Igwa Kita nin Ikakatao ki Jehova
1 Aram daw nindo na an mga tawo igwa nin ikakatao sa Dios? Si Abel nag-atang ki Jehova nin nagkapira sa saiyang mahalagang marhay na mga hayop, asin kaagid man kaiyan an mga idinolot ni Noe asin ni Job. (Gen. 4:4; 8:20; Job 1:5) Siempre, an siring na mga dolot dai nagpayaman sa Kaglalang sa ano man na paagi, huling sadiri na nia an gabos na bagay. Alagad an mga atang nagpaheling nanggad kan hararom na pagkamoot sa Dios kan maimbod na mga lalaking idto. Ngonyan, magagamit niato an satong panahon, kosog, asin mga rogaring sa pagtao ki Jehova “nin atang nin pag-omaw.”—Heb. 13:15.
2 Panahon: Kaomaw-omaw nanggad na ‘tuboson’ an panahon sa bakong gayo importanteng mga bagay tanganing mas lubos kitang makapakikabtang sa ministeryo! (Efe. 5:15, 16) Tibaad puede niatong liwaton an satong iskedyul tanganing mag-auxiliary payunir nin sarong bulan o labi pa kada taon. Tibaad puede niatong palawigon an panahon na parate niatong ginagamit sa ministeryo. An pagdagdag nin 30 minutos sa paglilingkod kada semana makakadagdag nin kisuerra duwang oras kada bulan sa satong ministeryo!
3 Kosog: An pagkaigwa nin kosog na magagamit sa ministeryo nagkakaipo na likayan niato an pag-aling-aling asin trabaho na nakakapagal na gayo sa sato kaya dai na niato ikinakatao ki Jehova an satong pinakamakakaya. Kaipuhan man niatong ipagilid nguna an mga kahaditan na ‘makakapaduko’ sa satong puso, na minaubos kan kosog na magagamit niato sa paglilingkod sa Dios. (Tal. 12:25) Dawa kun makatanosan na maghadit kita, mas marahay nanggad na ‘itao niato ki Jehova an pagabat sa sato’!—Sal. 55:22; Fil. 4:6, 7.
4 Mga Rogaring: Ikakatao man niato an satong materyal na mga rogaring tanganing suportaran an paghuhulit. Dinagka ni Pablo an mga kapwa Kristiano na regular na “magtagama” tanganing may ikatao sa mga nangangaipo. (1 Cor. 16:1, 2) Sa kaparehong paagi, puede man kitang magtagama nin kuarta na idodonar para sa mga pangangaipo kan lokal na kongregasyon saka para sa pambilog na kinaban na gibohon. Inaapresyar ni Jehova an itinatao niato gikan sa puso, dawa kun dikit sana iyan.—Luc. 21:1-4.
5 Dakol an itinatao sa sato ni Jehova. (Sant. 1:17) Ipinapaheling niato an satong pag-apresyar paagi sa buka an palad na pagtao kan satong panahon, kosog, asin iba pang rogaring tanganing paglingkodan sia. An paggibo niato kaiyan nagpapaogma ki Jehova, “huli ta an Dios namomoot sa maogmang paratao.”—2 Cor. 9:7.