Tabangan an Iba na Magin “Makinuyog Gikan sa Puso”
1. Ano an hinahagad ni Jehova sa saiyang mga parasamba?
1 An pagkuyog kaipuhan para sa inaakong pagsamba ki Jehova. (Deut. 12:28; 1 Ped. 1:14-16) Dai na mahahaloy, maabot an paghokom nin Dios “sa mga dai nakakamidbid sa Dios asin sa mga dai nagkukuyog kan maogmang bareta.” (2 Tes. 1:8) Paano niato matatabangan an iba na magin “makinuyog gikan sa puso” sa mga katokdoan kan Tataramon nin Dios?—Roma 6:17.
2. Taano ta mahalaga na tabangan an iba na pataluboon an makosog na pagtubod?
2 Paagi sa Pagtabang na Pataluboon an Pagtubod Asin Pagkamoot: Sa Kasuratan, an pagkuyog konektadong marhay sa pagtubod. Si apostol Pablo nagtaram manongod “sa pagboot kan Dios na daing katapusan tanganing palakopon an pagkuyog paagi sa pagtubod.” (Roma 16:26) Nasasambitan kan Hebreo kapitulo 11 an kadakol na halimbawa nin pagtubod, na an dakol kaiyan may kalabot na paghiro kaoyon kan ipinahayag na kabotan ni Jehova. (Heb. 11:7, 8, 17) Sa ibong na lado, an pakisuway ikinokonektar sa kawaran nin pagtubod. (Juan 3:36; Heb. 3:18, 19) Kaipuhan na pataluboon niato an abilidad sa paggamit kan Tataramon nin Dios tanganing tabangan an iba na pataluboon an klase nin pagtubod na nagbubunga nin pagkuyog.—2 Tim. 2:15; Sant. 2:14, 17.
3. (a) Paano konektado an pagkuyog sa pagkamoot? (b) Paano niato matatabangan an mga inaadalan sa Biblia na pataluboon an pagkamoot ki Jehova?
3 An pagkuyog konektado man sa pagkamoot sa Dios. (Deut. 5:10; 11:1, 22; 30:16) “Ini iyo an boot sabihon kan pagkamoot sa Dios,” an sabi kan 1 Juan 5:3, “na kuyogon niato an saiyang mga togon; pero an saiyang mga togon dai nakakapagabat.” Paano niato matatabangan an mga inaadalan sa Biblia na pataluboon an pagkamoot ki Jehova? Humanap nin mga oportunidad durante kan pag-adal na pataluboon an saindang pag-apresyar sa mga kualidad ni Jehova. Ipahayag an saindo mismong hararom na pagmate para sa Dios. Tabangan an inaadalan sa Biblia na pag-isipan an manongod sa pagpatalubo nin personal na relasyon ki Jehova. Orog kisa arin pa man, an pagkamoot ki Jehova magmomotibar sa iba—saka sa sato mismo—na gikan sa pusong kuyogon sia.—Mat. 22:37.
4. (a) Taano ta mahalaga an satong halimbawa? (b) Ano an dapat niatong gibohon tanganing mapatalubo an “pusong makinuyog”?
4 Paagi sa Satong Halimbawa: An sarong mapuersang paagi na maeenkaminar niato an iba na kuyogon an maogmang bareta iyo an satong halimbawa. Minsan siring, kinakaipuhan an danay na paghihingoa niato tanganing makultibar an “pusong makinuyog.” (1 Hade 3:9; Tal. 4:23) Ano an kalabot digdi? Pakosogon an saindong puso paagi sa regular na pag-adal sa Biblia asin pag-atender sa pagtiripon. (Sal. 1:1, 2; Heb. 10:24, 25) Pagmaigotan na makiasosyar sa mga an puso sararo sa tunay na pagsamba. (Tal. 3:20) Regular na makikabtang sa ministeryo sa langtad, na may sinserong kamawotan na matabangan an mga tawo sa saindong teritoryo. Mamibi para sa tabang ni Jehova na logod giyahan kita sa pagpatalubo nin marahay na puso. (Sal. 86:11) Likayan an mga bagay na puedeng makaraot sa saindong puso, arog kan inmoral o madahas na aling-alingan. Pagmaigotan na gibohon an mga bagay na orog na magpaparani sa saindo sa Dios asin magpapakosog kan saindong relasyon sa saiya.—Sant. 4:7, 8.
5. Paano binebendisyonan an mga makinuyog?
5 Sinierto ni Jehova sa saiyang suanoy na banwaan na maabot an mga bendisyon sa sainda kun mahinanyog sinda sa saiyang tingog. (Deut. 28:1, 2) Siring man ngonyan, abundang binebendisyonan ni Jehova an “mga nagkukuyog sa saiya bilang namamahala.” (Gibo 5:32) Kun siring, paagi sa satong pagtotokdo asin halimbawa, tabangan logod niato an iba na magin makinuyog gikan sa puso.