Dai Mag-alangan!
1. Sa anong paagi na dai niato ‘ipinapanguri an marahay’?
1 Paagi sa aktibong pakikikabtang sa pagbalangibog kan maogmang bareta kan Kahadean nin Dios, dai niato ‘ipinapanguri an marahay’ sa mga tawo sa mga teritoryong inasignar sa sato. (Tal. 3:27) Mayo na nin mas marahay pang mensahe na ikakapaabot sa katawohan kisa sa mensahe dapit sa mas marahay na mga panahon na maabot sa irarom kan pamamahala nin Dios. Minsan ngani tibaad buka an palad na ipinapaabot nindo an paglaom sa Kahadean paagi sa impormal na pagpapatotoo o pagpasakamot nin literatura, taano ta dai nindo gibohon na pasohan na magkondukta nin pag-adal sa Biblia, kun dai pa nindo ginigibo iyan?
2. Ano an tibaad magin dahelan na kita mag-alangan na pumoon nin pag-adal sa Biblia?
2 Kun beses, an saro sa pinakadakulang mga olang sa pagkondukta nin pag-adal sa Biblia iyo an satong saboot sa bagay na iyan. Nag-aalangan an nagkapira na magkondukta nin pag-adal sa Biblia huli sa pakamate na kulang an kakayahan ninda o huli sa saindang sibot na iskedyul. An minasunod na mga suhestion puedeng makatabang sa saindo na dai mag-alangan sa pakikikabtang sa pagkondukta nin pag-adal sa Biblia.—Mat. 28:19; Gibo 20:20.
3. Taano ta kualipikado kita na magtokdo kan Biblia?
3 Kawaran nin Kompiansa: Tibaad limitado an saindong sekular na edukasyon o huli sa iba pang dahelan mayo kamo nin kompiansa sa abilidad nindo na magkondukta nin pag-adal sa Biblia. An epektibong Kristianong mga ministro kan enot na siglo “daing inadalan asin ordinaryo.” Ano an nagpangyari na ikatokdo ninda sa iba an katotoohan? “Sinda dating mga kaiba ni Jesus.” (Gibo 4:13) Nakanood sinda sa Dakulang Paratokdo, si Jesus, na an mga katokdoan asin paagi iningatan sa Kasuratan para sa sato. Dawa kun limitado an saindong sekular na edukasyon, nag-aako kamo nin espirituwal na edukasyon na dai mapapantayan nin ano pa man na ibang porma nin edukasyon.—Isa. 50:4; 2 Cor. 3:5.
4. Ano an manonodan niato sa halimbawa ni Amos?
4 Kun beses ginagamit ni Jehova kaidto an mga propeta tanganing sagweon an napapasalang mga namamahala o iba pa na may halangkaw na posisyon. An nagkapira, arog ni Amos, hale sa hamak na kamugtakan. Minidbid ni Amos: “Bako akong propeta, ni aki man ako nin sarong propeta; kundi ako sarong paraataman nin hayop asin paratudok nin mga igos nin mga kahoy na sikomoro.” (Amos 7:14) Minsan siring, dai nag-alangan si Amos na ipahayag an mensahe nin paghokom ni Jehova ki Amasias na saserdoteng nagsasamba sa ogbon na baka. (Amos 7:16, 17) Dapat na pirme niatong girumdomon na ginigibo niato an gibohon nin Dios asin sia an mapangyari na kita magin kualipikadong marhay para sa gibohon na itinao nia sa sato.—2 Tim. 3:17.
5. Taano ta maninigo kitang maghingoa na makapoon nin pag-adal sa Biblia dawa kun sibot an iskedyul niato?
5 Sibot na Iskedyul: Dawa kun sibot an iskedyul nindo, posibleng marhay na nagtagama na kamo nin panahon tangani na makikabtang nin regular sa ministeryo. An pagkondukta nin pag-adal sa Biblia puedeng magin saro sa pinakanakakagayagayang mga aspekto kan ministeryo. Sarong pribilehio na maheling na an Tataramon ni Jehova nagkakaigwa nin epekto sa buhay nin sarong tawo. (Heb. 4:12) Naoogma si Jehova kun naggigibo kita nin personal na mga sakripisyo tanganing tabangan an saro na “makaabot sa tamang kaaraman sa katotoohan.” (1 Tim. 2:4) Dawa an mga anghel naggagayagaya kun pinagsosolsolan nin saro an dati niang paggawe asin nag-ooswag sa espirituwal.—Luc. 15:10.
6. Igwa kita nin anong pribilehio sa paggibo kan kabotan nin Dios?
6 ‘Kabotan nin Dios na an gabos na klase nin tawo makaligtas asin makaabot sa tamang kaaraman sa katotoohan.’ (1 Tim. 2:4) Igwa nanggad kita nin espesyal na kabtang na gumibo kaoyon kan kabotan nin Dios, na dai nag-aalangan na magkondukta nin mga pag-adal sa Biblia!