Pampamilyang Iskedyul—Mga Pagtiripon kan Kongregasyon
1 Kun kamo Kristianong magurang, gusto nindo na an mga aki nindo dumakula na namomoot asin naglilingkod ki Jehova patin, sa katapustapusi, magkamit nin buhay na daing katapusan sa ipinanugang bagong kinaban nin Dios. Paano nindo sinda matatabangan na enoton sa saindang buhay an pagsamba ki Jehova? An sarong mayor na paagi iyo an saindong halimbawa. (Tal. 20:7) Nagigirumdoman an halimbawa kan saiyang may pagtubod na ina, an sarong tugang na babae nagsabi: “Nungkang nagkaigwa nin pagduda kun baga maatender kami sa pagtiripon o dai.” Nagkaigwa ini nin nagdadanay na epekto sa saiya.
2 Nasasabotan daw kan saindong pamilya an katuyohan kan mga pagtiripon kan kongregasyon? An pagtotokdo na inaako ta sa mga pagtiripon na ini nagpapakosog sa sato na magpadagos sa paggibo kan kabotan nin Dios, asin an pakiibaiba niato sa mga tugang niato mahalagang marhay na gikanan nin pamparigon sa boot. (Isa. 54:13; Roma 1:11, 12) Minsan siring, an pangenot na katuyohan kan siring na mga pagtiripon iyo na omawon si Jehova “sa tahaw kan nagkakasararong mga kadaklan.” (Sal. 26:12) An Kristianong mga pagtiripon nagtatao sa sato nin mga oportunidad na ipaheling an satong pagkamoot ki Jehova asin sambahon sia.
3 ‘Padagos Kamong Magmaan na Marhay’: An pag-apresyar sa sagradong katuyohan kan satong mga pagtiripon mapahiro sa sato na ‘padagos na magmaan na marhay’ na dai luway-luway na magin ugale niato na magpalta sa mga pagtiripon tangani na asikasohon an mga bagay na bakong gayong importante. (Efe. 5:15, 16; Heb. 10:24, 25) Kun naggigibo kan saindong pampamilyang iskedyul, puede nindong ponan paagi sa pagsurat kan mga oras para sa mga pagtiripon kan kongregasyon. Dangan mag-ingat na dai pagtogotan an ibang aktibidad na makaolang sa mga iyan. Seguradohon na an pag-atender sa pagtiripon iyo an prioridad para sa saindong pamilya.
4 Bako daw na napapahiro kita kun nababasa niato an manongod sa mga tugang niato na nakakapanggana sa mga balakid sa pag-atender sa mga pagtiripon asin asamblea? Minsan ngani tibaad bakong gayong pambihira an kamugtakan nindo, posibleng marhay na kamo napapaatubang man sa mga kadepisilan. Orog pang pinapadepisil ni Satanas para sa banwaan nin Dios an pagsamba ki Jehova. Pero makakasierto kamo na seguradong maririparo kan mga aki nindo an determinadong paghihingoa kan saindong pamilya na umatender sa mga pagtiripon kan kongregasyon. Tunay nanggad na sa paggibo kaiyan, puede nindong ikatao sa sainda an sarong espirituwal na regalo na dai noarin man malilingawan.