“Maogma an Tawo na Padagos na Nagtatagal sa Pagbalo”
1 Kaipuhan na atubangon kan gabos na Kristiano an mga pagbalo. (2 Tim. 3:12) An mga pagbalo tibaad paagi sa maluyang salud, kasakitan sa pagbuhay, mga sugot, persekusyon o sa dakol na iba pang paagi. An mga pagbalo na itinatao ni Satanas may katuyohan na paluyahon kita, na pabayaan niato an satong Kristianong ministeryo, o papondohon pa ngani kita sa paglilingkod sa Dios. (Job 1:9-11) Paano minagiya sa kaogmahan an pagtagal sa mga pagbalo?—2 Ped. 2:9.
2 Mag-andam Para sa mga Pagbalo: Itinao ni Jehova sa sato an saiyang Tataramon nin katotoohan, kaiba an rekord kan buhay asin mga katokdoan ni Jesus. Paagi sa pagdangog sa mga sinabi ni Jesus asin paggibo kaiyan, nagbubugtak kita nin masarig na pundasyon asin sa siring nag-aandam para sa kasakitan. (Luc. 6:47-49) Nakakakua man kita nin kosog sa iba pang probisyon—an satong Kristianong mga tugang, mga pagtiripon kan kongregasyon, asin basado sa Biblia na mga publikasyon hale sa grupong maimbod asin mapagmansay na oripon. Dayaday niatong ginagamit an regalo nin Dios na pamibi.—Mat. 6:13.
3 Tinawan man kita ni Jehova nin paglaom. Kun pinapatalubo niato an makosog na pagtubod sa mga panuga ni Jehova, an satong paglaom nagigin “angkla para sa kalag, sierto sagkod marigon.” (Heb. 6:19) Kan mga panahon kan Biblia, an mga barko nungkang minahale sa duongan na mayong angkla, dawa kun marahay an kamugtakan kan panahon. Kun bigla na sanang umabot an bagyo, an paghulog kan angkla puedeng ikalikay an barko na makasalpok sa mga gapo sa gilid nin baybayon. Siring man, kun pinapatalubo niato ngonyan an pagtubod sa mga panuga nin Dios, iyan an maparigon sa sato kun umabot an garo bagyong mga problema. Puedeng bigla na sanang magkaigwa nin mga kadepisilan. Minsan ngani kan enot maogmang inako an paghuhulit ni Pablo asin Bernabe sa Listra, nagbago tolos an situwasyon kan mag-abot an Judiong mga paratumang.—Gibo 14:8-19.
4 An Pakatagal Nagbubunga nin Kaogmahan: An pagdadanay na marigon sa ministeryo sa ibong nin pagtumang nagtatao sa sato nin katoninongan nin isip. Naggagayagaya kita kun ibinibilang kita na maninigong magtios nin kasusupgan huli ki Cristo. (Gibo 5:40, 41) An pagtagal sa mga pagbalo nakakatabang sa sato na mapatalubo nin mas lubos an mga kualidad nin kapakumbabaan, pagigin makinuyog, asin pakatagal. (Deut. 8:16; Heb. 5:8; Sant. 1:2, 3) Tinotokdoan kita kaiyan na manarig ki Jehova, magtiwala sa saiyang mga panuga, asin magpaili sa saiya.—Tal. 18:10.
5 Aram niato na temporaryo sana an mga pagbalo. (2 Cor. 4:17, 18) An mga pagbalo nagtatao sa sato nin mga oportunidad na patunayan an rarom kan satong pagkamoot ki Jehova. Paagi sa pagtagal kaiyan, makakatao kita nin simbag sa mga akusasyon ni Satanas. Kun siring, dai kita minasuko! “Maogma an tawo na padagos na nagtatagal sa pagbalo, huli ta sa pagigin inooyonan aakoon nia an korona nin buhay.”—Sant. 1:12.