Pinakamamahal Niato an Satong mga Pribilehio!
1 Sa bilog na pag-eksister nin katawohan, tinawan ni Jehova an saiyang mga lingkod nin laen-laen na pribilehio. Tinawan nia sinda nin mga pribilehio ano man an saindang sekso, edad, o kamugtakan sa buhay. (Luc. 1:41, 42; Gibo 7:46; Fil. 1:29) Anong mga pribilehio an itinatao nia sa sato ngonyan?
2 Nagkapira sa Satong mga Pribilehio: May pribilehio kita na tokdoan ni Jehova. (Mat. 13:11, 15) An pag-omaw ki Jehova paagi sa satong mga komento sa mga pagtiripon kan kongregasyon saro pang pribilehio na pinakamamahal niato. (Sal. 35:18) Kun may mga oportunidad kita na magkomento, entusiastiko niatong ginigibo iyan. Siring man, kun an lambang asignasyon sa kongregasyon minamansay niato na sarong onra, gigibohon niato iyan sagkod sa pinakamakakaya niato. Regular daw kitang nakikikabtang sa pribilehio na papagdanayon na malinig asin nasa marahay na kamugtakan an Kingdom Hall?
3 Minsan ngani minilyon an nagdududa kun baga dinadangog nin Dios an saindang mga pamibi, may pribilehio kita na an satong mga pamibi dadangogon kan pinakamahalagang Persona sa uniberso. (Tal. 15:29) Si Jehova personalmenteng naghihinanyog sa mga pamibi kan saiyang mga lingkod. (1 Ped. 3:12) Dai sia nagbubugtak nin limitasyon sa kun gurano kaparate kita puedeng dumolok sa saiya. Kanigoan kamahal na regalo an yaon sa sato, an makapamibi “sa gabos na panahon”!—Efe. 6:18.
4 “Mga Kapwa Trabahador nin Dios”: An saro sa pinakamarahay na mga pribilehio niato iyo an pagbalangibog kan maogmang bareta kan Kahadean nin Dios bilang “mga kapwa trabahador nin Dios.” (1 Cor. 3:9) Ini sarong gibohon na nagbubunga nin pagkakontento asin kaginhawahan. (Juan 4:34) Dai kaipuhan ni Jehova na gamiton an mga tawo tanganing otobon an gibohon na ini, alagad itinao nia sa sato an asignasyon na ini bilang kapahayagan kan saiyang pagkamoot. (Luc. 19:39, 40) Sa paggibo kaiyan, dai itinao ni Jehova an pribilehiong ini sa minsan siisay na sana. An mga nakikikabtang sa pampublikong ministeryo dapat na makaabot asin makapagdanay sa nagkapirang espirituwal na kualipikasyon. (Isa. 52:11) Ipinapaheling daw niato na pinapahalagahan niato an pribilehiong ini paagi sa paggibo na an ministeryo magin mahalagang kabtang kan satong semanal na rutina?
5 An mga pribilehiong hale ki Jehova ginigibong nakakakontento an satong buhay. (Tal. 10:22) Nungka nindong ipasipara na sana an mga iyan! Paagi sa pagpaheling na talagang pinakamamahal niato an satong mga pribilehio sa paglilingkod, napapaogma niato an satong langitnon na Ama, an Paratao nin “lambang marahay na balaog asin lambang sangkap na regalo.”—Sant. 1:17.