Sarong Pagdaguso nin mga Parakabayo na Kalabot Kamo
1, 2. Paano kalabot an mga lingkod nin Dios ngonyan sa kaotoban kan makahulang bisyon na nasusurat sa Kapahayagan 9:13-19?
1 “Pinatanog kan ikaanom na anghel an saiyang trumpeta.” Kasunod kaiyan, nag-urog-udog an “mga hukbo nin mga parakabayo” na may kabilangan na “duwang manampulong ribo nin manorosampulong ribo.” Ini bakong ordinaryong puersa militar. “An payo kan mga kabayo garo payo nin mga leon.” Nagluluwas sa saindang ngoso an kalayo, aso, asin asupre, asin an saindang “ikog garo mga halas.” An simbolikong pagdaguso na ini nin mga parakabayo grabe an ginibong destroso. (Kap. 9:13-19) Aram daw nindo kun paano kamo kalabot sa kaotoban kan nakaaapod nin atension na makahulang bisyon na ini?
2 An mga linahidan na natatada asin an saindang kairiba, an ibang karnero, sararong ipinahahayag an mga paghokom nin Dios. Nagresulta ini sa biyong pagkabuyagyag kan gadan na kamugtakan sa espirituwal kan Kakristianohan. Siyasaton niato an duwang aspekto kan makahulang bisyon na itinatampok kun taano ta epektibong marhay an ministeryo kan mga lingkod nin Dios.
3. Anong pagsasanay an inako nindo tangani na itaram an mensahe nin Dios sa epektibong paagi?
3 Sinanay Asin Andam na Magdara kan Mensahe nin Dios: Paagi sa Teokratikong Paadalan sa Pagmiministro asin iba pang mga pagtiripon kan kongregasyon, sinanay an mga ministro nin Dios na magtaram kan mensahe nin Dios na may autoridad. Bilang pag-arog ki Jesus asin sa saiyang mga disipulo, sinda minaluwas tanganing hanapon an mga maninigo, na naghuhulit saen man may mga tawo. (Mat. 10:11; Mar. 1:16; Luc. 4:15; Gibo 20:18-20) Kanigoan kaepektibo kan metodong ini nin paghuhulit na basado sa Biblia!
4. Anong kasangkapan an makukua nin dakol na parahayag tangani na maotob ninda an saindang gibohon?
4 Binilyon na Biblia, libro, brosyur, asin magasin an ikinawaras na kan Kristianong mga ministro bilang pag-otob sa sugo nin Dios na maghulit. Itinao an mga publikasyon na ini sa haros 400 na lenguahe, na kinokobrehan an kadakol na laen-laen na tema asin naggagamit nin mga pagdolok na nakaaakit sa manlaenlaen na klase nin mga tawo. Epektibo daw nindong ginagamit an mga kasangkapan na ini?
5, 6. Ano an nagpaparisa na an banwaan ni Jehova igwa nin langitnon na suporta?
5 Langitnon na Pagdirehir Asin Suporta: Liniliwanag man kan makahulang bisyon na may suporta nin Dios an aktibidad na irinerepresentar kan simbolikong pagdaguso nin mga parakabayo. (Kap. 9:13-15) Naootob an panglobong paghuhulit, bakong sa kadonongan o kapangyarihan nin tawo, kundi paagi sa espiritu nin Dios. (Zac. 4:6) Ginagamit ni Jehova an mga anghel tangani na direhiran an gibohon na ini. (Kap. 14:6) Sa siring, kaiba kan mga paghihingoa kan saiyang mga Saksi na tawo, itinatao ni Jehova an langitnon na suporta tangani na darahon sa saiya an mga mahoyo.—Juan 6:45, 65.
6 Huling sinanay, andam na marhay na magdara kan mensahe nin Dios, asin may paggiya nin mga anghel, dai kayang paontokon an banwaan ni Jehova. Padagos logod niatong gibohon an satong kabtang sa kaotoban kan nakapupukaw sa boot na makahulang bisyon na ini.