Tinatabangan ni Jehova an mga Nagtitiwala sa Saiya
1 Minamansay nin dakol na tawo na an kuarta, kapangyarihan, asin abilidad nin tawo importanteng marhay sa kapangganahan. (Sal. 12:4; 33:16, 17; 49:6) Minsan siring, an mga natatakot ki Jehova asin nagtitiwala sa saiya igwa kan garantiya kan Biblia na “sia an saindang tabang asin an saindang kalasag.” (Sal. 115:11) Estudyaran niato an duwang kabtang na dian kaipuhan kitang magpaheling nin pagtitiwala ki Jehova.
2 Bilang Kristianong mga Ministro: Kun ginigibo niato an mga asignasyon sa kongregasyon o nagtotokdo sa ministeryo sa langtad, dapat na magsarig kita sa satong Dios. Isip-isipa an halimbawa ni Jesus. Dawa ngani sia Aki nin Dios, dai sia nagtiwala sa saiyang sadiring kadonongan o abilidad kundi biyo siang nanarig sa saiyang langitnon na Ama. (Juan 12:49; 14:10) Lalo na nanggad na kaipuhan man niatong gibohon iyan! (Tal. 3:5-7) Solamente paagi sa bendisyon ni Jehova na an satong mapakumbabang mga paghihingoa magtatao nin onra sa saiya asin magtataong pakinabang sa iba.—Sal. 127:1, 2.
3 Ipinapaheling niato an satong pagsarig ki Jehova paagi sa pamimibi para sa saiyang paggiya asin tabang kan saiyang banal na espiritu. (Sal. 105:4; Luc. 11:13) Dugang pa, ipinapaheling niato an satong pagtitiwala sa Dios paagi sa pagbasar kan satong katokdoan sa saiyang Tataramon, an Biblia. An mensahe kaiyan may kapangyarihan na pahiroon an puso asin bagohon an buhay nin mga tawo. (Heb. 4:12) Napapamuraway si Jehova kun kita ‘naglilingkod na nagsasarig sa kosog na itinatao nin Dios.’—1 Ped. 4:11.
4 Pag-atubang sa mga Problema: Kaipuhan man niatong umasa ki Jehova para sa tabang kun napapaatubang sa mga pangigipit asin problema. (Sal. 46:1) Halimbawa, an sarong among tibaad magduwaduwang tawan kita nin bakasyon tangani na makaatender sa sarong asamblea, o tibaad mapaatubang kita sa sarong masakit na situwasyon sa satong buhay pampamilya. Ipinapaheling niato an satong pagtitiwala ki Jehova paagi sa odok na pakimaherak sa saiya asin pag-aplikar kan paggiya na itinatao nia paagi sa saiyang Tataramon asin organisasyon. (Sal. 62:8; 119:143, 173) Paagi sa paggibo kaiyan, naeeksperyensiahan kan mga lingkod ni Jehova an saiyang tabang sa saindang buhay.—Sal. 37:5; 118:13, 16.
5 Sinisierto sa sato ni Jehova mismo: “Maogma an pusog na lalaki na nagtitiwala ki Jehova, asin na an nagin kompiansa iyo si Jehova.” (Jer. 17:7) Ipaheling logod niato an satong pagtitiwala sa saiya sa gabos na ginigibo niato!—Sal. 146:5.