Padagos na ‘Mamunga nin Dakol’
1 Ginagamit an simbolikong mga termino, ikinomparar ni Jesus an saiyang sadiri sa tunay na poon nin ubas, an saiyang Ama sa Paraataman, asin an saiyang linahidan nin espiritu na mga parasunod sa mabungang mga sanga kan poon nin ubas. Sa paglaladawan kan gibohon kan simbolikong Paraataman, idinoon ni Jesus an kahalagahan nin pagdadanay na marigon na nakakabit sa poon nin ubas. (Juan 15:1-4) An leksion iyo na an gabos na may dayupot na personal na relasyon ki Jehova dapat na magin arog nin mabungang sanga kan “tunay na poon nin ubas,” si Jesu-Cristo. Dapat na padagos kitang mamunga nin abunda kan “mga bunga kan espiritu” sagkod kan mga bunga kan Kahadean.—Gal. 5:22, 23; Mat. 24:14; 28:19, 20.
2 Mga Bunga kan Espiritu: An satong espirituwal na pag-oswag masosokol sa pangenot paagi sa kun gurano karahay niatong ipinapaheling an mga bunga kan espiritu. Pinagmamaigotan daw nindong kultibaron an mga bunga kan espiritu nin Dios paagi sa regular na pag-adal asin paghorophorop sa Tataramon nin Dios? (Fil. 1:9-11) Dai magduwaduwang arangon an banal na espiritu, na makakapaluwas sa saindo nin mga kualidad na nagpapamuraway ki Jehova asin makakatabang sa saindo na padagos na umoswag sa espirituwal.—Luc. 11:13; Juan 13:35.
3 An pagkultibar sa mga bunga kan espiritu makakatabang man sa sato na magin mas maigot na mga ministro. Halimbawa, an pagkamoot asin pagtubod nakakapahiro sa sato na magtao nin panahon na makikabtang nin regular sa ministeryo sa ibong kan satong sibot na iskedyul. An mga kualidad na arog baga kan katoninongan, pakatios, kabootan, kahoyoan, asin pagpupugol sa sadiri nakakatabang sa sato na magkaigwa nin tamang reaksion sa mga paratumang. An kagayagayahan nagpapangyari sa sato na makamate nin pagkakontento sa ministeryo dawa kun dai naghihimate an mga tawo.
4 Mga Bunga kan Kahadean: Gusto man niato na mamunga kan mga bunga kan Kahadean. Kaiba dian an pagdolot nin ‘atang nin pag-omaw, na iyo, an bunga nin mga ngabil na nagpapahayag sa publiko kan ngaran ni Jehova.’ (Heb. 13:15) Ginigibo niato ini paagi sa maigot asin marigon na pagbalangibog kan maogmang bareta. Naghihingoa daw kamo na mamunga nin mas dakol pang bunga kan Kahadean paagi sa pagpaoswag kan saindong personal na ministeryo?
5 Ipinarisa ni Jesus na bakong parareho kadakol an magigin bunga kan saiyang maimbod na mga parasunod. (Mat. 13:23) Kun siring, dai niato maninigong ikomparar sa iba an satong sadiri kundi maninigong itao niato ki Jehova an satong pinakamakakaya. (Gal. 6:4) An onesto niatong pagsiyasat kan satong personal na mga kamugtakan na ginagamit an Tataramon nin Dios matabang sa sato na padagos na pamurawayon si Jehova paagi sa ‘pamumunga nin dakol.’—Juan 15:8.