ipinagbabawal?
3 Ini nangangahulogan na an maimbod na mga Kristiano mayo nin espirituwal na pakikiiba sa siisay man na natiwalag sa kongregasyon. Alagad orog pa an kalabot. An Tataramon nin Dios nagsasabi na maninigo na kita “dai ngani magkakan kaiba nin siring na tawo.” (1 Cor. 5:11) Huli kaini, linilikayan man niato an sosyal na pakikiiba sa sarong tiwalag. Dai puede digdi an pag-iba sa saiya sa sarong piknik, parti, karawat nin bola, o pag-iba sa galeriya o sinehan o pagkakan kaiba nia magsalang sa harong o sa restawran.
4 Kumusta man an pakikipag-olay sa sarong tiwalag? Minsan ngani dai man sinasambit kan Biblia an gabos na posibleng situwasyon, an 2 Juan 10 nakakatabang sa sato na masabotan an pagmansay ni Jehova sa mga bagay na iyan: “Kun may siisay man na magdolok sa saindo asin dai nagdadara kan katokdoan na ini, nungka na padagoson sia sa saindong harong o taratarahon sia.” Sa pagkomento digdi, An Torrengbantayan na Abril 1, 1982, p. 11 (w81-E 9/15 p. 25), nagsasabi: ‘An simpleng pagsabi nin “Kumusta” sa saro puedeng magin enot na tangga na minagiya pasiring sa orolay asin tibaad pagigin mag-amigo pa ngani. Boot daw niatong gibohon an enot na tanggang iyan sa sarong natiwalag?’
5. Kun natiwalag, ano an nawawara sa saiya?
5 Tunay nanggad, iyan siring man sana kan sinasabi sa pahina 16-17 (sa Ingles, p. 31) kan kaparehong luwas kan An Torrengbantayan: ‘An totoo iyo na kun an Kristiano napadadaog sa kasalan asin kaipuhan na itiwalag, dakula an nawawara sa saiya: an saiyang inooyonan na kamugtakan sa atubangan nin Dios; . . . an nakaoogmang pakikiiba sa mga tugang, pati an kadaklan sa dati niang pakikiasosyar sa Kristianong mga paryente.’
6. Hinahagad daw sa sarong Kristiano na putolon an gabos na pakikiiba sa natiwalag na paryente na kaiba sa harong? Ipaliwanag.
6 Sa Kairiba sa Harong: Ini daw nangangahulogan na an mga Kristiano na kaiba sa harong an natiwalag na miembro kan pamilya dapat na likayan an pakikipag-olay sa, pagkakan kaiba kan, asin pakiibaiba sa sarong iyan mantang ginigibo ninda an saindang pan-aroaldaw na mga aktibidad? An Torrengbantayan na Mayo 1, 1991, sa nota sa ibaba na nasa pahina 16 (w91-E, 4/15 p. 22), nagsasabi: ‘Kun sa sarong Kristianong pamilya may natiwalag na paryente, an sarong iyan kabtang pa man giraray kan normal, pan-aroaldaw na pakikiiba asin mga gibohon kan pamilya.’ Sa siring, nasa mga miembro na kan pamilya an pagdesisyon kun sagkod saen iiiba an tiwalag na miembro kan pamilya kun nagkakakan o nakikikabtang sa ibang mga aktibidad kan pamilya. Alagad ta dai ninda bobooton na magtao nin impresyon sa mga tugang na nakakaasosyar ninda na an gabos na bagay kapareho kan dati bago nangyari an pagtitiwalag.
7. Paano nababago an espirituwal na asosasyon sa laog kan harong kun natiwalag an sarong miembro kan pamilya?
7 Minsan siring, An Torrengbantayan na Abril 1, 1982, p. 14 (w81-E 9/15 p. 28), nagsasabi mapadapit sa natiwalag o nagdisasosyar: ‘Biyo nang pinutol an dating espirituwal na mga relasyon. Ini totoo minsan mapadapit sa saiyang mga paryente, pati an mga nasa laog mismo kan saiyang pamilya. . . . Iyan mangangahulogan nin mga pagkaliwat sa espirituwal na asosasyon na tibaad yaon kaidto sa harong. Halimbawa, kun an agom na lalaki natiwalag, an agom na babae asin mga aki nia dai magigin komportable kun sia an mamamayo sa pampamilyang pag-adal sa Biblia o mangengenot sa pagbasa sa Biblia asin sa pamibi. Kun gusto niang mamibi, arog baga sa oras nin pagkakan, may deretso siang gibohon iyan sa sadiri niang harong. Alagad puede sindang silensiong magdolot kan sadiri nindang pamibi sa Dios. (Tal. 28:9; Sal. 119:145, 146) Ano kun an sarong natiwalag sa harong boot na magin presente kun an pamilya nagbabasa nin iriba kan Biblia o nag-aadal sa Biblia? Puede siang pabayaan kan iba na magin presente tanganing maghinanyog kun sia dai maghihingoa na itokdo sa sainda o ihiras an saiyang relihiosong mga ideya.’
8. Ano an paninimbagan kan Kristianong mga magurang sa sarong natiwalag na menor de edad na aki na kaiba sa harong?
8 Kun natiwalag an sarong menor de edad na aki na kaiba sa harong, may paninimbagan pa man giraray an Kristianong mga magurang sa pagpadakula sa saiya. An Torrengbantayan na Disyembre 1, 1988, pahina 18 (w88-E 11/15 p. 20), nagsasabi: ‘Kun paanong padagos ninda siang tatawan nin pagkakan, gubing, asin istaran, kaipuhan na tokdoan asin disiplinahon sia ninda kaoyon sa Tataramon nin Dios. (Tal. 6:20-22; 29:17) Sa siring an mamomoton na mga magurang puedeng mag-areglo na adalan sia sa Biblia, dawa kun sia tiwalag. Tibaad makua nia an pinakanagtatanos na pakinabang sa pakikipag-adal ninda sa saiya nin solo. O tibaad magdesisyon sinda na puede siang magpadagos na umiba sa pampamilyang pag-adal.’—Helingon man An Torrengbantayan na Oktubre 1, 2001, pahina 16-17.
9. Sagkod saen an sarong Kristiano maninigong makikomunikar sa sarong natiwalag na paryente na dai kaiba sa harong?
9 Mga Paryente na Dai Kaiba sa Harong: “Laen an kamugtakan kun an tiwalag o nagdisasosyar sarong paryente na dai kaiba sa pamilya asin sa harong,” an sabi kan The Watchtower na Abril 15, 1988, pahina 28. “Tibaad posible na dai haros magkaigwa nin komunikasyon sa paryente. Dawa kun igwa nin nagkapirang bagay na pampamilya na nagkakaipo nin komunikasyon, papagdanayon nanggad ini na pinakakadikit sana,” kaoyon kan pagboot nin Dios na “umontok sa pakikiiba sa siisay man” na nagkasala na dai nagsolsol. (1 Cor. 5:11) An maimbod na mga Kristiano maninigong magmaigot na likayan an dai kaipuhan na pakikiiba sa siring na paryente, na pinagdadanay ngani na pinakakadikit sana nanggad an mga transaksion sa negosyo.—Helingon man An Torrengbantayan na Abril 1, 1982, p. 15-16 (w81-E 9/15 p. 29-30).
10, 11. Ano an kokonsideraron nin sarong Kristiano bago togotan an natiwalag na paryente na bumalik sa harong?
10 An The Watchtower tinatawan nin atension an saro pang situwasyon na puedeng lumataw: “Kumusta kun natiwalag an sarong haraning paryente, arog baga kan aking lalaki o magurang na dai kaiba sa harong, asin pagkatapos gustong bumalik duman? Puedeng magdesisyon an pamilya kun ano an gigibohon depende sa situwasyon. Halimbawa, an natiwalag na magurang tibaad naghehelang o dai na kayang asikasohon an saiyang sadiri sa pinansial o sa pisikal. An Kristianong mga aki igwa nin sono sa Kasuratan asin moral na obligasyon na tumabang. (1 Tim. 5:8) . . . Kun ano an gigibohon tibaad madepende sa mga bagay na arog baga kan tunay na mga pangangaipo kan magurang, an saiyang aktitud asin an pagmakolog kan payo nin pamilya para sa espirituwal na ikararahay kan pamilya.”—Helingon man An Torrengbantayan na Abril 1, 1982, p. 14-15 (w81-E 9/15 p. 28-9).
11 Kun manongod sa aki, nagpapadagos an artikulo man sanang iyan: “Kun beses an Kristianong mga magurang inako na bumalik sa harong sa laog nin dikit na panahon an natiwalag na aki na nagkahelang o nanluya an emosyon. Alagad sa kada kamugtakan puedeng tirotimbangon kan mga magurang an indibiduwal na mga sirkunstansia. Namuhay na daw nin solo an natiwalag na aki, asin ngonyan dai na nia kaya iyan? O gusto daw niang bumalik huli ta sa pangenot magigin mas pasil an buhay? Kumusta man an saiyang mga moral na gawe-gawe asin aktitud? Sia daw magdadara nin ‘lebadura’ sa harong?—Gal. 5:9.”
12. Ano an nagkapirang pakinabang sa areglong pagtitiwalag?
12 Mga Pakinabang sa Pagigin Maimbod ki Jehova: Kapakipakinabang an pakikikooperar sa areglong sono sa Kasuratan na itiwalag asin rayoan an habong magsolsol na mga paragibo nin sala. Iniingatan kaiyan an kalinigan kan kongregasyon asin ipinamimidbid kita bilang mga parasuportar sa halangkaw na mga pamantayan sa moral kan Biblia. (1 Ped. 1:14-16) Pinoprotehiran kita kaiyan sa nakararaot na mga impluwensia. (Gal. 5:7-9) Tinatawan man kaiyan nin oportunidad an paragibo nin sala na makinabang nin lubos sa inakong disiplina, na makakatabang sa saiya na magpaluwas nin “matoninong na bunga, arin na baga, an katanosan.”—Heb. 12:11.
13. Anong pagliliwat an ginibo nin sarong pamilya, asin may anong resulta?
13 Pakadangog nin sarong pahayag sa sarong pansirkitong asamblea, narealisar kan sarong tugang na lalaki asin kan kakambal niang tugang na babae na kaipuhan nindang gumibo nin mga pagliliwat sa paagi nin pagtratar ninda sa saindang ina, na nag-iistar sa ibang lugar asin anom na taon nang tiwalag. Pakatapos tolos kan asamblea, inapodan kan lalaki an saiyang ina, asin pakatapos na aseguraron sia kan saindang pagkamoot, ipinaliwanag kan lalaki na dai na ninda sia puedeng kaolayon apuera sana kun may importanteng pampamilyang mga bagay na nagkakaipo nin pag-oolay. Dai nahaloy pakatapos kaiyan, an saiyang ina nagpoon nang umatender sa mga pagtiripon asin pag-abot nin panahon nakabalik. Siring man, an saiyang agom na daing pagtubod nagpoon nang mag-adal asin pag-abot nin panahon nabautismohan.
14. Taano ta maninigo niatong maimbod na suportaran an areglong pagtitiwalag?
14 An maimbod na pagsuportar sa areglong pagtitiwalag na sinasabi sa Kasuratan nagpapaheling kan satong pagkamoot ki Jehova asin nagtatao nin simbag sa saro na nagduduhagi sa Saiya. (Tal. 27:11) Makaseseguro man kita sa bendisyon ni Jehova. Si Hadeng David nagsurat mapadapit ki Jehova: “Kun manongod sa saiyang mga reglamento, dai ako masiko dian. Sa sarong maimbod ika mahiro sa kaimbodan.”—2 Sam. 22:23, 26.