Andam daw Kamo Para sa Natural na Kalamidad?
1. Taano ta madonong na magin andam para sa mga kalamidad?
1 Kada taon, minilyon na tawo sa bilog na kinaban, pati an dakol sa satong mga tugang na lalaki asin babae, an apektado nin mga linog, tsunami, panahon nin makosog na tig-oran, bagyo, buwawi, asin baha. Mantang bigla na sanang nangyayari an natural na mga kalamidad asin puede iyan na makaapektar sa siisay man sa sato, madonong na magin andam.—Tal. 21:5.
2. Taano ta maninigo niatong pirmeng impormaran an kamagurangan manongod sa satong presenteng adres asin (mga) numero nin telepono?
2 Antes Pa: Kun beses nakakapagpatanid an mga autoridad manongod sa nagdadangadang na mga kalamidad. Mahalaga na tawan nin atension an mga patanid na iyan. (Tal. 22:3) Sa siring na mga situwasyon pagmamaigotan kan kamagurangan na kontakon an gabos na kakongregasyon tangani na tabangan sinda na gumibo nin kinakaipuhan na mga pag-andam. Pakatapos nin kalamidad, hihingoahon man kan kamagurangan na kontakon an gabos na asosyado sa kongregasyon tangani na siertohon kun sinda harayo sa peligro asin batidon kun anong tabang an tibaad kaipuhan. Puedeng mawara an mahalagang panahon kun an kamagurangan mayo nin pinakabagong impormasyon kun paano kokontakon an mga tugang. Kaya importante na pirmeng impormaran kan mga parahayag an sekretaryo asin an saindang paraataman sa pag-adal sa libro manongod sa saindang presenteng adres asin (mga) numero nin telepono.
3. Paano kita makikikooperar sa kamagurangan kun kita nakaistar sa lugar na pirmeng may kalamidad?
3 Kun an kongregasyon yaon sa lugar na pirmeng may kalamidad, puedeng hagadon kan kamagurangan sa mga parahayag an ngaran asin numero nin telepono nin sarong paryente o katood na dai nakaistar sa lugar na iyan asin ini an kokontakon kun may emerhensia. Papangyayarihon kaini an kamagurangan na hanapon an mga nag-ebakwit. Puede man na booton kan kamagurangan na gumibo nin plano kun ano an gigibohon kan kongregasyon kun may emerhensia na kaiba an siring baga sa sarong simpleng listahan nin mga suplay na pan-emerhensia na maninigong pirmeng igwa an lambang saro, mga areglo sa pag-ebakwit, asin mga plano sa pagtabang sa mga may espesyal na mga pangangaipo. Mahalaga an kooperasyon sa mamomoton na mga areglong ini.—Heb. 13:17.
4. Ano an maninigo niatong gibohon kun may mangyaring kalamidad sa satong lugar?
4 Pakatapos nin Kalamidad: Ano an maninigo nindong gibohon kun may mangyaring kalamidad sa lugar nindo? Seguradohon na naaasikaso an ensegidang pisikal na mga pangangaipo kan saindong pamilya. Kun kaya nindo, tumao nin kinakaipuhan na tabang sa iba na naapektaran. Hingoahon na makontak an saindong paraataman sa pag-adal sa libro o an ibang magurang sa kongregasyon sa pinakamadaling panahon na mapupuede. Maninigo ining gibohon dawa kun kamo harayo sa peligro asin dai nagkakaipo nin tabang. Kun kaipuhan nindo nin tabang, makakasierto kamo na ginigibo kan saindong mga tugang an gabos na paghihingoa na tabangan kamo. (1 Cor. 13:4, 7) Girumdomon na aram ni Jehova an situwasyon nindo; magsarig sa saiya na sususteniran kamo. (Sal. 37:39; 62:8) Magin listo sa mga oportunidad na magtao nin espirituwal asin emosyonal na suporta sa iba. (2 Cor. 1:3, 4) Ipagpadagos an teokratikong kaugalean nindo sa pinakamadaling panahon na mapupuede.—Mat. 6:33.
5. Paano kita bilang mga Kristiano apektado kan peligro nin kalamidad?
5 Mantang an peligro nin kalamidad an dahelan nin grabeng kahaditan sa kinaban, makakaasa kita sa ngapit na may kompiansa. Sa dai na mahahaloy, an gabos na kalamidad magigin nakalihis na. (Kap. 21:4) Mientras tanto, puede kitang gumibo nin rasonableng mga paagi na mag-andam para sa mga panahon nin problema asin kadepisilan mantang pinapagdadanay niato an satong kaigotan sa pagpahayag kan maogmang bareta sa iba.