Pamumuhay Oyon sa Satong Pagdusay
1 Baga man kamo nabautismohan kasuarin pa sana o dakol nang dekada an nakaagi, posibleng marhay na nagigirumdoman nindo an makahulogan na pangyayaring iyan sa saindong buhay. An bautismo niato bakong an katapusan kundi, imbes, an kapinonan nin sarong bilog na buhay nin dusay na paglilingkod na puedeng magdanay sagkod lamang. (1 Juan 2:17) Ano an kalabot sa pamumuhay oyon sa satong pagdusay?
2 Sunodon an Halimbawa ni Cristo: Pakapabautismo, ‘pinonan ni Jesus an saiyang gibohon,’ na nagpapahayag kan “maogmang bareta kan kahadean nin Dios.” (Luc. 3:23; 4:43) Kaagid kaiyan, pakasimbolisaran kan satong pagdusay ki Jehova paagi sa bautismo, kita nagigin ordenadong mga ministro kan maogmang bareta. Minsan ngani dakol na panahon asin paghihingoa an tibaad kaipuhan sa pagkua kan materyal na mga pangangaipo sa buhay, an satong propesyon, o pinakatrabaho, iyo an Kristianong ministeryo. (Mat. 6:33) Imbes na magmaigot na magkaigwa nin kayamanan o prestihio, an mga nagdusay sa Dios naghihingoa na ‘pamurawayon an saindang ministeryo,’ siring kan ginibo ni apostol Pablo. (Roma 11:13) Pinahahalagahan daw nindo an saindong pribilehio nin paglilingkod ki Jehova asin ginigibo an pinakamakakaya nindo dian?
3 Siring sa kamugtakan ni Jesus, dapat na “tumangon [niato] an Diablo.” (Sant. 4:7) Sinugotan ni Satanas si Jesus pakatapos kan Saiyang bautismo, asin pinupunteriya man nia an nagdusay na mga lingkod ni Jehova ngonyan. (Luc. 4:1-13) Huling napapalibotan kan kinaban ni Satanas, dapat kitang magin disiplinado sa sadiri, na linilikayan an ano man na puedeng makaati sa satong isip o makaraot sa satong puso. (Tal. 4:23; Mat. 5:29, 30) Sinasadol an mga Kristiano na “dai [sinda] puedeng makikakan sa ‘lamesa ni Jehova’ asin sa lamesa nin mga demonyo.” (1 Cor. 10:21) Ini nagkakaipo na magmaan kita sa nakararaot na aling-alingan, maraot na pag-iriba, asin mga peligro sa Internet. Iyan naghahagad man na likayan niato an apostatang materyales. An pagigin listo sa mga ini asin sa iba pang mga taktika ni Satanas makakatabang sa sato na mamuhay oyon sa satong pagdusay.
4 Gamiton an mga Probisyon nin Dios: Tangani na tabangan kitang makapamuhay oyon sa satong pagdusay, nagtao si Jehova nin tabang paagi sa saiyang Tataramon asin Kristianong kongregasyon. Gibohon na kabtang kan saindong aroaldaw na kaugalean an pagbasa sa Biblia asin pamimibi ki Jehova. (Jos. 1:8; 1 Tes. 5:17) Ikaogmang marhay an mga pagtiripon sa kongregasyon. (Sal. 122:1) Makiasosyar sa mga natatakot ki Jehova asin nag-ootob sa saiyang mga pagboot.—Sal. 119:63.
5 Paagi sa tabang nin Dios, makapamumuhay kamo oyon sa saindong pagdusay ki Jehova asin magkakaigwa kan kagayagayahan nin paglilingkod sa saiya sagkod lamang.—Sal. 22:26, 27; Fil. 4:13.